1 Yihudik moyanji Sedeqiyaasi, Melkiyaake belto Phashihuurinna Ma'iseyaaka belto qeesichcho Sofoonyaasi'i isiba ergaa wodda, Duuchchi Woddike Goottik hiyyeechchi Ermiyaasiba'a dage: 2 Iikki ergememmak manninna, «Baabiloonik moyanji Nabukadanatsoor no'oo lolate'e kaddemmaxxe'e, maganneten Duuchchi Woddika Gootta no'o'a laqi; akimagaada moyanji no'onaa'n higaashsha Duuchchi Woddiki Gootti qarishshanni mambe'a no'o'a assaaxxe hexxeen.»✝

3 Ermiyaasi kinni insa'nee, «Sedeqiyaasi'n hitinaaqic, 4 ‹Duuchchi Wooddik Gootti Isira'eelik Magen hiyya'nee qici: dalla'in gadhidarre ha'no'o buqeeka Baabiloonika moyanjonna Baabilonika manna loldino'a abixxitineek loliink miyi ha'noonni wirri hiyye miidhashsha assannon; loliinka miyanna konne qachchi giddi'a bukki hiyyaashsha aasannon. 5 Ani umi aningenninni anga anxa iimi'a aadhe jabaxxe hirrenni, mufet, bubbaaxxe aarenninna jabaxxe balanni ha'no'o lolannon.✝ 6 Konne qachchi giddo hedha'neeka, manjo hore duucha gane'naa'a jabaxxe balanni mudaan. 7 Ookonnechi uduma hiyya'nen Duuchchi Woddik Gootti, Yihudiinka moyanjo Sedeqiyaasinna ja'laabuwwa isika, konne qachchika, balatenaa'n wolaantichchakenaa'inna solo'okenaa'n gateeka arda lubbo insa'nexxa balleesso'a hasaake naapha'n, Nabukadanatsoori'i Baabiloonike moyanjo'n sa'isse uwwannon; isinna insa'ne'a godoba shaqqabaan; insa'ne'a mararabaan; insa'neenna hilabaan.›

8 «Higgeenn konne arda'n hitattoqic, ‹Duuchchi Woddik Gootti hiyya'neeqic: Ani kunniseten ha'no edo hedhotikanna reyotika ora uggeennen; 9 Konne qachchi giddo gataaki duuchchi wolaantichchik, solo'ikinna dhukkubik reyaan; fuleexxi buqemmake Baabiloonike manni'a anga uwwaak kinni reyabaan; hedho ifixxanna gatilsaan. 10 Ani konne qachcha'ni eloxxe kaddebaak fuggoxxa assonna'a mudhdheenen: kunni qachchi Baabiloonike moanjiinxe anga'n sa'isseme'e uwwemaan; isinna iso'o giirat balleessaan, ani Duuchchi Woddik Gootti tenne'e haaso'eennen› hiyye.

11 «Yihudiinke mootummatike mini hado'ninna hitattoqic, ‹Duuchchi Woddike Goottika hiyyichcho caqasse;✝ 12 Tee Daawwitixxe horteeri Duuchchi Woddik Gootti hiyya'neeqic:

« ‹Assitineexxe fuggonaa'n kexxeexxa,

Anxi mufe ha'no'n ha'yitabaashshanna,

ayyinna xolsabaaqico'n bubbabaashsha,

Barra duuchcha'ni dhugaa murre;

mulqemeeka manjonna,

iso'o miicemmakixxe anganaa'n gatisse.

13 Dhooqati alidarre,

rassatike tullichchi hana hexxetteke koo

Iyyerusaalemike qachcha ani ate'n ke'ennen hiyya'neen Duuchchi Woddik Gootti.

«Ayyete dage no'o'n ke'aak?

Ayyete no'o he'nenneba dande'e e'yaak?» hitinaakee,

14 Ani huje ha'nooxxishshanni ha'noo xixannon;

hiyya'neen Duuchchi Woddik Gootti.

Gongoma ha'noke'inna giira wocci assee'naa,

qarqarake'n hedheechcho duuchchanna ittaan› » hiyya'neen Duuchchi Woddik Gootti.