1 Kelqiyaasik belti Eermiyaasi haaso'eeki haaso'i konneechchi butta hedheeken; anni isikinna Biniyaamike bogiba Anaatooti giddo hexxeexxe qeesenaa'n mittekemman. 2 Yihudak moyanji Amooniki belti Iyyosiyaasi moyeexxe tommenna sakkaxxe wogga'ni Duuchchi Woddike Goottiki hiyyichchi Ermiyaasibaa dage.✝ 3 Higgeen Yihudik moyanjo'ni Iyyosiyaasik belto Iyyo'aaqemi moyeeke baro'ni; iittanni Yihudiinki moyanji, Iyyoosiyasiki belti Sedeqiyaasi moyemmake baro'ni, tommenna mittixxe woggake muuxami qico'n Iyyerusaalemik ardi booji'emeexxi me'eexxe woggake ondike agenjii qico'n iso'ni haaso'eemman.✝

4 Duuchchi Woddike Goottik hiyyichchi anibaa dage hiyyee qici:

5 «Anixxe amake godobi giddo atee'e dadebe'nogi ege'neennen;

ilendebexxo edi darre atee fi'leennen;

gosa gosake ardi'a wabeeka kaddattoshsha atee'e hariireenneni.»

6 Aninna hiissennexxi «Ee dada duuchchike Duuchchi Woddike Goottaa, ani hitta haasso'aanno qico ege'nennekebaan; ani ooseten» hiyyenne.

7 Duuchchi Woddiki Gootti kinni anee hiyyee qici, « ‹Ani ooseten hitoxxe'e› ani atee ergannobaa duuchcha martetexxi, ani atee ajajennexxa duuchcha haasottattoni. 8 Ani atee anjironna'a atinninni welti hedhennen insa'nee sodaattoxxe'e» hiyya'neen Duuchchi Woddik Gootti.

9 Duuchchi Woddiki Goottinna anga ifixxa qeerrise'e suume anixxa tuqeexxi hiyyee qici: «Kunnise hiyyichcho anka afo'o atike'ni uggeennen. 10 Yoona, goshshottaanna diiggottaa; balleessitottaanna findiggottaa, kaassottaanna ijaartottaa atee gosa gosake arda'ninna moyanjuwwa'ni techcho atee hariireennen,»

11 Duuchchi Woddike Goottiki hiyyichchi; «Koo Eermiyaasi, uudaattechchi maacho?» hiyya'n anibaa dage.

Aninna, «Lewizetixxa siqqichch uudannen» hiyyenneni.

12 Duuchchi Woddiki Goottinna ane'n, «Dhugaande uudetten; hiyyichchi ankinna muuxemaa qico'ni hubatee uudannon» hiyye.

13 Higgeenna Duuchchi Woddiki Goottiki hiyyichchi, «Maachcho uudaatte?» hiyya'n anibaa dage.

Aninna, «Mitte daanfita'neexxa odolcho uudannen; isek afo'inna middii'n konne darre'ni heeshshi hiyye'een» hiyyenne.

14 Duuchchi Woddiki Goottinna ane'ni hiyyee qici, «Middi darrenaa'n ookkone bogake'n hedheeke duuchcha'n dedhanga bala insa'ne'ni ibbaan. 15 Yoonna middi darreke moyanjuwwika arda duuchcha ye'annon» hiyya'neen Duuchchi Woddik Gootti.

«Insa'nek moyanjuwwi dagaan;

insa'ne Iyyerusaalemi'a e'yatixxe huluwwa'ni,

Dalla'uwwa iseke qarqara duuchcha'ni,

Yihudiinke qachchuwwa duuchcha'ninna ifixxa mootuwwa offo'lishinaan.

16 Anee waalleexxi fuggoxxa hunjemmaxxee,

wele magenuwwi'a hixaana gubemmaxxee,

Anga ifixxinn giissinemmachcho'ni magenooffatemmaxxee,

anke arda'ni murte anixxa lallabeennen.

17 «Ati kinn hidha atika usudhdhi; kexxettexxi atee ajajennexxa duuchcha insa'ne'n kuli; insa'nee'e mee sodaat; kada gophphoole ati insa'nee sodaattattoshsha assanon. 18 Yoonna, techcho boga duuchcha'n atee'e ke'issaannen; tinninna Yihudiinka moyanjuwwa, insa'neka sooreessuwwa, qeesenna bogi duuchchika arda injifattattoshsha kinjiinke dalla'inni ijaaremeeke qachchishsha sibiljiinke utuphishshanna sageettotike dalla'ishsha atee asseennen. 19 Insa'ne atee lollaani yaane kinni anjironnaa ani atinni welti hedhennenn insa'nenna atee injifatabaan» hiyya'neen Duuchchi Woddiki Gootti.