1 Yihudaki moyanji, Iyyosiyaasik belti Sedeqiyaasi moyeeke barike ke'ito'n Duuchchi Woddik Goottik kunni hiyyichchi ane'e Ermiyaasiba'a dageexxi,✝ 2 Duuchchi Woddik Gootti anee'e hiyyeeqic: «Haqichchinka qanbara giissite'e goginke fannisanjo'ni abidisse'e gooba atike'n usudhdhi. 3 Sedeqiyaasi'i Yihudake moyanjiba, Iyyerusaalemi dagemmake manna'n Eedoomike, Mo'aabike, Amoonike, Xiroosikenna Sidoonake moyanjuwwa'n erga sa'issi. 4 Tenne erga insa'ne ifi ifike goottuwwa'ni kullaashsha Dada duuchcha ajajaake Duuchchi Woddiki Gootti Isira'eelik Magen hiyya'neeqic: «Ha'noke goottu'wa'n, 5 Ani Lumoxxe anxe hunnaninna jabbaxxe anxe hirrenni buttatanna ise giddo hedhaaka arda hore biniincha dadeennen; butta anee gamachchiiseekee uwwannon. 6 Ta'anna konne boguwwa duuchcha erganjo anke Baabiloonike moyanjo Naabukedentsoori'a uwwannon; biniinchuwwi midde gatebaang isi'a hiremaashsha assannon. 7 Isika boga wel gosa gosak moyanjuwwi dage galchaa qico'n gosa gosak arduwwi duuchchi isi'a, isike belti'anna isike beltinke belti'a hiremaan; ookkoneechchi udumi'a heddo gosa gosak arduwwinna jajjabbi moyanjuwwi isoo galchaan.

8 « ‹ «Yaane kinni Naabukedentsoorii Baabiloonike moyanji hunda galabaaka, umo ifika heeshshi asse'e isika qanbara ba'edhabaaka gosa gosaka arda isi anga ifixxenni balleessaashsha assannoqico'n insa'nee'e wolaantichchik, solo'okinna bala ibisee'e xixannon hiyya'neen Duuchchi Woddik Gootti. 9 Tennexxee ‹Baabiloonik moyanji'a ergatendinabaashsha hoyyitaaxxa ha'noxxe wabeeko, ha'noxxe moraameyyeka, ha'noxxe oojjoleyyeka, hanoke ekedha yaansassammake mannikanna ha'noxxe gojaaleyyeka haaso'a laqqinoqqe'e. 10 Insa'ne ha'no boga ha'nokee'n fuldinaashshanna ani ha'noo balleessannoshsha dhariinka raaga ha'no'n raangaan. 11 Yaane kinni Baabiloonike moyanjiinke qanbar hunda ifi heeshshi asseexxi isi'a ergatemaaka hooninna gosa gosaka ardi ifike boga'n galeexxi hucca'n hedhaashsha assannon hiyya'neen Duuchchi Woddik Gootti.» › »

12 Aninna tenneenni erga Sedeeqiyaasi'i Yihudake moyanjo'n hiyye kulenneqic, «Umo ha'noka Baabiloonike moyanji qanbar hunda heeshshi assitine'e isi'anna isike ardi'a ergatemme; hedhoti hexxinaan. 13 Atinna ardi atik Duuchchi Woddik Gootti Baabiloonike moyanjiinke qanbar hunda heeshshi hiyye ergatemabaaka arda xexxe'achchiisemmake wolaantichinni, solo'ikinna balati mayee muddina? 14 Dharichcha raaga ha'no'n raangaammaxxee, ‹Baabiloonike moyanji'a ergatendinoqqe'e› hitaaka wabeekotika hiyyichcho laqqinoqqe'e. 15 ‹Ani insa'ne'e ergebe'non› hiyya'neen Duuchchi Woddik Gootti, ‹Insa'ne dhariink raaga anke summinn raangemmaxxe ani ha'noonna ha'no'a raaga raaggemmaxxa wabeekko bogii'n fulchannon; ha'nonna baxxinaan.› »

16 Ookkonechchi uduma ani qeesolete'ninna konne arda duuchcha'n, «Duuchchi Woddiki Gootti hiyya'neeqic: Dharik Duuchchi Woddike Goottike minik mi'i, ‹Baabilooninaa'n rakke illeema hissemaan› hitaaxxe wabeekkotike hiyyichcho kademmaxxe'e laqqinoqqe. 17 Tennexxee insa'ne hinaaxxa laqawaaldineexxi Baabiloonike moyanji'a ergatendine'e lubbo galle; ajajema gophphinee'na'a kunni qachchi mayee oletixxe tuulo kadaa? 18 Insa'ne dhugaatixxe wabeekko kandoolenna Duuchchi Woddik Goottik hiyyichchi insa'ne'ni hedhoole Duuchchi Woddike Goottike mine'n Yihudake moyanjiinke moyetike mine'ninna Iyyerusaalemi gate'eeke mi'uwi Baabilooni'a boji'emabaashsha Lumoke Duuchchi Woddike Goottiba'a soodantaqqata! 19,20 Baabilooniki moyanji Naabukedentsoori Yihudaka moyanjo Iyyo'aaqemika belto Ikkooniyaani'i, Yihudakenna Iyyerusaalemike ja'laabuwwin welti booji'e'e Baabilooni'a adhdhe me'ee wodda, utuphuwwa, sageettotike sibiljinn giissemeeka wodinga goginga, moletixxe lekkaka ofo'lisanjuwwanna wele mi'uwwa aadhebaang waalee'na'a Iyyerusaalemike qachchake'n gate'emmake mi'uwwa kadeemmaxxee, 21 Konne Duuchchi Woddike Goottike mine'n, Yihudiinke moyanjike mootomatike mine'ninna Iyyerusaalemi gate'eemmake mi'uwwixxee, Lumok Isira'eelik Duuchchi Woddiki Gootti hiyya'neeqic, 22 ‹Kunni mi'uwwi Baabilooni'a booji'eme adhdhemaan; ani iso'o illeema hissannoxxi barra geltaqico'ninna ookkonn hedhaan› hiyya'neen Duuchchi Woddik Gootti. ‹Ookkonechi uduma ani konne mi'uwwa haaroba hedhemmaxxe bakka'n hissannon.› »