1 Baabiloonik moyanji Naabukadanatsoori Iyyosiyaasika belto Sedeqiyaasi'i Yihuda'n moosise; isinna Iyyo'aaqemike belto Ikooniyyaxxe bakka'ni moye.✝ 2 Yaane kinni isi yookaan ja'laabuwwi, bogiink ardi ani Ermiyaasi insa'ne'n haaso'enneke Duuchchi Woddike Goottike hiyyichchi'a ajajjemmebaan. 3 Moyanji Sedeqiyaasinna, «Duuchchchi Woddike Gootta no'oke Magenibaa no'o'a soodati» hiyyeexxi Shelemiyaka belto Hukaalinninna qeesichcho Ma'iseyaaka belto Sofooniyaasi'i anibaa erge. 4 Eettenee yanna ani Ermiyaasii usurrii mine'ni usurma gopheennaxxee ardi giddo eeyenneshsha fula'nee higa'ennan. 5 Fare'oonik sannachchi Gibtsee'ni fuleemmaxxee, Iyyerusaalemi buqeemmak Baabiloonik manni tennee laqee wodda Iyyerusaalemi'i waaleexxi me'e. 6 Ookkonechchi uduma Duuchchi Woddike Goottik hiyyichchi anee Ermiyaasi'ni dageexxi, 7 Isira'eelik Duuchchi Woddiki Gootti Mageni, «Anee'e qodhdho'aa anibaa ergitinemmaka Yihudaka moyanjo ‹Ha'no gargaaro'a dagaammak Feri'oonik sannachchi Gibstee'a, ifike bogibaa higaan. 8 Baabiloonik manninna higeexxi konnee qachcha lole abideexxi gubaan› hiyye. 9 Duuchchi Woddik Gootti hiyya'ne qici ‹Baabiloonik manni no'o'o waalee me'an› hitina'n heddinoqqe'e; ifinna sobbinoqqee; insa'ne hinge me'inabaan. 10 Ha'noo lola'neeka Baabiloonka manna duuchcha injifattineenaa, mado'eek manni calli dunkaan giddo gatoolenna midde, iikki manni dageexxi konnee qachcha gubaan» hiyye.

11 Baabiloonik loliink manni Feri'oonke loliinike manninaa'n kexxeexxa Iyyerusaalemii'n fuleechchi uduma, 12 ani Ermiyaasi anke ardike jeejinaa'n anee geyaaka qoobbo adhdhonnaa, Iyyerusaaleminaa'n Biniyaamike mannike bogibaa me'a ke'enne. 13 Yaane kinni ani Biniyaamike bitumibaa e'yinammaxxe hulaba geyanno wodda, heqqanjuwwiink sooreessi Shelemiyaak belti Hanaaniki akka'i Yuriyaate hiyyemaak, «Ati Baabilooni'a finqilde me'itotta'aaten!» hiyya'n anee abide.

14 Aninna hiissennexxi, «Waawwo'o! Ani ati hita'etteshsha Baabilooni'a finqile me'onna'atebaan» hiyyenne; Yaane kinni Yuriyaa hiyyennexxa laqa gibeexxi, anee usuree, ja'labuwwiba iyyemare. 15 Ja'labuwwikinna yo'ooshsha aare'e anee gane ke'eexxi ookkone usurriinke mine'n asse'neemmaka borreessanjo Yoonaataanike mine'n anee ussurre. 16 Aninna buttini hundixxe bale giddike minixxe kuta giddo ofo'lannoshsha assemennexxi qeerraxxa yanna ookko turenne. 17 Ookkonechchi uduma moyanji Sedeqiyaasi manjo erge'e mootomatike miniba'a dagannoshsha asseexxi qofiba anee'e iyyemare'e, «Duuchchi Woddiki Gootti ate'n haaso'eechchi hedhee laati?» hiyye anee qore; aninna «Eeti hedheen; ati, Baabiloonike moyanjixxe anga'n sa'issende uwwendatton» hiyyenne.

18 Ookkoneechchi uduma ani Ermiyaasi moyanjo Sedeqiyaasi'i «Anee usudhdhitineegelchi ate'n, atike ja'labuwwa'ninna yookaan konne arda'n maa balleessa hujannalete? 19 ‹Baabiloonik moyanji ha'noonna, konnee boganna lolabaan› hitta'n wabeekumma ati'a haasotteemmaxxi wabeeko haba hexxeta? 20 Ta'atenna kadoole anke gootta moyanjoo ballo'o hiyyaannexxa laqi; maganneten kadhata'annen caqasi; ookko reyonna'a Yoonaataanike borreesanjiinke miniba'a anee'e illeema hissitoxxe'e» hiyyenne.

21 Moyanji Sedeqiyaasinna, ani Ermiyaasi heqqanjuwwixxe baxxe giddo heqema'n hedha'noshsha qachchi giddii'n daabbo mudde'eemmaqico daabbo ra'issammake mannibaa'n barra barra'ninni mitte mitte daabbo ani'a uwwendaashsha ajaje; Tennexxee ani Ermiyaasi heqanjuwwixxe baxxe'n heqqema'n turenne.