1 Mataanik belti Sefaaxiyaa, Phasikoorik belti Gadaliyaasi, Shelemiyak belti Huukaali iittanni Melkiyaaki belti Phasikoori ani Ermiyaasi ardake'n haaso'ennexxa duuchcha lanqe; 2 Hiyye haaso'enneqic, Duuchchi Woddiki Gootti, «Konne qachcha'n gataaki duuchchi wolaantichchik, dhukkubik yookaan solo'ik reyaan; konnee booncho waale'e Baabiloonike manniba'a me'ak duuchchi lubbo gataan, hedhotinna hedhaan; 3 Dhugaten, kunni qachchi Baabiloonike moyanjike sannachcha'n sa'issemee uwwemaan; insa'nenna isoo'o abixxinaan» hiyyeexxa insa'ne'n kulenne.

4 Ookonechinni uduma ja'laabuwwi moyanjo, «Kunni manjichchi haaso'a'neexxi yaane, qachchi giddo gateek loliinki manninna ardi duuchchi hophpholaashsha assitaaxxe kaddemmaxxee isi shiyemuun; kunni manjichchi ardakee'e fuggoxxa malee'n eloxxa gaabbaakebaan» hine. 5 Moyanji Sedeqiyaasinna, «Kunniseten isi anga ha'nooxxe'n hedhemmaxxee ani ha'no hitinaaxxa gibe'e assannoxxi mittetinna hexxebaan» hiyye. 6 Tennexxee insa'ne anee aa'neexxi mootomatike minixxe baxxe giddo hexxeexxe moyanjinka belto Melkiyaaxxa wodi'iinxe bale giddo wodarot butti'a wocci assine; Bale giddo dhoqqe malee'e wodi'i hedhemmabaan; dhoqqetinna anee'e liqi'mi assite. 7 Mootomati mini giddo huje afe'eek Tophiyiink manji, Abemeelek, anee'e bale giddo hunneexxa laqe; eettene yanna Moyanji Biniyaamike bitumiba'a e'yinammaxxe hula bira ofo'leemman. 8 Abemeelekinna mootamatike mininaa'n fule mareexxi moyanjo, 9 «Koo gootta moyanjoo, kunni manni wabeekichcho Ermiyaasi'n asseexxi yaane duuchchi fuggoxxen; qachchi giddo indaachchi gophemeexxe yanna'n solo'ik reyaashsha bale giddo isoo hunne'een» hiyye. 10 Okkoonechinni udumi'a Moyanji Abemeeleki'i Tophiyiichcho, «Kabaa'n sase tomme manna adhdhite me'ite'e, reyebaang Ermiyaasii waabeekichcho bale giddii'n fulchi» hiyye ajaje. 11 Tennexxee Abemeelek manna aadheexxi mootummatike miyike mini hunda hexxeexxe kuta giddo mareexxi, mudde'eexxe seemmuwwaka shurqa ookoo'n aadheexxi Ermiyaasiba'a bale giddi'a wodarot butti'a wocci asse. 12 Tophiyiichchi Abemeelek anee'e, «Wodaro atee'e woxxabaashsha tenne muddexe seemaka curqa bobati hunda uggudhdhi» hiyye. Aninna isi hiyyemmashshanni assenne. 13 Insa'nenna anee'e wodarot iimi'a harkinse bale giddii'n fulchinee'naa mootommatike minixxe heqqanjuwwixxe kuta giddo heqqemenne.

14 Moyanji Sedeqiyaasi anee Ermiyaasiba manjo ergeexxi Duuchchi Woddike Gootike galmixxe sakkaxxe hulaba anee'e iyyedangaashsha asseexxi, «Mitte yaane atee'e qoraa'ennen, ittanna anee'e shoxxoxxe» hiyye. 15 Aninna Sedeqiyaasi'i, «Dhuga haaso'onnole anee'e shiya waaldabexxon; Gorsennelenna gorsa anka adhitabexxon» hiyyenne. 16 Moyanji Sedeqiyaasi, «Ani hedhot hedhono'a hedho uwweeke Duuchchi Woddike Goottixxa! Atee shiyabe'non; shiyaake mannixxe anga'inna sa'issenna atee uwwabe'non» hiyya'n sho'ik kakate. 17 Okkonechchinni uduma ani Sedeqiyaasi'n «Lumoki Duuchchi Woddiki Gootti Isira'eelik Magen, ‹Ati Baabiloonike moyanjuwike ja'laabuwwi'a anga uutottole, lubbo gattatton; kunni qachchinna gubatabaan; atinna atik mini hadi hedhoti hexxinaan. 18 Baabiloonike moyanjiwike ja'laabuwi'a anga uwwa gophphottole kinni kunni qachchi Baabiloonike mannixxe anga'n sa'isseme uwwemaan; insa'nenna isoo'o gunbaan; atinni umi ating insa'neexxe anganaa'n fuldabexxon› hiyya'neen» hiyyenne. 19 Moyanji Sedeqiyaasinna «Ani Baabiloonik manni no'o giddii'n finqile Baabilooni'a me'emmake no'ooke Ayihudiinke mannixxe anga'n anee sa'isse uwwe'naa'a insa'ne ane'n gacifantuun hiyya'nee sodaata'ennen» hiyya'n ane'n hiisse haaso'e.

20 «Meeco'o insa'ne atee'e sa'issine uunabaan» hiyyeexxi Ermiyaasi iso'ni hiisse haaso'e. «Ani ate'n kula'anneka konnee Duuchchi Woddike Goottike hiyyichchi calli'a ajajemi; ookone wodda eloxxi ati'a kaddaan; lubbotanna gattatton. 21 Anga uwwa gibbottole kinni Duuchchi Woddiki Gootti ane'ni leellisheexxe yaane hexxeen. 22 Tinninna, Yihudake mootumatike mine'ni gattemmaxxi melaalle duuchchi Baabiloonike ja'laabuwwiba'a adhdhendaan; iitti melaallenna atee'e:

« ‹Ikki addettettak atik ja'laabuwwi,

atee'e dedhise injifateen;

Lekka atixxi dhoqqete'n lixxeen,

jaaluwwi atikinna atee'e walee me'een› hitaan.

23 «Aruwwa atixxinna oose atixxi duuchcha Baabiloonike manniba'a adhdhendaan; atinna umi atingi Baabiloonike moyanjixxe anga'n ibbatto malee'e anga insa'nexxenaa'n fuldabexxon; kunni qachchinna giirati gubataan» hiyyenne.

24 Sedeqiyaasinna Ermiyaasii'i, «Tennee haasonnexxa yaane ayyinna afaak hedhoqqe'e; kadagophphoole shiyendaton. 25 Ja'laabuwwi ani atinni welt haaso'ennexxa laqee atiba dageexxi, ‹Moyanjoke'n maa hitettexxa, moyanjikinna ate'n maa hiyyeexxa shoxxebexxong no'o'n kuli; kula gophphottole atee shinnanon› hinoole, 26 ati ‹Ookko reyabe'noshsha Yoonaataanike mine'n anee'e illeema hissitoxxe hiyya'n moyanjo kadhata'anan› hite insa'ne'n kuli» hiyye. 27 Ja'laabuwwi duuchchi aniba dageexxi anee'e qore; aninna moyanji kulona'a ajajemaxxa duuchcha insa'ne'n kulenne; aninna moyanjik welti haaso'eneka haaso'a laqeeki mittikinna hedhagophemaxxee okonechcinni udumi'a anee'e yaansisebaan. 28 Aninna Iyyerusaalemi abidendeexxe barraqico'n mootomatike minixxe baxxe'n heqanjuwwinke mini giddo heqema'n offolenne.