1 Baabilooinike moyanjike heqqanjuwwik ajajalli Nabuzardaani anee'e Ermiyaasii'i Iyyerusaalemi'ninna Yihudii'ni Baabiloonibaa booji'eme me'emmake manni duuchchi giddo Raama haachchabik usuremee'na'a afeexxi tikise; ookkonechchi uduma Duuchchi Woddiki Goottik hiyyichchi ane'n dage. 2 Mootummatike mine heqqanjuwwi ajajalli anee qofinni aadhe me'exxi hiyyee qici, «Duuchchi Woddiki Gootti atiki Mageni konne boga'n tinne ba'ne geltaaxxa haaso'een. 3 Duuchchi Woddiki Goottinna tenneen idage; haaso'emmashshanni asse. Tinni duuchchi kaddeelchi ha'no Duuchchi Woddike Gootta'n cubbo hujjinemmaxxeenna isi'a ajajema gophphinemmaxxeeteni. 4 Kunse telcho aniga atixxenna'n haachchaba tikeene; eetotole aninni welti Baabilooni'a dage'naa ati'a hasisaaxxa assanon; gibbotole kinni daggoxxe; bogi duuchchi anga atixxe'n hedhemmaxxe'e eeteteba'a me'i» hiyye. 5 Ani hiisichcho uwwebe'nong Naabuzeredaan lebeexxi, «Baabiloonik moyanji Yihudaka qachchuwwa galchaasa hariiremake Saafaanike aka'o Ahiqaamika belto Gadaliyaasiba'a illeema hige; isinni welti ardiinxe oddo'ni ofo'li; yookaan ani'a elaan hitato boonchiba'a me'i» hiyye. Ookkoneechchi uduma heqqanjuwwink ajajalli gala'atakanna uwwa ani'a uwweexxi me'annoshsha asse. 6 Aninna Ahiqaamik belti Gadaliyaasi hedheeba Mitsiphaa me'ennexxi isinni welti bogi giddo gatemmake ardi giddo ofo'lenne.

7 Yihudik, Baabilooni'a boji'emebaak ja'laabuwwinna loliinki manni duuchchi, Baabilooni'a booji'emebaake bogi giddo gateeka hiyyeessa labballo, melaallenna oose'e moye galcho'a Baabiloonik moyanji Ahiqaamika belto Godoliyaasi'i hariire baalle uwweexxa lanqe; 8 tennexxee Nataaniyaak belti Isimaa'eeli, Qaareehaxxi labbaxxi oose Yohaanaaninna Yoonaataani, Tanihuumeetiki belti Seraaya, Nexofawichcho Eefaayixxi labbaxxi oose, Maa'ikamichiink belti Yazaanyaani inasa'neke manni duuchchinni welti Mitsiphaa Gadaliyaasiba marre. 9 Safaaniki aka'i Ahiqaamik belti Godoliyaasi kakateexxi insa'neninna insa'neke manna'n hiyye, «Baabiloonike manni'a hunda gala sodaatinnoqqe; ookkone bogi giddo ofoldine'e Baabiloonike moyanji'a ergattemme; yaane ha'no'a eldaan.✝ 10 Ani umi anigennin no'ooba daga'neeke Baabiloonke mannike moyanji edo ha'no'a uurronnaa, Mitsiphaa ofo'lannon; ha'no kinni woyine, ejersiinxa zayite, wele hiddichchuwwiixxa gumma hucce; assexxinamake mi'yuwwi giddonna tuu'le; abixxitine'e abixitinemmange qachchuwwa'n ofo'le» hiyye. 11 Mo'aabike, Amoonike, Eedoomikenna wele boguwwa duuchcha'ni hedhemmak Yihudiink manni duuchchi, Baabiloonik moyanji manna Yihudake boga'ni gatiseexxanna insa'ne'e galcho'a Saalfika aka'o Ahiqaamik belto Godoliyaasi harireexxa lanqe. 12 Tennexxee Duuchchiing xexxeeremme he'nammake bogi duuchchi'naa'n Yihudake bogibaa illeema hinge; Mitsiphaa hedheeke Godoliyaasiba'a dange; woyinetanna wele hiddichchuwwixxa gumma yo'oshsha assine tuulle.

13 Qaareyaamik belti Yohaanaaninna anga Baabilooni'a uwweemmabaak loliink ja'laabuwwi duuchchi Mitsiphaa Godoliyaasiba'a dageexxi, 14 «Amoonike mannik moyanji Ba'aalisi atee'e shiyo'a Naataaniyaka belto Isimaa'eelii ergeexxa egendebexxoo?» hine qorre. Ahiqaamik belti Godoliyaasi kinni hineexxa adhdha gibe. 15 Qaareehak belti Yohaanaani, «Ayyinna ege'nebaang Naataaniyaka belto Isimaa'elii mare shiyo; baaje atiba'a dageek Yihudiink manni xexxeeremashsha, Yihudi giddo gateekinna ba'aashsha mayee'e atee shiya?» hiyyeexxi Mitsiphaa Godoliyaasi'n sho'ik kule. 16 Ahiqaamik belti Godoliyaasi kinni Qaareehaka belto Yohaanaani'i «Ati Isimaa'eeli'i uuddaaxxen haasota'etexxi duuchchi dhugaate kadda gophphemmaxxe tenne yaane assitoxxe'e» hiyye.