Eermiyaasikaa Raaga 34

Sedeqiyaasixxee Haaso’endeexxa Wabeekumma

1 Baabiloonik moyanji Nabukadanatsoorinna isiki loliink manni duuchchi, galcha isixxi hunda hexxemmaxxi mootummuwwanna arduwwi duuchchi, Iyyerusaaleminna qarqara iseke’n hedheeka qachchuwwa lollammaxxa yanna, Duuchchi Woddiki Gootti hiyyichchi Eermiyaasi’n dageexxi:✝34:1 2 Moy. 25:1-11; 2 Odo. 36:17-21. 2 «Duuchchi Woddiki Gootti Isira’eelik Mageninna Martettexxi Yihudake moyanjo Sedeqiyaasii’i Duuchchi Woddiki Gootti, ‹Ani konnee qachcha Baabiloonike moyanjixxe anga’n sa’issee uwwonaaten, isinna isoo giirati gubaan. 3 Atinna abidendetexxi isixxe anga’n sa’issende uwwendatto malee’e isixxe anga’naa’n fuldabexxon; ati Baabiloonika moyanjo ille atixxenninn uuda’n isinni welti haasottatton; okkonechchi uduma Baabilooni’a me’ittatton hiyye.

4 « ‹Yaane kinni, Yihudiinke moyanjo koo Sedeqiyaasi! Duuchchi Woddike Goottika hiyyichcho laqi; Duuchchi Woddiki Gootti atee, Wolaantichchiki rertabexxon; 5 Nage’inginni rertatton. Ardi, ati edidarre hedhemmaka moyanjuwwa atika annuwwa ulfeessate’e mooggo insa’eneek baro giira ha’ishshammashsha, atike mooggi baronna atee ulfeessatee’e giira ha’inshaan; «Woo, woo gootta no’ookee!» hina’ninna ati’a oo’naan; ani Duuchchi Woddiki Gootti tennee haaso’eennen› » hiyye.

6 Wabeekichchi Eermiyaasi tennee duuchcha Yihudiinke moyanjo’n Sedeqiyaasi’n Iyyerusaalemi kule. 7 Konne wodda Baabiloonik moynjik manni Iyyerusaalemii’i, iittanni gateeka Yihudiinka qachchuwwa Lakishiinna Azeeqa lolate’n he’nemman; Lakishiinna Eezeqahi Yihuda giddo kinjiinke dalla’uwwike qachchuwwinaa’n gateemmak ison callaman.

Garbummatenaa’n Fuleeke Garbuwwixxa Garbummatibaa Higa

8 Moyanji Sedeqiyaasi garbummatenaa’n garbuwwa fulcho’a Iyyerusaalemike ardi duuchchinni welti kako aageechchi uduma Duuchchi Woddike Goottiki hiyyichchi Ermiyaasi’n dage.

9 Mitti mitting Ibiritotixxe gosak manji, Ibiritotixxe gosa kadeeka labbaka garbichchanna Ibiritotixxe gosaxxa meyyaxxa garbitte garbumma galchatenaa’n wocci asso’atemman; ayyinna ifika, Ayihudiinxe gosaka manjo garbumma galchashshatemabaan. 10 Tennexxee tennee kakonni mitte afo’o kadeek ja’laabuwwinna ardi duuchchi ifi ifi’a galchammaka labbaka garbuwwanna meyyaxxa garbittuwwa garbummatenaa’n wocci assaashshanna, ta’anni edi’aanna haaroba insa’nee’e garbumma galchinabaashsha weli aangeexxi garbummatenaa’n insa’nee fulchine. 11 Yaane kinni turreexxi, garbummatenaa’n wocci assinemmanga ifi ifika garbuwwa, higaashsha assineexxi, haaroba garbumma galchine. 12 Ookkoneechchi uduma Duuchchi Woddike Goottiki hiyyichchi Eermiyaasi’n dageexxi: 13 «Duuchchi Woddiki Gootti Isira’eelik Mageni hiyya’nee qici: ani edika ha’nooka annuwwa garbumma galamabaa’n Gibtsee’n fulchene wodda insa’ne’a kako aagennexxi, 14 ‹garbummatee ha’no’ni ifi gurgudheeka Ibiritotixxe gosaka manjo jaane wogga ha’no’a ergatemmeechchi uduma, mitti mitti ha’nook torbaane torbaane wogga’n garbummatenaa’n insa’ne’e wocci asse.› Annuwwi ha’nooki kinni anxa lanqeba’a; manshshatanna aniba’a wirri assineeba’a.✝34:14 Fula. 21:2; Lan. 15:12. 15 Ha’no ta’a aadde aaggineexxi ani edo eloxxa yaane assitineen; mitti mitti ha’noong, garbake assexxinemmaka ha’nooxxe gosaka manjo garbummatenaa’n wocci assitineen; summi anki ye’emaake mine’n ani edo kako aaggineen. 16 Yaane kinni wirri hitineexxi summa anka battoositineen; garbummatenaa’n fule fedhe hedho’a wocci assitinemmaka labbaka ha’nooka garbuwwanna meyyaxxa ha’noxxa garbittuwwa wirri assitine haaroba garbake assexxine’een.

17 «Tenne’a ha’no ani’a ajajema gophphine’e: ha’nooxxe gosaka Isira’eelika manna leexumma fulo’a lallaba gophphinemmaxxe’e ani’a ajajendinebaan. Kunseten ani ‹leexumma fula› ha’no’a lallabeennen Duuchchi Woddik Gootti. Tinninna ha’no wolaantichchake’n, dhukkubake’ninna solo’oke’n wocci assendinaaxxe ‹leexuma› fulan. Buttatiki gosa gosak ardi duuchchii uudeexxi bajabaja hiyyaaxxa yaane ha’no’n assannon. 18 Kako anxa diigeekanna aagemmaxxe kako muuxa gopheeka manna, insa’ne kako aagatee dulleexxi, maala isika lameba dhaanbe’e oddo giddii’n sa’nemmake ookone jibichcha’n, insa’ne assinammashshanni aninna iitanni insa’ne’n assannon. 19 Yihudakanna Iyyerusaalemika akeekisanjuwwa, mootummatike minika ja’laabuwwa, qeesoletanna jibichchinke maalixxe dhaabuwwaxxe oddo’n sa’eeka arda duuchcha, 20 Naaphi insa’ne’e shiyyo’a halsa’neekixxe anga’n insa’nee sa’isee uwwannon; maali insa’nekinna biniichinkenna allaatettixxe ita kadaan.

21 «Yihudiinka moyanjo Sedeqiyaasinna isika jalqabuwwa shiyo’a halsaaka naapha, kunninna yannatee ha’no’o lola waale’eeke Baabiloonike moyanjike loliinke mannixxe anga’n ha’no’o sa’isse uwwannon. 22 Kunseten ani insa’nee’e ajajenexxi konne qachchibaa hingaashsha assannon; insa’nenna kone qachcha lolle abindeexxi giirati gunbaan; ani Yihudake bogika qachchuwwa onsennexxi manji hedhabaake assannon; ani Duuchchi Woddik Gootti tenne haaso’eennen.»