1 Yihudak moyanji Iyyosiyaasik belti Iyyo'aaqemi moyeexxe sholgaxxe wogga'n, tinninna Baabiloonke moyanjo Naabukadanatsoori moyeexxe siretixxe wogga'n, duuchinge Yihudake ardixxee'e Duuchchi Woddike Goottik hiyyichchi Ermiyaasiba'a dage.✝ 2 Tennexxee wabeekichchi Eermiyaas Yihudake arda duuchcha'ninna Iyyerusaalemi hedha'neeke duuchcha'n hiyye haaso'ee qici, 3 Yihudak moyanji Amoonik belti Iyyosiyaasi moyeexxe tommenna sakkeessoxxe wogganaa'n telchi qico'n lame tommenna sase wogga duuchcha, Duuchchi Woddike Goottik hiyyichchi aniba'a dageen, aninna lebe lebe'e ha'noo'n kulennee; ha'no kinni laqqinebaan.

4 Duuchchi Woddiki Gootti raagole ifixxa erganjuwwa duuchcha lebe lebe'e ha'nobaa ergeen; kaddo malee'e ha'no caqassinebaan; qalbeeffatinebaan. 5 Insa'nenna «Ha'no mitti mitting elobaake oranaa'ninna elobaaxxe hujenaa'n higge; Duuchchi Woddiki Gootti ha'no'anna ha'noke annuwwi'a uwwemmake boga'n duuchchi woddi'a hexxinaan. 6 Wele magenuwwa hordofina'n magenooffattinoqqe; anga ha'noxxi hujjeechchininna anee'e mufachchisinoqqe; aninna ha'noo'n elobaaxxa assabe'non» hine.

7 «Yaane kinn ani hiyyaannexxa laqinebaan» hiyya'neen Duuchchi Woddiki Gootti «Anga ha'noxxi hujjeechchini anee'e mufachchiissine; ifi'ninni fuggoxxa iyyedaqqitine.»

8 Tennexxee Lumok Duuchchi Woddik Gootti hiyya'neeqic: «Ha'no hiyyichcho anka caqasa gophphinemmaxxe'e, 9 middika arda duuchchanna, erganjo anka Baabiloonika moyanjo Naabukadanatsoorii ye'annon» hiyya'neen Duuchchi Woddik Gootti, insa'nenna, «konne boga'n isi giddo hedheeke arda'ninna, qarqarake'ni hedheeke arda duuchcha'n iyyedagennexxi ijje insa'nexxa balleessannon; diqatemmashshanna gacifatemmaashsha, duuchchi woddi'a insa'ne'e onake assannon. 10 Gammadikinna illilleettetik cuqqeessi, waajubichchinkinna wajubichchotiki cuqqeessi, daamink cuqqeessinna xassiink ifi hedhabaashsha assannon.✝ 11 Bogi duuchchi one duwwike kadaan; kunni gosa gosak arduwwinna torbaane tomme wogga Baabiloonike moyanji hunda galaan.✝

12 «Yaane tinni torbaane tomme wogga muuxendeechchi uduma, Baabiloonika moyanjonna isika arda, Baabiloonike mannika boga Baabiloonike mannixxe balleessaxxe'e xixannon,» hiyya'neen Duuchchi Woddik Gootti., «Baabloonika boganna duuchchi woddi'a onake assannon. 13 Ani konne boga'n iyyedagonna'a haaso'ennexxa duuchcha, tinninna konne maxaafa'n borreessendeexxa Ermiyaasi gosa gosake arda duuchcha'n haaso'emmaxxa wabeekkumma konne bogake'n kaddaashsha assannon. 14 Insa'ne'e umo insa'negenninni heddo gosa gosake arduwwi'anna lumollamma moyanjuwwi'a garba kandaan; huje insa'nexxishshanni hira insa'ne'a uwwannon.»

15 Duuchchi Woddiki Gootti Isira'eelik Magen anee'e hiyyeeqic: «Ank mufetik bulbul wo'meexxa buuda anxe anganaa'n aaxxe'e ani atee'e ergannoke gosa gosake ardiba'a marete insa'ne'n ha'wisi. 16 Ha'winaawodda gatantarraan; bagedo insa'ne giddo ke'issannaxxeenna maraantaan.»

17 Tennexxee tennee buuda Duuchchi Woddike Goottixxe angaa'n aadhennexxi isi ergemmake gosa gosake ardiba'a marennexxi ise'ne ha'winaashsha assenne. 18 Iyyerusaaleminna Yihudak qachchuwwi, isik moyanjuwwinna isik ja'laabuwwi telcho kadeeshsha onakenna manjo diqachchiisaake gacifatemakenna badinemeeke kadaashsha 19 Gibtseeka mayanjo, isika erganjuwwa, isika ja'laabuwwanna isika arda duuchcha, 20 Ookko hedha'neeka anaffeeke bogika manna duuchcha, Tsoosike bogika moyanjuwwa duuchcha, Filisixeemike bogika moyanjuwwa duuchcha, Asiqeloonake qachchika, Gaazaka, Aqaroonikinna Ashidoodi giddo hafe gateek arda, 21 Eedoomi, Mo'aabi, Amooni, 22 Xiroosikanna Sidoonaka moyanjuwwa duuchcha, abbaayyati wido hedheeke bogi duuchchika moyanjuwwa, 23 Dedaanika, Teemaaka, Buuzika, umo ifika qooxxo haaxaka arda duuchcha, 24 Arabika moyanjuwwa duuchchinna, qiilla gammoojje giddo hedha'neeke mako ardika moyanjuwwa duuchcha, 25 Zemirka Elaamikanna Meedoonika moyanjuwwa duuchcha, 26 shiqikenna* bayyike middika moyanjuwwa duuchcha lebe buttate'n hedheeka moyanjuwwa duuchcha buuda tenne giddii'n ha'wisse; konneer duuchchi uduma Shiishaakik moyanji ha'waan.

27 «Okkonechi uduma insa'ne'n hite haasottattoqic, ‹Lumok Duuchchi Woddiki Gootti Isira'eelik Magen hiyya'neeqic: bagedo ha'no'n ergaannaxxee'e ha'we, machcho'we, honqo'we; kexxinabaaqico'ninna ibbe.› 28 Yaane kinn insa'nee atixxe anganaa'ni buuda aa'neexxi ha'wa ginboole, ‹Lumok Duuchchi Woddik Gootti hiyya'neeqi: eetinebang ha'witinaan! 29 Kunniseten summa ankenn ye'ema'neeke qachcha'n balleessa afeennaxxe'e ha'no xixebe'nok gattinaachcho labbee? Ani buttate'n hedheeke duuchchi hana bagedo ye'a'ennaxxe'e xixendinebaak gatinabaan, hiyya'neen Lumok Duuchchi Woddiki Gootti hiyyi.›

30 «Koo Ermiyaas konnechchinni butti'a hedheeka hiyyicho duuchcha insa'ne'n raagaa raagge'e hitattoqic:

« ‹Duuchchi Woddiki Gootti iima hedhe'e harqaan;

woyyichcha ifike galdumanaa'ninna dindimaan;

ifike boga'ininna jbaqqicinn dindimaan;

Woyinetika bulbuloke miicammak mannikishsha

buttate'n hedha'neeke duuchcha'n ifika jabaka hafuura laqisaan.

31 Duuchchi Woddiki Gootti gosa gosake arda xixaaxxa yanna

isike jabake hafuurik aadigalii buttatixxe gabalaqico'n laqisaan;

Isi manjinke belto duuchcha'n muraan;

fuggaaleyyetanna bagedokee uwwaan› hiyyi»

hiyya'nen Duuchchi Woddik Gootti.

32 Lumok Duuchchi Woddiki Gootti hiyya'neeqic,

«Kunnise,

ba'ne mitte gosake ardibaan mitte gosakiba'a saxxa'n daggeen;

Jabaxxi hobonbalte

buttatixxe gabalanaa'n kexxeen»

33 Eettenne yanna'n Duuchchi Woddik Gootti shiyeeke mannik renshi buttatike kasinaa'n buttatike kasiqico'n leellaan; koriinsha buttinake'n hunemaa malee, insa'ne'a oodhaak hedhebaan; rensha insa'nekinna bukki assemabaan, moogemabaan.

34 Ha'no allalisano, hiiqqissine oodhdhe;

ha'no ardiink akeekisajuwwi bululoke'n gangalatte;

Gorra'endinaaxxi barra geltemmaxxee

waatinke fiixa miyishsha ibbine buttutinaan.

35 Allalisano baajaabi,

akeekisano ardinxi miliqqe fuldaaxxi bakka hexxabaan.

36 Duuchchi Woddik Gootti insa'nexxa boba'inxa bakka balleessemmaxxe'e,

allalisanotixxa oodhishsha,

ardike akeekisanjixxa yiikkette laqqe.

37 Duuchchi Woddike Goottixxe jabaxxe mufenaa'n kexxeexxa,

naageelichchi insa'nek bogi onee gataan.

38 Isi neenqinsha galamabaa'n fule'een;

miicammake mannike bagedinaa'ninna,

Isixxe jabaxxe mufenaa'n kexxeexxa,

bogi insa'nek one gataan.