1 Duuchchi Woddiki Gootti hiyya'neeqic, «Martettexxi faarinka miya giissammakenaa'ni odoolcho hiri; ardi giddii'ninna qeesoleti giddii'n lumolla kadeeka mitte mitte adhdhite; 2 Faarinka miya giissammakixxe e'yinammaxxe hula bira hedheeke Heenomike beltixxe dhooqaba'a mari. Ookko ani atenn kulannoka hiyyichcho lallabi,✝ 3 Hitattoqici ‹Yihudake moyanjuwwinna Iyyerusaalemi hexxina'neeke koo arda; Duuchchi Woddiki Goottika hiyyichcho caqasse; Isira'eeliki Duuchchi Woddik Gootti Magenikinna laqeeke duuchchaa mansha gibbaaxxa fuggoxxa yaane konnebooncho'ni iyyedagannon. 4 Ani waaleexxi tenne bakka wele ege'nemebaaka dharichcha magenuwwa magenooffataaxxe booncho asse'nemmaxxeten insa'nenna kadi edik annuwwi insa'neki Yihudiinki moyanjuwwinna egennebaake dharichcha magenuwwi'a tolcha tolchineen konne boonchonna qajeeli mannixxi munde dhangalaateen. 5 Ani ajajebo'noxxa, insa'ne'ni hiyyebo'noxxa ijje hedebo'noxxa ifixxa labbaaxxa oose giirate'ni ciincessino'a Ba'aali hiyyemaake magenuwwa magenooffanto'a tullichchuwwa giissineen.✝ 6 Tennexxee manni tenne bakka duuliinxe dhooqa malee'e konneechchin edi'a Toofeeti yookaan Heenomike beltixxe dhooqa hinabaak bari dagaan hiyya'neen Duuchchi Woddik Gootti.

7 « ‹Konne booncho'ni Yihudakinna Iyyerusaalemike ardik hedumi muuxemabaashsha assannon; insa'neke naaphi edo lubbo insa'nexxa wolaantichchik balleesso'a hasa'neeke mannixxe anga'ni ibbaashsha assannon; rensha insa'nekanna allaattuwwatinna biniinchuwwi ito'a uwwannon. 8 Konne qachcha bakka isixxa balleessannon; mambe'a hinaashsha assannon; okko'n sa'aaki duuchchi qachchake'ni kaddeexxa uude hoola abbo! Hina'ni gacifantaan. 9 Labbaxxenna meyyaxxe ifixxe ooseka maala indaashsha assannon; insa'nexxa lubbo balleessate hasa'neek naaphuwwi insa'nek erqe kayyii'ni buqe rakkisaa wodda, mitti mittinka maala itaan.›

10 «Okkone waabakanna atinni welti me'emmake manni edo shiltatton; 11 Insa'neenna hitattoqici, ‹Duuchchi Woddiki Gootti Magenikinna faarinka miya giissammakiki waabi reyemmashshanni hiissine xaasa dandenammabaashshann, konne ardanna konne qachcha ittan enqannon; moogginxi bakka gophende'na rensha Toofeeti moongaan; konne booncho'ninna ookko'o hedha'neera'ni tenneen assanon. 12 Konne booncho'ninna konne giddo hedha'neera'ni tenneen assannon hiyya'neen Duuchchi Woddiki Gootti. Konne qachcha Toofeetishshanna assannon. 13 Heelchote'ninna iimatixxe daduwwa'a hixaana gunbemmaxxenna dharichcha magenuwi'a ha'watika tolcha qophpheessendeeke Iyyerusaalemiki minuwinna Yihudake moyanjuwwike minuwwi Toofeetishshanna batto'aan.› »

14 Ermiyaasinna Duuchchi Woddiki Gootti raaga raago'a ergeemabaa'ni Toofeeti'ni hige; Duuchchi Woddike Goottike galmixxe baxxe'ni uurreexxi arda duuchcha'ni hiyyeeqic 15 «Isira'eeliki Duuchchi Woddiki Gootti Magen hiyya'neeqic, ‹Yoona godoba jabeefante hiyyichcho anka laqa gonpheemmaxxe'e konne qachcha'ninna qarqarake'ni hedheeke olla'uwa'ni ibisonna'a hedeennexxa ba'ne iyyedagannon› » hiyye.