1 Duuchchi Woddiki Gootti hiyya'nee qici:

«Kunni Baabilooninna boga iseka;

balleessitaaxxa jabaxxa diidallo ke'issannoni.

2 Ani Baabilooni'ii midhatishsha sore'e ballessaaka,

alaga Baabiloni'nni erganon;

Rakkotixxe barra'n;

elqe kayyii'n bunqe'e insa'nee rakkinsaani.

3 Gabetikna gabe xamaxxo'a,

loliinxa seemmanna odo'wwo'a yanna uutinoqqe'e;

Meenni dargaggeyye insa'neexxe mararre;

loliinka iseka sannachcha kutti asse.

4 Baabiloonge boga'n gorra'eme,

weldeenna weldenna'ninni jaba qico madoonne inbaani.

5 Bogi insa'neeki Isira'eelike woyyichchi edo,

balleessa bira saxxeeke kaddoolenna,

Isra'eelinna Yihuda Mageni insa'neek,

Lumoki Duuchchi Woddiki Gootti waalebaani.

6 « ‹Baabiloon giddii'n baajjine fulle;

rakkine baajjine lubbo ha'nooxxa gatirse;

cubbotixxe buutonni baxxinoqqe.

Duuchchi Woddiki Gootti halo fula'neexxe yannani;

isinna huje isexxika hira uwwa'neeni.

7 Baabilooni Duuchchi Woddike Goottixxe anga'n worqetixxe buuda kadde;

boga iseka duuchcha machcheessite;

Gosa gosaki ardi iseka woyinetika bagoka bulibulo ha'we;

tennexxee ta'a insa'ne marratee'eni.✝

8 Baabilooni dedhdhange'n ibbe enqendaani

ise'a woo hiyye!

Akimagaada fayya dandeetaani;

mada isexxe'n buurraaka qorsa ise'a hasse.

9 « ‹Baabilooni'i fayyinsonnaa wolaaneenani;

ise kinni fayya dandetabaani;

Murite ise'n murendeexxi iimi qico'n geltemaxxe;

iima duummanchi qico'n lummexxexxe kademaxxe;

waalenexxi ifi ifinge no'oke bogiba'a me'ino.›✝

10 « ‹Duuchchi Woddiki Gootti qajeelumma no'ooxxa dhugaa kule;

amme! Duuchchi Woddiki Gootti no'ooki Mageni asseexxa duuchcha;

Tsiyooni'n kullo› hine.

11 «Mogiduwwa ha'nooka qarre;

wontuwwatanna qophpheeffatte;

Duuchchi Woddikie Gootti Baabilooni'i balleesso'a hasemmaxxe'e;

Meedoonika moyanjuwwa ke'ise'en;

Duuchchi Woddiki Gootti halo fulaan;

galmi isikxxe'e halo fulaani.

12 Baabiloonike kinjiinke dallaa'a'n beesisa otte!

Jabaatine heqqe;

Heqqaaka manna ugge;

riphphe lolaaka lolnka manna qophpheesse;

Duuchchi Woddiki Gootti Baabiloonke arda'n;

asso'a mureemmaka yaada muuxxo'aateni.

13 Ati lumollamma galaanuwwi qarqara hexxaattexxi;

tee karrati duroondettexxe;

Kutendattoxxi yanna dagee'eni;

ba'netina ati'a shiqe'eni.✝

14 Lumoki Duuchchi Woddiki Gootti ifi'ani hiyye kakatee qici;

awwaneessiinke bobba'ishsha laakkossi bira sa'eeki loliinki manni boga atike'ni wo'maani;

insa'nenna atee injiffatati ate'ni geerarraani.

15 «Duuchchi Woodiki Gootti butta ifixxe hunnanni giisseek,

butta beekkumi ifikenni dade;

iimuwwatanna ege'na ifixeni dhise dadeeki isoteni.

16 Isiki hafuuri dindimaa wodda iima hedheeki wodi'uwwi luulaan;

isi duumancha buttatixxe gabalanaa'n iimi'a fulaashsha assaani;

Xeeniki weltinna banqo gansisaani;

diidallo tulemake minenaa'n fulchaani.

17 «Mitti mittngi manji gowwakenna ege'na afebaakeni;

worqe baqise giissammaki duuchchi giissemmaxxe magenooffantammaxxe fakkuwwaxxe shooke'eni;

Qunqumme giisseexxi fakkuwwa toliinxeni;

hafuurakanna afebaani.

18 Kunnichchuwwi toliinke roorrotike miyiwwan;

murte insa'ne'n murro'a dagaa wodda ba'naanni.

19 Ya'iqoobik Magen kinni konnechchuwwishshatebaan;

isi duuchchingeechcho dadeeken;

Isra'eelxi gosanna isike geegonni;

summi isikinna lumoke Duuchchi Woddike Goottani.

20 «Tee Baabilon! Ati anke burrisanna,

anke loolnke miyyaan;

Ati darree'n gosa gosaka arda bulleessannoni;

ati darree'n moyanjuwa birannoni;

21 Ati darree'n fadhadokanna fadhdoo gulfemmakaranna bulleessannoni;

ati darree'n fadhadixxa gaarruwwanna oofammaka bulleessannoni.

22 Ati darree'n melaallenna labballo;

geedhetanna dargaggeyye;

ati darree'n qee'lonna dubbarra bulleessaannoni.

23 Ati darre'n allalisanjokanna hore

ati darre'n hiislokanna qoxxiyyo,

atidarre'n galchalluwwakanna ja'laqabuwwa balleessannon.

24 «Tsiyooni'ni geessinsemmaxxe balleessa duuchchi'a; Baabilooni'anna Baabilooni'ni hedhaa'neeke duuchchi'a; ille ha'nooxxi uuda'naani insa'neeka hira ani uwwannon» hiyya'neen Duuchchi Woddiki Gootti.

25 «Tee boga duuchcha balleessiteettaxxee;

tee balleessanjo kooba, ani ate'ni ka'lee ke'eennen»

hiyya'neen Duuchchi Woddiki Gootti;

«Anga anxa ate'ni ke'issaannen;

bowwa'akenaa'ni ate'e butti'a goggo'mishannon;

gubateexxe koobashsha ate'e assannon.

26 Atenaa'n dhaaddote'e kadaaki kinji

boosoteena kadaak kinji afemabaan;

ati duuchchii woddi'a urma kaddatton;»

hiyya'neen Duuchchi Woddiki Gootti.

27 «Boga duuchcha'ni beessisiinka baandira iimi'a ke'isse!

Gosa gosake ardixxe oddo'ni malagata ufuuffe!

Gosa gosak arduwwi Baabilooni'i lolaashsha qophpheesedhe;

Araaratika, Minaanikanna Ashikenaazika moyanjuwwa,

yexxinexxi ookkoni bukki asse;

Loliinka manna ajajaaka ajajalluwwa ise'ni baallonse;

fadhaduwwakanna awwaanesiinke haaganishsha, ookko'a wocci asse.

28 Meedoonika moyanjuwwa,

galchalluwwakanna ja'laabuwa duuchcha,

Galcha insa'nexxi hunda hedheeka boga duuchcha,

konne gosa gosaka arda Baabiloonii'i lolo'a qophpheesse.

29 Manji ookko hedha dande'abaa qico'ni,

Baabiloonika boga urma asso'a,

Duuchchi Woddiki Gootti Baabilooni'ni hedemmaxxa muuxammaxxee,

butta girgiri hitaan; le'mitaan.

30 Baabiloonik loliinki manni lola waaleen;

ifixxe jabaxxe kollo giddo ofo'ledheen;

Hunna insa'exxi xo'oteen;

melaalletishsha kandeen;

Galduma insa'neke'ni giira worende'e;

insa'neke dalla'ixxe hulaka danqarsanjuwwi enqineen.

31 Qachchi duuchchi abidemmeexxa,

Baabiloonke moyanjo'ni kulatee'e,

Mitti odichchi wele odichcha'n,

mitti erganji wele erganjo'ni kuloi'a gongaan.

32 Naaphink sannaichchi galaana foonfammaba abideexxi

heqanjuwwiinka golli gubemeexxa

Baabiloonik moyanjuwwinna alayye culphisseexxa ise'n kullo'a gonginaan» hiyye.

33 Isira'eelik lumok Duuchchi Woddik Gootti Magen hiyya'nee qici,

«Baabiloonixxi meyyaxxi belto

midha uxxatixxi aldumene;

isexxe mayetik aganjinna rakee geyaan.»

34 «Baabiloonik moyanji Naabukadanatsoor no'o iteen;

butuchche no'oo bire; duwwike waabishsh no'o asse;

Jawwetishshanna no'o liqiinse;

xe'maalchishsha no'o ite godoba wonshedhe;

ookkonechchi uduma aakkiyye no'oo tufe.

35 Tsiyooni hedhammakir hiyyaa qici,

«No'o'ni gelteemmaxxi fuggoxxi Baabilooni'ni geltowwaal,»

Iyyerusaaleminna,

«No'ooxxi munde Baabiloonike boga'ni hedha'neekara daaffuun,» hitaan.

36 Tennexxe Duuchchi Woddiki Gootti hiyya'nee qici:

«Kunse ani ati'a baasannon;

halo atixxanna aninni fulannon;

Abbaayatanna bassannon;

muummuwwa isexxanna xo'oo assannon.

37 Baabilooni'ni oletixxe tuulo,

jeedaluwwi burraaqabaan,

Alayyiinxenna oso'lematike beessisa kaddaan;

ayyinna ookko hedhabaan.

38 Baabiloonik ardi duuchchi geyeeke neenqiinsha baroodaan;

oosichchi neeqishshanna gurura'aan.

Qonqo insa'nexxi baggaa wodda,

itatixxa jila insa'ne'a qophpheessannon;

machchoonnaashsha assennexxi.

39 Oso'la'ni gammanda'ni,

duuchchii woddi'a dammanqabaaka diipho diinphaan»

hiyya'neen Duuchchi Woddiki Gootti.

40 «Gedhebiinke buruusishshanna,

re'etixxe korbeeyyeshsha gedhebiinxe korbeyyeshsha,

duuliinbaa adhdhine me'inaashsha assannon.

41 «Shiishaaki hitta booji'ende!

Iitta boga duuchcha'n saadedeexxi, hitta abidendee!

Baabilooni gosa gosake arda duuchcha'ni,

hittee qico bajabaja assitaaxxi kadde.

42 Abbaayya Baabilooni'n hana yaataan;

danbala'ikinna ganema'ni buqaan.

43 Qachchuwwikinna manji giddo hedhabaake,

wili manjinna hedhabaake,

Bagoke qiilla gammoojje booncho,

uruma boganna kadaan.

44 Beeli'i Baabilooni giddo xixannon;

itemaalchonna honqoshshannon;

Gosa gosak ardi konnechchinn edi'aa isibaa yaa'abaan;

Baabiloonik kinjiink dalla'i fottoqaan.

45 «Koo, anke ardaa! Ookkoo'n fulle!

Lubbo ha'nooxxa gatilse!

Eettene sodaachchissaaxxe Duuchchi Woddike Goottixxe mufenaa'ni baajiine fulle.

46 Odo bogake'ni laqendaa wodda,

godoba guggudhitine hooddinoqqe'e;

Moyanji mitti weleke'n ke'asixxa,

jallo bogake'ni hexxaamaxxe'e

karinno mitte odo; dagaasanenna welennxe daggaan.

47 Baabiloon magenooffatammaxxa fakkuwwa xixanoxxa yanna,

dhugaandinni daggaan.

Bogi isik duuchchi salphataan;

gorraannek duuchchi bogi iseki giddo ibbaan.

48 Iimanna butta ise giddo hedheelchi duuchchi,

Baabilooni'ni ilili hiyyaan;

Balleessanjuwwi middii'ni fuleexxi

isee lolaan;»

hiyya'neen Duuchchi Woddik Gootti.✝

49 «Boga duuchcha'ni gorra'emmeeki duuchchi,

Baabiloonixxe buutonni inbeexxa,

Baabilooninna Isira'eel giddo gorra'emeemakixxe, buutoxxe iba isi'a hasisaan.✝

50 Wolaantichchokenaa'n baajjinekee,

me'wee! Yanna tola gubbinoqqe'e;

Bayyi boga'ni hexxineer Duuchchi Woddika Gootta qaabbatte;

Iyyerusaalemii'i kassi hiyye.»

51 «Wele bogik mannni ookkone woyyichchake kadeeke,

Duuchchi Woddike Goottike mine'ni e'yineenmmaxxee,

no'o yowwemmeennen

Shoonke hangullu hineennen;

salphantee luggineennen.»

52 «Yoona Baabiloon magenooffatammaxxa fakkuwwa xixannoki bari dagaan;»

hiyya'neen Duuchchi Woddiki Gootti;

«Baabiloonke boga duuchcha'ni

mado'eeki manni aadaan.

53 Baabiloon iimi'a fuldoolenna,

qeerraka kinjiinka dalla'a jabeessexxe ijaadhdhitoolenna,

ise'e balleessaaka manna ookko'a ergannon;»

hiyya'neen Duuchchi Woddiki Gootti.

54 «Baabiloonixxe raarenaa'ni,

Baabiloonke mannike boganaa'ni,

jabaxxe ba'neki hafuuri laqemaan.

55 Duuchchi Woddiki Gootti Baabiloonii'i balleessaan;

jabaxxa isexxa raarenna sammi assaan.

Abbaayyatike danbala'ishsha dhuqataakki sannachchi,

dedhange'nni Baabiloonibaa geyeexxi raare dhanga ganaan.

56 Baabilooni'i lole balleessaaki dagaan;

loliinka mannanna boojinaan;

gabe insa'nexxinna enqendaan;

Duuchchi Woddiki Gootti fuggoxxe'ni halo fulaake,

hasissaaxxa duuchcha hira uwwaake Magenon.

57 Jalqabuwwa isekanna beekkole,

galchalluwwakanna ja'laabuwwa, loliinka iseka manna ha'wisse machchoossannon;

Duuchchii woddi'aanna diinphaan dammanqabaan,»

hiyya'neen summi isik dada duuchcha ajajaake Duuchchi Woddike Gooatta Mageno kadeeki moyanji.

58 Lumoki Duuchchi Woddiki Gootti hiyya'nee qici:

«Ba'laki Baabiloonik kinjiinki dalla'i diigeme olete kadaan;

qeerraramma dalla'ixxi huluwwa giirati gubattaan;

Ardiinxi elo tolange gattaan;

gosa gosaki arduwwi elo'emmaxxi elo duuchcha giira itte birtaan» hiyye.

59 Yihudaki moyanji Sedeqiyaasi moyeexxe tommenna sholgaxxe wogga'ni, moyanjiinxa baxxe e'ya kutaammaki Maahiseyaaki akka'i Neeryaki belti Seraaya moyanjik welti Baabilooni'a me'ee wodda, raagichchi Ermiyaasi ergeexxe ergan. 60 Ermiyaasi Baabiloonixxee borreesse uggeexxa duuchcha, Baabilooni'ni dagga'neexxe ba'ne duuchchi'a mirqisanjoke'ni hana borreesseen: 61 Isinna Seraayaa'ni hiyyee qici, «Baabiloonii'i geltetteshshann, konnee hiyyichcho duuchcha qonqo gikki assitte haasessa deetoxxe'e, 62 Hitatoo qici; ‹Koo, Duuchchi Woddike Gootta: konnee booncho manjikinna kado hori biniinchi hedhabaa qico'ni duuchchii woddi'a urma kadde gattattoshsha assannon hiteettan.› 63 Konne mirqisanjo haasesite birtetelchi uduma, kinoti usurte Efiraaxisike galaani giddi'a darbitexxi. 64 Ookkonechchi uduma hitattoo qici, ‹Baabilooninna ani ise'ni geessisannoxxe ba'nenaa'ni kexeexxa, iitan liqiinsedaan; ta'inni udumi'a kexxabaan; ardi kinni ibaan.› »

Ermiyaasiki hiyyichchi konnon muuxemeen.✝