1 Amoontotee:

Duuchchi Woddiki Gootti Amoonixxee hiyyee qici,

«Isira'eel labbaxxa oose afebaa?

isee dhaalaakara afebaa?

Miilikoom Gaadii'i mayee dhaale?

Iski manni mayye'e qachchuwwi giddo hedha'nee?✝

2 Tennexxee Amoonitotike qachcha'n Raabati'n hana,

lolinke canca,

Laqemaaxxi yanna daggaani»

hiyya'neeni Duuchchi Woddiki Gootti,

«Isenna oletixxe tuulo kadaani;

qarqara iseke'n hedheeke ola'uwi gubataani;

Isira'eelina ise'e bogakenaa'ni fulchchemmaka;

iseenna boga ifikenaa'n fulchchitaani»

hiyya'neeni Duuchchi Woddiki Gootti.

3 «Koo Asebooni; Gaayi diigendemmaxxe'e woo hitine oodhe;

koo Raaba hexxineeke dubarruwwa raarre;

Yaqadotixxa seemma oddo'witine oodhe;

Milkool qeesoletinna jalqabuwwik welti,

Boojie'emme me'inaan;

dalla'i giddo elqe kayya gonge.

4 Tee finqildeetexxe belto,

dhooquwwa atixxe'ni mayee'e hollitaate?

Karra callixxe atixxe dhooqaxe'e mayee'e ifi saadate?

Durumma adde assexxe,

‹Ayyete ane'e tuqa dande'aki?› hitaaten.

5 Qarqara atike'ni hedheeki duuchchi

weekemmaashsha assannon»

hiyya'neen lumoki Duuchchi Woddiki Gootti.

«Mitti mitti ha'noog shorredinaan;

baqake'n hedheeka manna bukki assak hedhebaan.

6 «Ookkonechchi uduma kinn Amoonike mannixxa booji'o hiisannon»

Hiyyaa'neen Duuchchi Woddiki Gootti.

7 Eedoomixxe'e.

Lumoki Duuchchi Woddiki Gootti hiyya'nee qici:

«Temaani'ni beekkum gopheme'e?

Gorsi beekkoletena'ni bayyete'e?

Beekumi insa'nenaa'ni mude'e?✝

8 Eesaawu'u xixannoxxa yanna,

ba'ne geesisaanaxxe'e;

Ha'no Diidani'i hexxina'neke;

udumi'a higinne baaje; qeeraxxe bale giddo sho'omme.

9 Woyinetixxa gumma qocedhammakir atibaa dagoole;

shiixxoxxa woyinetixxa gumma ati'a gatisabaa?

Moodhalshe hashsha daggoole,

harsinaachcho calla moodhinabaa?

10 Ani kinni Eesaawu'u duwwi gatisannon;

sho'oma dande'abaasha

sho'omeemmaka booncho farri assannon;

Oose, firuwikinna olla'uwwi isiki ba'aani;

isi umi ifinginn hedhabaan.

11 Anna ama affeebaaxxa oose waali; ani insa'nexxe lubbo'a xexxe'atannon; aro'i reyemaxxi melaaluwwa ane'ni addatowwaal» hiyye.

12 Duuchchi Woddiki Gootti hiyya'nee qici: «Buudatenaa'ni ha'wa hasissaabake ha'wa insa'ne'a hasissa'noole, ati hittaatta xixxichchibelo gattatto? Xixema atixxi gattabaan; ha'wa ati'a hasissaan. 13 Bootsira diigende alayiinxe, oso'lichinxenna yowwinke beesisa kaddaaxxa ani ifi'a kakateenen» hiyya'neen Duuchchi Woddiki Gootti. «Qachchuwwi iseki duuchchinna duuchchii woddi'a urme gataan»

14 Duuchchi Woddike Gootti erge'exxa mitte erga laqe'enen;

«Edomike lollo'a bukki hine!

Duulo fulle!»

hiyyaak erganji gosa gosake arduwwibaa ergeme'en.

15 «Yoona; gosa gosake arduwwi giddo maa'na,

manniixxe oddo'ninni tuffatendeeteke assannon.

16 Ati rassa callike bowwa'nni hexxaateki,

koobatixxe xuungo qico'ni gelteetek;

Sodaachchisa atixxinna

qalbeti giddo hollitaattexxi holla atee sobbeen;

Mine xungote'n sinbriinsha ijaadhitotolenna;

ookko'ni butti'a atee'e ibisannon»

hiyya'neen Duuchchi Woddiki Gootti.

17 «Eedoomi alayyiinke beessisa kaddaan;

gelteexxe ba'ne duuchchanaa'n kexxeexxa,

ookkone ora sa'aaki duuchchi mambe'a hiyya'ni cee'man.

18 Qarqara insa'neke'n hedheeke qachchuwwinn welti;

Soodoominna Gomora baxxemmashshan,»

hiyya'neen Duuchchi Woddik Gootti.

Iittanni ayyinna ookko'o hedhabaan;

mitti manjinna ookko'o hedhabaan.✝

19 «Neenqi Yordaanoosike gongomibaa'n;

hore allallammake diidibaa fullammashsha;

Aninna dedhange'n Edoomi'n dagannon; bogakena'ninna isoo shorrannon.

Ani fi'leenneka isixxe bakka'ni hariirannon; anishsha hedheek ayyete?

Ayyete anee hoyya dande'aki?

Hoone allalissanjo anee uursa dande'aak?»

20 Tennexxee Duuchchi Woddiki Gootti Eedoomi'ni afeeka yaada;

Temaani'n hedha'nekera hede'eka yaada laqqe;

Shishshiixarramma horiinka haagana harkinse adhdhine me'inaan;

insa'nexxe buuton allallaammaxxa bakka ca'asse balleesan.

21 Iba insa'nexike hafuurnni buttini linqi linqi hiyyaan;

insa'nexxi raarenna Diimmoxxe Abaaya qico'ni laqissaan.

22 Kunnise Sinbiriinsha guule ise'ni ibaan;

keelakanna Bootsira'ni farri assaan;

Eettenee barra Eedoomike loliinke mannixxi qalbe;

ciniifatammaxxe manjichchoxxe qalbeshsha kaddaan.

23 Demasiqoxxee;

«Elobaaxxa odo lanqemmaxxee;

Hamaatinna Arifaadi alane'een;

Abbaayatike danbala'ishsha daanqe'en;

qalbetinna weekkende'een.✝

24 Demasiqo gophphe'en;

baajo'a udumi'a higge;

soda'a abidde,

Ciniifatammaxxe manjichchoshsha,

rakkotinna abari giddo e'yite.

25 Ani gammadaaneki;

ege'nemmeek qachchi hitta gibeme?

26 Dhugaandinni labbaxxi dargaggeeyyuwwa weldeena weldeenade'n ibbaan;

eettenne barra'n lolinnki manni duuchchi ibaan»

hiyya'neen lumoki Duuchchi Woddiki Gootti.

27 «Demasiqoke dalla'a'ni giira worannon;

Beenihadaadika utupha giira ittaan» hiyye.

28 Baabiloonik moyanji Nabukadanatsoori insa'ne lolemmaxxee Qeedarixxenna Hatsoorixxe mootummuwwa kulendeexxi. Duuchchi Woddiki Gootti hiyya'nee qici:

«Ke'we, Qedaarii loldine'e

borotika arda birre.

29 Insa'neki dunkaaninna horiiniiki haagan insa'neki adhdhemaa;

fooqo insa'nekanna gaaluwwi gatebaang;

miyuwinginn adhdhinaan manni,

Manni ‹Ori orinaa'inn weekensha insa'ne'ni daggeen!›

hina'nee insa'ne'ni cancinaan.

30 «Koo Hasoor'ni hexxina'neeri,

rakkine baajje! Qeerraxxe bale giddo sho'omme»

hiyya'neen Duuchchi Woddiki Gootti.

«Baabiloonik moyanji Nabukadanatsoori ha'nooxxe mari'attemmaxxenna:

fuggoxxa ha'no'aa hedeen.

31 «Ke'we, mitte riffii belo ofo'leeka;

ifi'ni addate hedha'neka gosa gosaka arda lolle»

hiyya'neen Duuchchi Woddik Gootti.

«Cufannakanna danqarissanjo afebaake;

qoftinni hedha'neke gosa gosake arda'ni duulle.

32 Gaaluwwa insa'neka boojinaan;

horuwwa insa'neka bukki assine oolfinaani;

Umo qooxxo haaxxeeka manna ora ora'ninni uggannoni;

ori orinaa'ni ba'ne insa'ne'ni geessisannoni»

hiyya'neeni Duuchchi Woddiki Gootti.

33 «Hatsoori jeedali burraqaaba,

duuchchii woddi'a gongoma kaddaan

Ayyinna ookkoo hedhdhabaani;

okkonna ofo'laaki afemabaani.»

34 Yihudiinki moyanji Sedeeqiyaasi moyemmake baro'n sirende'ni wabeekichcho Ermiyaasibaa dageek Duuchchi Woddike Goottik hiyyichchi konneten:

35 Dada Duuchcha Ajajaaki Duuchchi Woddiki Gootti hiyya'nee qici:

«Kunni hunnatixxa booso;

Elaamixxa gabe enqannoni.

36 Shoole iimatike kasuwwanaa'n;

Elaami'n shoole diidallo idagannoni;

Shooliinxe diidallobaa insa'ne xexxerannoni;

Elaamii'ni booji'emeekiir ginnabaak;

bogi hedhabaani.

37 Lubbo insa'nexxa shiwo'a hasaake naaphphi insa'neki edo,

Elaamiki culphisashsha assannoni;

Insa'ne'ni ba'nenna mufe anixxa insa'ne'ni dirrisannoni»

hiyya'neeni Duuchchi Woddiki Gootti.

«Insa'ne'e kutti asse biranno qico'ni

wolaantichchik shorrannon.

38 Moote anixxa Elaami'i uggadhdhannon;

moyanjuwwakanna jalqabuwwa birannon»

hiyya'neen Duuchchi Woddiki Gootti.

39 «Yaane kinni udumi uduma;

Elaamixxa booji'o hiissannoni»

hiyya'neen Duuchchi Woddiki Gootti.