1 Duuchchi Woddiki Gootti ane'e «Layinotixxe seemmanni giissemeeka hanfala marte hidhdhi; hidhakanna usudhdhi; yaane kinn wode'e tuqissoxxe» ane'e hiyye. 2 Tennexxee Duuchchi Woddiki Gootti anee ajejemmashshanni hanfalakanna hidhenne hidhake'ninna usudhenne. 3 Duuchchi Woddiki Gootti hiyyichchi higee aniba dageexxi, 4 «Hidhdhite ka'littetaka hanfala adhdhite Efiraaxisi'a me'i; ookko'ona kinjiinke holli giddo iso'o sho'i» hiyye. 5 Tennexxe'a Duuchchi Woddiki Gootti ane'e ajejemaashshann Efiraaxisi marennexi iso'o sho'eneni.

6 Heddo barra uduma Duuchchi Woddiki Gootti «Kexxetexxi Efiraaxisi'a me'i ookko'o sho'i hiyyennaka hanfala aaxxe dag» anee'e hiyye. 7 Aninna Efiraaxisi'a mare hanfala sho'ennabaa'n ume fulchennen; hanfalkinna kukkuteme ba'eemman.

8 Duuchchi Woddike Goottik hiyyichchi anibaa dageexxi, 9 «Duuchchi Woddik Gootti hiyyee qici ‹Yihudiinke ardixxa hullanna Iyyerusaalemike ardika mittooma konneechchishshann balleessannon. 10 Hiyyichcho anka laqa ginbe godoba xaqaro uggudhdhine mammaremati heeshshi qokki hina'n magenooffanto'a wele fakkuwwa hordofaaki Kunni fuggichchi ardi konne kukkuteme ba'eke sabbatishsha ittan ba'naani. 11 Hanfala hidhake'n usudhdhinammashann Isira'eeliki ardi duuchchinna Yihudiink ardi aninni welti mittoome summa ankee galatakanna ulfinna anke arda kadaashsha assedheennan; anki ardi kinni laqebaan› hiyya'neen Duuchchi Woddik Gootti.

12 «Duuchchi Woddiki Gootti Magen insa'ne hiyya'neeqic, ‹Waabi duuchchi woyinetixxe bookanni wo'maan› hiyya'neen. Insa'nenna ‹Waaba duuchcha'n woyinetixxi booka wo'mataaxxa egenebe'nochcho ate'n labbe?› atee hinoole; 13 Insa'nee hitattoqic, ‹Duuchchi Woddiki Goottinna Daawwitixxe moote'ni ofolda'neexxa moyanjuwwa, qeesole raagole, Iyyerusaalemii hedha'neeka arda duuchcha ittanni konne boga'ne hedha'neeke duuchcha machchoosannon. 14 Mitti mitteke'ne anna beltoke'ni ke'isannon; hiyya'neen Duuchchi Woddik Gootti; marartebelonna gattowwaal belo insa'ne birannon› » hiyye.

15 Duuchchi Woddiki Gootti haaso'edheen,

laqqe, godoba galchedhdhe,;

holla waalle.

16 Dukkansebaang,

dukkandaaxxe koobuwwa'n

Ha'noxxi lekkuwwa guggufattinebang,

Duuchchi Woddika Gootta ha'nooka Mageno ulfeesse.

Ha'no ifa addatina,

isi kinni ifa dukkanate'n jijjiira;

dimma dukananna assaan.

17 Lanqabe'no hitineexxe kaddoole kinni

holla ha'nooxxe'e ille anxi,

sho'ondee ooxxaa;

Duuchchi Woddike Goottiki ardi booji'emeemmaxxe'e

ille anxi hiiqqise oodhannen;

indiddo anixxinna ca'li hite'e dunedaan.

18 Moyanjokena mootittete ittanni moyanjinxe ama,

«Ulfinnink ha'nook kallachchi

Ha'noona'ni ibammaxxe

moote ha'noxxenaa'n dirre» hiyye.

19 Negeebi hedheeki qachchuwwi cufemaan;

ayyinna iso'o banaaki hedhebaan

Yihudiinki ardi duuchchi booji'eman luggaan;

duuchching hedheshshanni cufema.

20 Tee Iyyerussaalem, ille hanoxxenni kokkine,

middii'n daga'neeka naaphuwwa uude.

Ati'a uwwemeek bobba'a;

kubbissaattaki atiki gedheb haba hedhee?

21 Jaaluwwa atike kado'a

Barsisetakir,

ate'een moyaa wodda maa hitatto?

Ildammaxxe manjichchoshsha

ciniinfattaboxxe?

22 «Tinni ane'ni gelteechchi mayeete?» hitettexxi

ifi qo'litottole,

Seemma darendee'na duwwi saalibelo gattettechchi

barse uuddetechchi,

cubbo atixxi bira saxxemmaxxeeten.

23 Tophiyiink manji bifa ifixxa,

qeedhanchi barro ifixxa jijjiidhdha dande'a?

Ha'no elobaaxxa assa baratineemmaxxe'e

eloxxa assa dandeetinabaan.

24 «Qiila gammoojjexxi diidallo huura xeerte birtammashsha

ittanni aninna ha'noo xeerannon.

25 Anee deete;

woyi fulabaaka magenuwwa addatteettaxxee;

Ati'a lallabeennaka

atika qoobbi mureennen»

hiyya'neen Duuchchi Woddik Gootti.

26 «Saali atik leellashsha,

seemma atixxa quncise duwwi gatisannon.

27 Tulluwwate'ninna diiduwwake'ni,

battitte atixxa huje,

Yabaabulletee affeettaxxe yortenni,

shookibelo yabaabulda'na uudennen.

Tee Iyyerusaalemi ati'a aanne'e!

Battummatenaa'n hanoo qulloondattota?»