1 Gosa gosake ardixxe'e Duuchchi Woddiki Gootti hiyyichchi ane'e Ermiyaasi'n dageexxi hiyyeeqic, konneechchinni butti'a hedheen. 2 Gibtseexxe'e, Yihudake moyanjike Iyyosiyaasike belto Iyyo'aaqemi moyeexxe sholgeessoxxe wogga'n Efiraaxisike galaan qarqara Karikeemishshi hiyyendaaxxe bakka'n Baabiloonik moyanji Nabukadanatsoori lole'e injifateek Gibtseke moyanjo Feri'ooni Nikaa'uke sannachchuwwa'n erga kulendeen;✝

3 «Lumoxxanna shiixxoxxa wonte qophpheffatte;

lolakeenna fulle!

4 Fadhado koodhe;

hananna gulufe;

Umoke'n sibiliinxa gulle uggudhdhitineexxi,

ififixxe bakka ha'nooxxe'ni uurre;

Bagedo ha'nookanna qadhdhe;

sibiliinxa seemmanna lolakee'e oddo'we.

5 Yaane uudaneelchi kunni maachcho?

Yo'ooshsha sodaante'een;

Udumi'a higate'n he'neen;

jabaki insa'nek loliinki manni injifateme'een;

Udumi'a wirri hiyye uudebaang,

lekka wonshine baqake'n he'neen;

duuchchi darre'n weekensha hexxeen;» hiyya'neen Duuchchi Woddik Gootti.

6 «Yo'oshsha gongaak dande'e baajabaan;

jajjabikinna baaje fulabaan;

Insa'ne midda Efiraaxisike galaan bira,

guggufante inbaan.

7 «Dageeke Abbayike galaanishsha utalaak;

wo'me danbala'ammake galaanishsha ya'aak kunni ayyete?

8 Gibtsee dageeke Abbayike galaanishsha utaldaan;

wo'me danbala'ammake gaalaanishsha finxirqisaan;

Ise, ‹Ani qophphi hiyye'e ke'annonnni; buttatanna buqannon;

qachchuwwa giddo hedhemmange manninni balleessannon› hittaan.

9 Koo fadhaduwwa guluffineeke manna ke'e fulle! Fadhadiinxe gaarruwwaki manninna qolchisse;

wonte abixxitine'eek Tophiyiikinna Fuuxiki manni,

Ha'no gabe qassine'eek Luudik,

ha'no jajjabbi loliink manni kexxine duulle.

10 Itti barra kinn lumoke Duuchchi Woddike Goottixxe barran;

Ifike naapha'ni halo fula'neexxe halotixxe barran.

Wolaantichchi isikinna godde dee'ifataa qico'ni itaan;

dheebo fulaa qico'ni munde ha'waan.

Middi darreke Efiraaxisike galaanike bogi bira

lumoki Duuchchi Woddiki Gootti Magen tolcha qophpheese'en.

11 «Tee Gibtseexxe duuddo dubarrichcho;

Gele'adike bogibaa'a fuli; hariirrannoka qorsanna iyyedagi;

Yaane kinni tolanga qorsa bira sa'isitaatten tola;

fayyitabexxon.

12 Gosa gosaki arduwwi salphinne atika laqaan;

oodhishsha atixxinna butta duuchcha'ni geltaan,

Mitti loliinki manji mitteke'n guggufataan;

lamiing weli abixxe ibaan» hiyye.

13 Baabiloonik moyanji Nabukadanatsoori dageexxi Gibtsee lola'neexxa, Duuchchi Woddiki Gootti wabeek Ermiyaasi'ni haaso'emmaxxi erga konnechchin butti'a hexxeen:✝

14 «Tennee Gibtseeke boga'ni haaso'e; Migidoolimii laqise;

Memifisinna Xaafinaasi hine lallabee qici:

‹Booncho booncho ha'nooge'ni uure;

qophpheeffatte qarqara ha'nooke'n hedheeka wolaantichchi itaani.›

15 Lolinki atike manni mayee'e ferri hiyyesi?

Duuchchi Woddiki Gootti dhiibe insa'nee hunaammaxxe'e; uurra dandeennabaan.

16 Insa'ne higge higgeen gugguffantaan;

mitti mitteke'n hana ibaan,

‹Ke'we alalle me'ino;

ardi no'okibana ilemenge bogiba'a hingo;

naaphiinke wolantichchanaa'ninna banjo› hinaan.

17 Ookone wodda ‹Gibtseeka moyanjo Feri'ooni

isi'a uwwendeexxe yanna'ni la'ote'n hosebaake,

anee malee'e hiyya'neeke caaqaleesa!› Hine isoo ye'naan.

18 Summikinna dada duuchcha ajajaak Duuchchi Woddike Gootta kade'eek moyanji hiyya'nee qici:

«Ani hedhaaneke kada anxe'ni kakataanen.

Koobuwwatixxe oddo'ni hedheeka Taaborixxa kooba labbaa'nexxa,

abbaayati qarqar hedheeka Qermeeloosixxa kooba fakkaate daga'neechcho hedheen.

19 Koo, Gibtsee hexxina'neeke ardaa,

booji'endine me'itino'a mi'ya ha'nooka qophpheesedhe;

Memifisi diigendeexxi,

manji hedhebaake ona kaddaan.

20 «Gibtsee munde eldeexxe raadashshaten,

yaane kinn woraanchi,

middi darree'ni iddo'a dagaan.

21 Kinjiinka dalla'a heqqammak lolinki manninna,

ha'yo afeeke jibootishshaten,

Xixemaaxxi yanna insa'ne'a geltemmaxxe'e,

ba'netixxi barra insa'ne'a shiqqemaxxe'e,

Insa'nenna udumi'a hingeexxi mitteba baanjan,

ifi ifike booncho'inna itti jabaante ifi iimi'ni hoyyedha dandeennabaan.

22 Naaphi hunnat isibaa dagaa wodda,

Gibtse baqata'neexxe buuteshsha fiissitaan;

Haqqe kara'neeke mannishsha,

meesano aa'ne fullaan.

23 Haqqe wo'miteeke gongomanna kadoole; gaaro annaani»

hiyya'nen Duuchchi Woddik Gootti.

«Laakkossi insa'neeki koro'mosinke haaganiinshaten;

Ayyinna laakko'e dhaqqababaan.

24 Gibtseexxi dubarcho shookiinxe kaddaan;

middike ardixxe anga'ninna sa'issendinee uwwendaan.»

25 Dada Duuchcha ajajaaki Duuchchi Wodddiki Gootti Isira'eeliki Magen hiyya'neeqic: «Tebeesiki mageni Amooni'ni, Feri'ooni'ni, Gibtsee'ninna isenge magenuwwa'ni, moyanjuwwake'n iittann Feri'ooni'ni adde assa'neera xixannon: 26 Shiyo'a hasa'neeke Baabiloonike moyanjo Naabukadanatsoori'anna loliinke isike ja'laabuwwixxe anga'ni sa'isse uwwannon: shiixxoxxe yanna uduma kinni Gibtse edi woddike barishshann haaroba'a manji hedhaaxxe bakka kaddaan,» hiyya'neen Duuchchi Woddiki Gootti.

27 «Koo anke erganjo Ya'iqoobi; sodaattoxxe'e;

Koo, Isira'eli daddaaqqoxxe'e;

Atee'e bayyike boonchonaa'ni,

sanne atixxanna booji'ende me'itemmake boganaa'n anjiranoon.

Ya'iqoobi higeexxi nage'ikinna salaliki ofo'laan: iso'o sodaachchisaachchi mittilchinna hedhabaan.✝

28 Koo anike erganjo Ya'iqoobi; sodaattoxxe'e;

ani atinni welti hedhennen» hiyya'neen Duuchchi Woddiki Gootti.

«Atee'e xexxeeremmaka gosa gosaka arda duuchcha;

booso insa'neexxa balleessonnolenna midde;

atee'e kinn ittanna balleessabe'non.

Hasissaaxxa mura woxa ati'a uwwanno malee'e;

tola boddichcha atee waalabe'non» hiyye.