1 Duuchchi Woddik Goottik hiyyichchi anibaa dage hiyyee qici: 2 «Martettexxi hafuura gikki assite tenneee Iyyerusaalemi lallabi;

« ‹Duuchchi Woddik Goottinna hiyya'nee qici:

ka'umumma hexxette wodda affetaxxa xuurameesumma,

Waajubummate'n hitta anee eetettexxa,

qiilla gammooje mittilchchi latabaake boga'ni;

hittee qico anee hordoffettexxa kassi hiyyaanen.

3 Isira'eel Duuchchi Woddiki Gootti'a woyyotemman;

umoke'ni aasse'nammaxxe miidhamman;

Iteeki duuchchi balleessanote kade;

bala insa'ne'ni ibbeen› »

hiyya'neen Duuchchi Woddiki Gootti.

4 Koo Ya'iqoobike mine; Isira'eelike minixxe gamo duuchcha;

Duuchchi Woddike Goottika hiyyichcho laqqe.

5 Duuchchi Woddiki Gootti hiyya'nee qici:

«Ediki ha'nook annuwwi anenaa'ni bayyateechchi,

woyi fuldabaaxxa fakke hordofeek,

Insa'ne ifi'aanna baffantebaang ganteechchi,

ane'ni maa balleessa hexxammalete?

6 Insa'nenna, ‹Gibtseeke boganaa'n no'o fulcheek;

qiilla gammoojjek gongoma'ni,

Bobboqichcha qiilla gammoojje boga'n,

gomalete'ninna dimma dukkana booncho'ni,

Mitti manji mammaremabaakenna hedhabaake booncho'n,

no'oo akeekeek Duuchchi Woddiki Gootti haba hedhe?› hine lanqebaan.

7 Ani, misseexxa midhanna ittino'o

shaqqake bogibaa ha'noo iyyedagenen;

Ha'no kinn daggine boga anka battoossitineen;

geego ankanna xureessitine.

8 ‹Duuchchi Woddiki Gootti haba hedhe?› hite,

qeese laqqeebaan;

Seera ege'nammakir anee ege'nebaan

akeekisanjuwwi ane'n jallateen

Raagoletinna Ba'aali hinaake dharichcha magenuwwinke summinn raaga haasotte,

wayi fuldabaaxxa fakkuwwanna magenoonfatte.»

9 «Tennexxe ani ha'noonni welti moromate afeennen»

«Ha'nooxxe oosexxe oosenninna moromaannen.

Hiyya'neeni Duuchchi Woddik Gootti.

10 Kitimike oddoolika fooffine uude;

Qeedari'a manjo ergitine qo'nissine qorre,

iita hexxeexxi yaane kaddee egendeexxe kaddoole kokke.

11 Dhugaatike magenuwwa kada gophoolenna midde;

ifika magenuwwa jijjiidheki gosa gosak ardi hedhee laati?

Ardi anki kinni anee'e insa'nek gaachchanna kadenneka,

wayi fulabaachcho'ni jijjiidhdhineen.

12 Tee iimmuwwa, tennee mambe'a hiyye;

jaba qico soda'anni roqonse»

hiyya'neeni Duuchchi Woddik Gootti.

13 «Ardi anki lame cubbo huje'en:

Hedhake muummeti wode'e kadenneka,

anee'e waale'een,

Wodi'i giddo kiphattabaxxa lugoo affeexxa wode'e cammammaxxa baluwwa,

ifi'a qolte'neeni.

14 Isira'eel garbakebaan yookaan mine ilemeeke garbabaan;

eega, mayeeta saamematixxe assende?

15 Neenquwwi iso'ni;

hafuura gikki asse ittannoole.

Boga isikanna urummake assine'en;

qachchuwwi kinna gubate mude'e one'een.

16 Higgeenna Memifisikinna Xaafinaasike manni

umo atike'n bante uggine.

17 Ora ati'a akeekamaka,

Duuchchi Woddika Gootta atika Mageno waaldeettaxxe'e;

tennee umo atike'ni iyyedageboxxoota?

18 Shiihorike galaanika wodee'e ha'witottaa,

atitaa mayee Gibtsee'a martette?

Efiraaxike galaanika wode'e ha'witottaa,

Asoori'a me'aa mayee'e ati'aa hasisse?

19 Fuggoxxi huje xixichcho ate'ni geessissan;

dudduro wirri hiyya atixxinna fuggoxxa atte'ni iyyedaggaan.

Dada Duuchcha Ajajaka Duuchchi Woddika Gootta atika Mageno waaldatto wodda;

aneenna sodaatta waaldatto wodda

Hittee qico ani hara fuggichchakenna qaraartaaxxe ate'ni kaddaaxxa,

qalbeeffatte uudi ballo»

hiyya'neen dada duuchchik Duuchchi Woddiki Gootti.

20 «Olimii'ni ke'isse rakko atenaa'ni hoyyeennen

usurra kenaa'ni ate'ee fulcheennen

atinna, ani'a ‹Ergatemabo'non!› hiteten;

Tullichchuwwi duuchchi hunda;

mitte mitte shafa bira sa'eeke haqichchi hunda,

dharichcha magenuwwa magenoonfattetten.

21 Ani filemeeke woyinetike hiddichchishsha

eloxxe sanne asse atee'e kaaseennani

Corroqo'eke badda'a giddike woyinetike hiddichcho kaddettexxi;

hitta kadde'e ane'ni jijjiirendettetaa?

22 Haranjik anshexxoole

heddo saamunuwwa la'onfattottolenna,

balleessa atixxi farrie hite ta'anna ani edo hexxeen»

hiyya'neeni Duuchchi Woddiki Gootti.

23 « ‹Batto'eebo'non,

Ba'aalinna magenooffatebo'non› hitta hitatto?

Dhooqa giddo maa hujjeette

amo hedi,

Maa assiteettexxa kassi hiyyi,

elqenna kayya dida'nee gaala kaddeetten.

24 Qiilla gammooje giddo barattetteshshanni,

korma hallisita'n foole aaxxe diddammaxxe badda'a giddixxe harreshshaten;

koromme hasseexxa isee'e ayyete abide uurrisa dande'aa?

Koromme isee harsitaaxxi duuchcha elo belo,

harisiteeke agenjo'n ikki woddi kormoole futti hitaan.

25 Lekka atixxenaa'ni kophe muddaa qico'ni gongitoxxe;

qonqo atixxinna wode'e dheebotte baggaa qico'ni doonsa kiyya hitoxxe.

Ati kinn, ‹Tola eloottoxxe,

dharrichcha magenuwwa eeyyeennen;

insa'nee hordofannon› hitetten.

26 «Moodhalchi abidemee wodda shookammashsha,

Isira'eeliki mininna shooke'en;

Insa'ne, moyanjuwwi insa'nekinna akeekisanjuwwa,

qeese insa'nexxinna raagole insa'nexxi ittanni shookkaan.

27 Haqichhco, ‹Ati anke annani›

kinjo kanna, ‹Ati no'o'o ildetten› hine;

Alba insa'neke kadebaang,

dudduro ane'ni wirri hineemmaxxe'e;

Rakko insa'ne'ni geltaa wodda kinni,

‹Daggettexxi no'o anjiri!› hinaan.

28 Yoona, magenooffatotaa giissexxeettak magenuwwi atik haba hedhe?

Rakko ate'n geltaa wodda anjira dandeenna'noole,

koo Yihuda dange atee'e anjirowwaal;

Qachchuwwi atikike lakkosishshann

magenuwwi atikiki laakkossinna ittanni bira sa'eeken.

29 «Mayee'e anee elobaake assitina?

Ha'no duuchchiing ane'n jallattine'eken»

hiyya'neen Duuchchi Woddik Gootti.

30 «Oose ha'noxxe'ni tola boddichcha mura woxisenne;

insa'nenna balleessatenaa'n hingebaan;

Wolaantichchi ha'nook solo'weeke neenqishsha

wabeekole ha'noxxa kutti asse'en.

31 «Koo ha'no konne barike manna Duuchchi Woddike Goottika hiyyichcho qalbeeffatte;

«Ani Isira'eelike ardi'a qiilla gammoojje,

yookaan dimma dukkana hexxeeke boga kadenne?

Anki ardi, ‹Fedhii no'oxxishshann kandona'a hansaanneni›

hinge atibaa dangabe'non mayee'e hiyya'ne?

32 Isinni dancha ifika seesa,

waajubichcho ifixxa wajubummatixxa seemma deeta?

Anki ardi kinn,

laakonne dhaqqanbabaaxxa barra anee'e dedheen.

33 Ati'a jononaano'a assatee hitta hitta barattettexxe?

Adabi elobaakixxi fuggoxxi melaalle midde atenaa'n heddo elobaaxxa barattaan.

34 Moorake'ni abideboxxoxxi

qullitte hiyyeeyyexxi munde,

seemmuwwa atixxe'ni afendeen.

Tenne duuchcha assiteen hexxe'e:

35 ‹Ani qullitteten;

dhugaandinni mufe anee'e geltabaan› hitaatten.

‹Ani kinn ate'ni muraanneni;

cubbo hujeebo'non› hiteettaxxeeten.

36 Dharichchi magenuwwibaa;

mayee'e gongitaatte?

Asoorik mann ate'e salphisemmashshanni;

Gibtseeki manninna ittan ate salphisaani.

37 Ati addattettaka Duuchchi Woddiki Gootti salphiseemmaxxe;

insa'ne atee'e gargaarra gophaammaxxe'e;

Anga atixxa umo atike'ni uggudhdhite;

ookko'n fuldattoni.»