1 «Koo Isira'eelike arda; higgettele,

anibaa higgetele,»

hiyya'neen Duuchchi Woddiki Gootti:

«Diqachchisa'neexxa attixxa fakkuwwa ani edi'ni fugusitottole,

elqekayya daaqa gophe uuritottolenna,

2 Dhugaati, qajeelummatinna qullummati,

‹Hedhaake Duuchchi Woddike Goottixxa!› hite'e kakattottole,

Gosa gosaki ard duuchchi isinn eebbisemaan

Isinninna ifi jajaan» hiyye.

3 Duuchchi Woddiki Gootti Yihudakanna Iyyerusaalemika arda hiyya'nee qici:

«Galemmanga boga ko'we

qumiddo giddo midha facaassinoqqe.✝

4 Ha'no Yihudake manna, Iyyerusaalemi'i hexxina'neek arda,

Duuchchi Woddike Gootti'a jila offo'le,

qalbe ha'noxxika fuggoka yaada ifi giddii'n fugusse;

Iitta kada gophphoole ha'no hujjineexxe foggoxxe hujexxe

mufe anixxi giiratishsha bubbaan;

dande'enna ise'e xolsaak hedhebaan.»

5 «Boga duuchcha'ni malagata ufuufe; Yihuda giddo kulle; Iyyerusaalemi giddonna lallabbe:

qonqo gikki assitine ookone boga'ni hitina'ni raartinaa qici:

‹Mitteba bukki hiyye;

dalla'inkee qachchuwibaa'a amme banjo!›

6 Tsiyooni'a giddi'a e'yate'e baandira iimi'a ke'isse;

rakkine baqattine fulle;

Middi darree'n bala,

jabaxxa ba'nenna ha'no'ni iyyedagaannen» hiyye.

7 Neenqi badda'a giddii'ni fuleen;

gosa gosaka arda biraakinna boba'adheen;

Boga ha'noka uruma asso'a,

hedhemmabaa'ninna fule'een.

Qachchuwwi ha'nok diigemaan;

oonenna gattaan.

8 Tennexxee dooniya oddo'we,

yaade; woo woo hitina'ni oodhdhe,

Duuchchi Woddike Goottixxi jabaxxi mufe;

no'onaa'ni illeema higa gophpheen.

9 «Eettene barra» hiyya'neen Duuchchi Woddik Gootti,

«Moyanjuwwikinna ja'laabbuwwik godobi raafemaan;

Qeesetinna alalte qexer hitaan;

raagolettinna roqoonsitaan» hiyye.

10 Ookkonechchi uduma aninna, «Koo Lumoke Duuchchi Woddike Gootta wolaantichchi ina'ne'n dage'e godoba geyee'na'a, ‹nage'iki hexxinaan› hitettexxi konne Iyyerusaalemika arda mayee'e gowwissette?»

11 Eetene yanna konne arda'ninna Iyyerusaalemi'n hiyyende haaso'endaaqic, «Dudhishshaaxxe malee'e hafarsitaaxxe yookaan qulleessitaaxxe kaddebaaxxi bagoxxi diidallo qiilla gammoojje hedheeke urma tulluchuwwanaa'n anke hadiba'a gandaan. 12 Anke ajajinninna jabaqicinni sortaan; aninna murte anxa inisa'ne'ni lallabannon.»

13 Kunnise naaphi duumanchiishsha buqe dagaan;

insa'nexxi fadhadin gaaruwwa hobonbaltetishsha fiiggaan;

Fadhaduwwi insa'nekinna sinbirii caala qolchaan;

ba'nenden no'a aanne!

14 Tee Iyyerusaalemi anjirendotta'a fuggoxxa godobii'n anshedhi;

haaniqico'ni fuggoki yaadi ate'ni hedha?

15 Daanike qachchanaa'n lallabaak hafuur;

Efireemixxe koobuwwa'ninna ba'ne kulaan.

16 «Tennexxee gosa gosake arda'n kulle;

Iyyerusaalemi'ninna hitine lassitinaaqici:

‹Erqe kayyii'n buqeexxi rakkisaakir bayike boganaa'n dagaan;

Yihudiinke qachchuwwa'ninna geeraraan.

17 Ardi isiki ane'ni jallateemmaxxe'e;

midha heqedhammake mannishsha erqe kayii'ni ise'e bunqaan,› »

hiyya'neen Duuchchi Woddiki Gootti.

18 Koo Yihudike arda «Me'inji ha'nokinnna huje ha'noxxi;

tennee ha'no'n iyyedaggeen;

Tinninna mura ha'noxxen;

hittata qaraareeke;

hitta godoba haraxxi assaake!»

19 Diino anke abara! Diino anke abara'a!

Elagonphe anenaa'n kexxebaan;

Diino qalbe anxixxe yaaddo!

Qalbe anee'e fuggo dhiqqissa'neen:

sammi hiyya dande'abe'non;

Malagatiink hafuur,

loliinka canca laqeennen.

20 Ba'ne ba'nede'n hana lebendaan;

kunni boginna one gataan;

Dunkaane anxi dedhange'n,

qoorchi ankinna ikki woddi diigeme.

21 Haani qico'nita lolinka baanidira uudanno?

Haani qico'nta malagatiinka hafuura laqanno?

22 «Anki ardi gowwaken;

aneenna ege'nebaan.

Insa'ne hedumi xe'yeeke,

qalbeeffachcho affebaake mannani.

Insa'ne fuggoxxa assatee'e beekkole,

eloxxa huja kinn egeneba'a» hiyye.

23 Ani butta uudennen,

isenna bifa affebaaxxe duwwixemman;

Iimmuwatanna uudennen,

ifi iimuwatikinna hedhemmaba'a.

24 Koobuwwatanna uudennen,

isenna linqisa'nemman;

Tulluchuwwi duuchchanna raasemme.

25 Uudennen, manji hedhemmabaan:

ci'uwwa duuchcha me'ite luggiteemman.

26 Uudennen, midhatik bogi qiilla gammoojje kade;

qachchi duuchchinna Duuchchi Woddike Gootti edo

jabaxxe isixxe mufenaa'n kexxeexxinni diigeme.

27 Duuchchi Woddiki Gootti hiyya'nee qici:

«Bogi duuchchi urimmake kadaan,

kaddo malee kinni ijje isixxa balleessabo'no.

28 Tennexxee butta ooxaan;

iimmuwatinna dukkandaan

Ani haaso'eennen yaada anka jijjiirabo'no;

mudheennen udumi'a higabo'no» hiyye.

29 Fadhado gulufammakenna gabe darbammake mannike cancanaa'n kexxeexxa,

qachchi giddiki manni duuchchi baajaani;

Mitti mitti bada'a giddi'a e'yaan;

welinna kinjuwwi hana da'maani

Qachchuwwi duuchchi oneexxi gate'een;

isi giddonna hedhaaki hedhebaan.

30 Tee ati ba'nete geltettexxe Iyerussaalemi; maa kaddaateta?

diimoxxa atixxa qeerraxxa seemma maye oddo'witette?

Mayeeta worqeti ifi seefattette?

Ille atixxa maye qarqaranna buudhite seefattette?

seefachcho atixxi toliinxe kaddemmaxxe'e;

Weli jaalattettakiir ate'e tuffate;

ate'e shinno'a hasa'neen.

31 Gorommummatixxa ila ilatee'e ciiniifatammaxxe,

ilate'ninna rakkattammaxxe manjichchoke hafuurishsha;

Tsiyoonixxi belto hafuur qucci hita'ni,

anga bande,

«Aane ani'a mulqemeennen,

manjo anga sa'emmake mannixxe anga'ni ibennen» hita'na'a laqennen.