Eermiyaasikaa Raaga 20

Ermiyaasi Qeesichcho Phaasikori’i Moromeexxa

1 Duuchchi Woddike Goottike Galm giddo umoke kadeemmak Imeerik belti qeesichchi Pashihuur tennee yaanuwwa Ermiyaasi raaga raageexxa laqeexxa yanna, 2 wabeekichcho Ermiyaasi’i ganeexxi Duuchchi Woddike Goottike galmixxe alidarrexxe Biniyaamixxe hula’n jirmik lekka usuremaashsha asse; 3 langa baro phashihuur Ermiyaasi’i usuremeeke jirmi giddii’n fulcheexxi hiyyeeqic, «Ta’anni elqi’a Duuchchi Woddik Gootti summa atika Magorimisabib hiyya malee’e Pasikoor hiyyabaan 4 Tennexxeetemman Duuchchi Woddik Gootti ‹Atee’e atike umi’anna atike jaaluwwi duuchchi’a weekenshatike assannon; ille atixxi uuddaa’naann naapha insa’nekiki wolaantichchi insa’ne’e itaan; Yihudaka arda duuchchanna wolaantichchik shiyaake yookaan Baabilooni’a booji’aake Baabiloonke moyanjiinxe anga’n sa’isse uwwannon. 5 Konne qachchixxa karra duuchcha elo isixxa Yihudake moyanjuwwiinka fiixa mi’uwwanna horanteechcho duuchcha naapha insa’nekixxe anga’n sa’isse uwwannon; isinna booji’eexxi Baabilooni’a adhdhe me’aan. 6 Koo phashihuur atinna atike mine’n hedheek duuchchi Baabilooni’a booji’endinaan; atinna dharik wabeekumma insa’ne’a haasottettak atik jaaluwwi duuchchi ookko rertinee’e moogendinaan› hiyye’emmachchi» hiyye.

Ermiyaasi Mageno Aallateeqico

7 Koo Duuchchi Woddike Gootta anee’e baseessitette; aninna baseeffatenne;

ani caal hunnaamessake kaddetten; injifattette;

Barra duuchchanna gacifachchotike kadenne;

duuching anee osso’le.

8 Haaso’anno wodda duuchcha oodhanno;

«xaqaro hujendaan ba’netinna daggaan» hiyye lallabenne;

Tennexxee Duuchchi Woddike Goottik hiyyichchi,

barra duuchcha yowwematanna cee’mema ane’n ile.

9 Yaane kinni «Ta’anni elqi’a summa isika ganabe’no;

summa iskininna haaso’abe’no» hiyyonnole,

Hiyyichchi isik qalbe anxi giddo giiratishsha,

miqe anxe giddonna xurenoke kade;

Ifi giddo buqe’e abixxa gophenne;

haranga dande’ebe’no.

10 Bakka bakka’ni weekeshate hexxeen;

iso’o fugusse; fugussino

hina’n hashanshaa wodda laqenne;

Anxa iba halcheexxi

anke jaaluwwa kade’emmak duuchchi,

«Isi baseeffataaxxe hexxeen,

ookkone wodda iso injifantannon;

halotanna iso’n fullannon» hinaan.

11 Yaane kinni Duuchchi Woddik Gootti janni goottishsha aninni welt hedheen;

tennexxe anee’e shorredhaakiruwwi guggufate ibaa malee’e, insa’ne’a injifatabaan;

Fuggo salphantaa malee injifantaba’a;

salphinni insa’nekinna hara dedhemaba’a.

12 Qulliyye hega uuddattokee, manjixxa qalbenna sammo memmekisse uuddattokee

koo Lumoke Duuchchi Woddike Goottaa,

Yaane anxa ate’n uwwedheennaxxe’e,

insa’nen halo ani’a fulda’naa’a uudannoke assi.

13 Duuchchi Woddika Gootta faarse;

Duuchhci Woddike Gootti’anna galata uwwe;

Isi rakkiyyetixxa lubbo,

fuggaaleyyetenaa’n gatiseedheen.

14 Ilemenexxe barra’a ise’a hoola; badinendeexxe kaddowwaal!

Ama anxi anee’e ildeexxe eettene barra’a eldoqqe’e.

15 «Labbak belto i’lite’etten» hiyyeexxi

anna anke’n danbooba isoo’o kuleek

iso’o gammachchiiseeke manji isi’a hoola.

16 Ikki manji, Duuchchi Woddik Gootti mararte belo

balleesemake qachchuwwishsha kadowwaal;

Isi bariisa raare,

saafo’ake’ninna bagediinxa weekensha laqowwaal.

17 Ama anxik godobi hirreessa anke kaddo’a giddo gate’ennelena’a;

ama anxik godobi duuchchi woddi’a lumoke kade hedho’a,

silaan gadaamessi giddi’n fulebe’nok anee’e shiye’eelena’a.

18 Rakkotanna abara uudonna’a

bari anki salphinik muuxxemo’a

mayee’e ilemenne?✝20:18 Iyo. 3:1-19.