Eermiyaasikaa Raaga 8

1 « ‹Eettenee yanna’ni, hiyya’neen Duuchchi Woddik Gootti; Yihudiinke moyanjuwwixxinna ja’laabuwwiinxi miqe, qeesoletixxinna raagoletixxi miqe, Iyyerusaalemike ardixxi miqe moonge moongemmabaa’ninni fuldaan. 2 Insa’ne eene ergatemmammake ittanni hordofammake; inisa’ne gorsammakenna magenooffantammaxxa arishsho, baatenna iimatixxa urjuwwa duuchchi edo fayendaan; bukki hitabaan yookaan moogendabaan: yaane kinn hunemeeke korishsha bogake’ni xeerendaan. 3 Konne fuggoke gosa gosake ardanaa’n gateeki duuchchi, xexxeerreeneeke bonicho duuchcha’ni hedhoti hedhati iirra reyo eeyaan: hiyya’neen Duuchchi Woddik Gootti.›

Cubbo Iyyedaggeeka Xixichcho

4 «Insa’ne hitatto qoci, Duuchchi Woddiki Gootti hiyya’nee qici:

« ‹Manni iboole, ibeeba’ni ke’abaa?

Manji dedhe udumi’a higoole, dedha ifikenaa’ni higaaba?

5 Mayeeteta, kunni ardi ane’ni dudduro wirri hiyya’ne?

Mayeete Iyyerusaalemi duuchchi wodda udumi’a higgeechchi?

Xaqaro goggoddo godhanteen;

aniba higa ginbe.

6 Ani dho’o hiyye insa’ne caqasennen,

yaane kinni dhuga’a haasonnebaan;

Ayyaanna ifixxe balleessa’a aadde aageek hedhebaan,

«Ani maa balleessenne?» hiyyaan.

Bagediinba gulunfammake fadhachchishsha

mitti mitting ifi ifinge oribaa me’a’neen.

7 Huummo midde iimate’ni,

ise’a murendexxa yanna egende’en;

Faachinixxi ama, guugenjonna urungo,

shorrinaaxxa yanna egenneen;

Yaane kinn anki ardi,

Duuchchi Woddike Goottika seera ege’nebaan.

8 « ‹Borreessanjuwwi ha’nookixxi dhariinxi tiikko dhara borreessita’na hitta, «No’o beekaken,

Duuchchi Woddike Goottika seera anfeennen» hitinata?

9 Beekkole shookkaan,

saliphattaan; fonxoroti abidemaan.

Duuchchi Woddike Gootika hiyyichcho tuffaniteen,

hitta hedheeke beekkuma anfe’e hiyyoteta?

10 Tennexxee insa’nexxa aruwwa wele labbali’a uwwannon;

fichchuwwa insa’neka wele bogike mani’a uwwannon;

Shiixxokenaa’ni lumiki qico’n,

duuchching la’o fulabaachchi’a fiidi hinaan;

Raagolettinna qeesole ittanni

duuchching sobaaleyyeten.

11 Ardi anikixxa mada sholinshe uundemmaxxe;

fayyinsa’nebaangee ci’looman;

Nage’i hedhebang «Nage’aken, nage’aken» hinaan.✝8:11 Hiz. 13:10.

12 Batte yaane hunjaa wodda shoonkemma?

Waawwo! Ijje shoonkebaan;

Shooking maachcho kadeenxa egeneban.

Tennexxee ibeekinn welti inbaan;

insa’nee mura woxisanno wodda salphantaan»

hiyya’neen Duuchchi Woddik Gootti.✝8:12 Erm. 6:12-15.

13 « ‹Huccinemalcho duuchcha insa’nena’ni adhdhannon;

hiyya’nen Duuchchi Woddik Gootti,

woyinetike hiddichcho’ni woyinetixxi gumma hexxabaan;

Balasetike haqichcho’n gumma afendabaan;

shafuwwikinna harca’ee luggaan.

Ani uwwenalchi duuchchi;

insa’nenaa’n adhdhemaan› » hiyye.

14 «Mayee’e kaba ofo’leenne?

Mitteba bukki hiyye!

Dalla’inke qachchuwwiba baqanto;

oko’o marre mundo!

No’o isi edo cubbo hunjennaxxe;

Duuchchi Woddiki Gootti no’oki Mageni mundannoshsha no’o asseeni;

ha’la wode’e ha’winannoshsha asse’en.

15 No’o nage’i kadaani hine’e addanteennan;

eloxxi yaane kinn no’o’a kaddebaani;

Fayyatixxa yanna halchinenneni;

yaanne kinn no’o’n raankensha calli kadde.

16 Naaphinke fadhadixxi koqa,

Daani’ni laqissaani;

Insa’neke fadhadixxi himimmeettenni,

bogi duuchchi lele’meen.

Iikki boginna ise giddo hedheechchi duuchchi

ookkone qachchuwwanna ise giddo he’na’neecho duuchcha

birro’a dange.»

17 «Kunnisee! Ha’no giddo ha’la callika bofuwwa,

gojaameessinxi gojo dandeettabaaxxa;

buutuwwa ha’nooba wocci assannon;

ha’noonna idditaan»

hiyya’neeni Duuchchi Woddiki Gootti.

Erimiyaasi Ardake Yaadee qico

18 Koo yaadanno wodda dayyeessitatteke;

ani giddo hunna hexxebaan

19 Konneechinni butta hexxeexxa anike ardixxa raare

bayyike boganaa’ninn laqi;

«Duuchchi Woddiki Gootti Tsiyooni hedhebaa?

Moyanji ookko hedha’nebaa?»

«Giissendeexxe fakkuwwa insa’nexxa,

itaani woyi fulabaake ege’nemebaake magenuwwa’ni mayee ane’e mufachchiinsa’ne?»

20 «Midha yanna saxxe;;

bonikinna uurre,

no’o kinni anjiremmebo’non.»

21 Ardi ank mado’a wodda,

aninna mado’enneni;

alayye oodhdhenneni;

22 Gele’adi boga’ni ganaaki qorsi hedhebaa?

Yookani okko’o ci’leessi hedhebaa?

Ardi ankixxe mada,

mayee fayyisaachchi gopheme?