1 Duuchchi Woddik Gootti Baabiloonixxenna Baabiloiniike bogixxe'e; waabeekichcho Ermiyaasi hiyye haaso'ee qici:✝

2 «Gosa gasake arda duuchchixxe oddo'ni haaso'e,

ege'nishshe beesisnka baandira iimi'a abidinexxi lallabbe;

Haranga mittelchonna gatissinebaang hitinaa qici,

‹Baabiloon abidenda'neen;

Beeli salphataan;

Marduuki weekeman;

Fakkuwwa salphattaan;

magenoofantammalchchuwwiri weekemaan.›

3 Middii'ni moyanji dage lolaan;

bogakanna urumake assaan;

Ookko hedhaaki hedhabaan manjinna horuwwi baqate luggaan.

4 «Ookkone baro'ni; eettene yanna'ninna»

hiyya'neen Duuchchi Woddiki Gootti.

«Isira'eelik ardinna Yihudiink ardi mitteba dagaan

Insa'neeka Duuchchi Woddika Gootta Mageno harsinaa'ni oo'na'ni dangaan.

5 Tsiyooni'i geessisaka ora qo'dhdhinaan;

ookkone ora me'inaan.

Dangeexxi hara dedhendabaaxxa,

duuchchi woddixxe kakonni,

Duuchchi Woddike Goottin welti mittoommaan.

6 «Ardi anki ba'eke gedhebo kadeen;

insa'neexxi lallalisano insa'ne dedhiseen;

koobuwwate'ni xeeremme ba'naashsha assine koobate'n;

Tulluchchuwwake'n doonsakiyya hine;

goodhe ifixxanna dedheen.

7 Futti hiyyeechchi insa'nee itaan;

naaphuwwi insa'nek, ‹No'o belleessanotbaan; insa'ne edike annuwwi;

Insa'nekixxa adde Duuchchi Woddika Gootta;

dhugaatike insa'neke galduma kadee'eka; Duuchchi Woddika Gootta balleesine'en› ha'no hiyye.

8 «Baabilooni'ni baajine;

Baabilonke mannika boga waale;

hori edo me'aammake recco kadde.✝

9 Jajjaba gosa gosake moyanjuwinka orga;

middii'ni Baabiloni'ni ke'isanon;

Insa'nenna Baabilooni'n duulan danigeexxi abidaan,

insa'nenna ise'ni duullaani;

Gabuwwa insa'nexxi duwwixxe anganni higgabaasha;

tola higgaamasha adhe barateke loliinke mannishshaten.

10 Baabilooni bogi saamemaan;

saamammaki alfeechcho duuchcha geyaaqico'ni adhdhaan»

hiyya'nen Duuchchi Woddiki Gootti.

11 «Ha'no karra anxa saandineeki;

gammadineexxenna ililissinemmaxxe'e;

Diidake'ni burraaqqammake goronsishsha;

kormi fadhachchisha himimmisinemmaxxe'e;

12 Ama ho'nooxxi yo'oshsha shookan;

ha'no ildemmaxxinna salphattaan.

Isenna qiila gammooje'ni; bagoke boginna umoke'na;

gosa gosake moyanjuwwa duuchchana'ni shiixexxeexxe kaddan.

13 Duuchchi Woddike Goottixxe mufenaa'ni kexxeexxa urumake kaddaa malee'e;

ookko'o ayyinna hedhabaan;

Baabiloon'ni gelteexxe ba'ne duuchchixxe buuto'a;

ooko'ni sa'aki duuchchi mambe'a hiyya'ni cooraan.

14 «Ha'no gabe darbatinake duuchchi;

Baabiloonii'i elqe kayyii'n buqqe;

Mogiduwwa duuchcha gatissinebaang darbe;

Duuchchi Woddike Gootti edo cubbo hujjeemmaxxeeten.

15 Erqe kayyii'ninn Baabilooni'ni raarre!

Anga uutaan kinjiinki dalla'uwwinna ibaan;

dalla'uwikinna diigeman.

Tinni Duuchchi Woddiki Gootti halo fula'neexxen;

Baabiloni'ni halo fulle;

wele manna'ni assitemmashshanni ha'noonna Baabilooni'n asse.

16 Baabilooni'ni midha facaasaka;

haamatixxe yanna'ni haanto abixxe haamamaka birre;

Balleessake wolaantichanaa'ni kexxeexxa;

mitti mitting ifi ifike ardiba higowaali;

ifi ifike bogiba'a baajjowwaal.

17 «Isira'eeli neenquwwi shorreeke;

xexxeeremeke hornke bobba'an;

Taakaba Asoorik moyanji;

ninnife iteeni;

Okkoneechchi uduma Baabiloonik moyanji Naabukadanatsoor;

micco anniise.»

18 Tennexxee Dada Duuchcha ajajaak Duuchchi woddiki Gootti Isira'eelik Mageni hiyya'nee qici:

«Asoorika moyanjo xixenneshshanni

Baabiloonika moyanjonna boga isika xixaannon.

19 Isira'eelinna bobbaalsinaba'a hiissannon;

Qeermeeloosi'ninna Baasani'a bobba'an;

Efreemixxe kooba'ninna Gele'adi'n

goddaqico'ni itaan.

20 Ettenne yannana'ninna ookkone baro'ni,» hiyya'neen Duuchchi Woddik Gootti,

«Isira'eelixxenna Yihudaxxe mootumma giddii'ni,

Hafe gattaashsha asseenneke mannixxa,

cubbo gattowwaal hiyyaannaxxe'e,

Cubbonna balleessa insa'ne'ni hanse anfabaan.

Hiyya'neen Duuchchi Woddik Gootti.

21 «Miratayiimka boga,

Feqoodi giddo he'na'neeka,

Shoorishshe, insa'ne'e shiltine birre, bakka insa'nexxa balleese,»

hiyya'neni Duuchchi Woddiki Gootti.

«Ani ha'noo ajajennexxa duuchcha asse.

22 Bogake'n loliinki cancci,

jabaaxxe ba'neki haafuri laqeme.

23 Bogi duuchchiki burrisi,

hitta enqeme! Hitta kade bullo'e!

Gosa gosake ardi giddo;

Baabiloon hitta kade urimake kade!

24 Tee, Baabiloon! Fonxoro ati'a fayyenneni,

atina egendebexxongi abidendeeteni;

Duuchchi Woddike Gootta'n fugoxxini kexxe;

afeendetaxxe, abidendeeteni.

25 Duuchchi Woddiki Gootti mi'yinka mine bane'en;

mufetika lolinka miya fulche'en;

Lumoki Duuchchi Woddilki Gootti;

Baabiloonke baga'ni hujete afe'en.

26 Bayyii'ni daggine Baabilooni'ni duule;

doone midha aase'nammaxxa banne;

midha tuullammashsha tuulle.

Hara kutti assitine birre

iseelchi mittilchinna gatoqqe'e.

27 Dullammabaa'a iyyemartine'e!

Iseka jiboota duuchcha dulle;

Xixxichcho adhdhinaaxxi yanna,

barra insa'nexxi gelteemaxxe'e insa'ne'a aane!

28 Duuchchi Woddiki Gootti no'ok Mageni halo fulemmaka;

galma ifike fulemmaxxa halo;

Baabilooni'n booji'eme dagemmakinna shorremeemmakir,

Tsiyooni'i haasonna'neexxa laqe.

29 «Gabe darbatamakar,

gabetika manna duuchcha Baabilooni'a ye'we;

Mitti manjinna baaje fulabaasha;

ookone qarqara duuchchanna erqe kayyi'ni buqqe;

Isira'eelika Woyyichcha;

Duuchchi Woddika Gootta tuffatemmaxxe'e;

Huje isexxishshann ise'a bado hiise;

weleke'ni assitemmashshann ise'ninna asse.✝

30 Tennexxee labbaxxi isexxi dargaggeeyye weldeenna weldeenade'ni ibbaan;

eettenee barra loliink manni duuchchi ibaan,»

hiyya'neen Duuchchi Woddiki Gootti.

31 «Koo hollaameesi; kunse ate'ni ke'eennen,»

hiyya'neen lumoki Duuchchi Woddiki Gootti,

«Ati xixxichcho adhitatoxxi yanna; barra atixxi gelte'een.

32 Hollaamesi guggufate ibaan

iso'o ke'isaakinna hedhebaan;

Qarqara isike'ni hedheeka duuchcha ittaaxxi giira

qachchuwwi giddii'ni ke'issannon.»

33 Lumoki Duuchchi Woddiki Gootti hiyya'nee qici:

«Isira'eelikinna Yihudaki ardi miiceme'een;

Insa'ne booje'emaki duuchchi goggodo insa'ne'n godhateen;

wocci assinabo'non hiyye gibeen.

34 Yaane kinni insa'ne'e gargaara'nik hunnaameessaken;

summi isikinna lumoke Duuchchi Woddike Goottan.

Boga insa'neeke'e hafuura adhdhiso'a

jabaqicin insa'ne'a baasan;

Baabiloon hedha'neekiir kinn nage'a alfinabaan.

35 «Wolaantichchi Baabiloonike arda'ni dage»

hiyya'neen Duuchchi Woddiki Gootti.

«Baabilooni hedha'neeke arda'n ja'laabuwwa insa'neke'inna beekole insa'nexe'n wolaanti ke'owaal!

36 Dhariyye wabeekoole'n wolaantchchi dage;

insa'nenna gowwolete kandaani;

Insa'neke lolinke manna'ni wolaantichcha wirri assine;

insa'nena sodaante culphphinsaani.

37 Wolaantichchi fadhdhaduwwake'ninna gaaruwate'ni,

insa'ne giddo hedheke alaga magenuwik lolinke manna duuchcha'n dage!

Insa'nenna melaalletishsha kandaani;

wolaantichchi karra insa'neexxe'n dage! Karra insa'neexxina saamendaani.

38 Bogi soda'ati weekemake magenuwini,

magenoffantammaxxe fakuwwani wo'memaxxe'e;

galaanuwwi iseki bagowwaali.

39 «Tennexxee qiilla gammoojjeke binniichkenna worraabeesi aagaaba,

urungotinna galdaaba kadaani.

Konnechchinni edi'a ayyina oko'o hedhabaani

ilatenaa'ni ilati qico'n okko ofo'laaki afemabaani.✝

40 Mageni Soodoominna Gomoraa'a;

qarqara insa'neeke'n hedheeka qachchuwwa mitti manjinna hedhabaake assemashshani,»

hiyya'neni Duuchchi Woddiki Gootti.

«Itaanni okko'o ayyinna hedhdhabaani,

okko'o ofo'lakina afemabaani.✝

41 «Kunniseten loliinki mann middii'ni daga'neeni;

mitti jabaki moyanjina gosa gosaki moyanjuwi;

bogiinxe gabalanaa'n ke'eeni.

42 Gabetanna bagedo abxxineeni;

mararte afebaakenna godoba jabake mannani

Fadhado gulunfe danga wodda;

haafuri insa'neki abayatike danbala'ishshateni.

Tee Baabiloonxe belto!

Atee lolo'a qophpheeffateeki loliink manni atiba'a daga'neeni.

43 Baabiloonik moyanji insa'ne danga'neexxa laqqee wodda;

anga isixxi gogge gatteen;

Yaade wixxirri hiyye;

ciniifattammaxxe manjichchoshsha rakkateni.

44 Yordaanoosi gongomi giddii'n neenqi dedhanga fule'e

bada'a qufeeke didiba'a dagamashsha;

Aninna Baabilooni keekkattebaangi boga isekenaa'n isee shoorrannoni;

ani fi'leneka isse galchcho'a harriirannoni;

Aninni herregemaaki ayyete?

Anee mayee iitta assitette hiyyaaki hedhdhee?

Hoone alalisanjo anee hoyya dande'aki?»

45 Tennexxee Duuchchi Woddiki Gootti Baabilooni'a mari'atexxa,

Baabiloonike bogi'a hedeexxa laqqe;

Horriinke bobbaasuma'n beltanna harikkinse adhdhinaani;

insa'neexxe buutonni ala'linaammaba hara ballesaani.

46 Baabiloonxe abidenshaxxi odo laqendaa wodda buttini lele'maan;

isexxi raarenna gosa gosake arda'n laqendaani.