1 Duuchchi Woddiki Gootti hiyya'nee qici;

«Iima anxe mooten;

buttatinna lekka anxi haxxaaban:

Eega ha'no ani'a ijaartina'neek mini,

ani hafuura adhdhaanneki mini hitta hedheeke?✝

2 Konneechchuwwa duuchcha anga anxi hujjebata?

konnechchuwwi afemaashsha assennek antebaata?»

hiyya'neen Duuchchi Woddik Gootti.

«Yaane kinni ani konnee,

qajeela kadekibanna irri isiki eenqemeeke,

hiyyichcho anke'ni culphisaake manjibaa uudannon.✝

3 Yaane kinni jibichcha ani'a tolchaak,

manjo anga sa'eeshshaten:

Gedhebiinka beltanjo ani'a shiqishaak,

gooba wolchiinka miccireeke manjishshaten:

Midhatika tolcha ani'a qophpheessaak,

booyetixxa munde ani'a shiqisheeke manjishshaten:

Qallitika hixaana ani'a gunbaaki:

magenuwwa magenoonfata'neeke manjishshaten;

Insa'ne ifika ora fi'line'een:

Lubbo insa'neexxinna fuggoxxa assati gammaddaani.

4 Tennexxee ani rakko insa'ne'ni geltaashsha assannon:

sodaantemalchonna insa'ne'n iyyedagannon:

Ani ye'enne wodda hee hiyyeek,

haaso'enne woddanna anxa laqeek manji hedha gophemmaxxe'e.

Ani edo fuggoxxa yaane assineen:

anee gibissaaxxa yaane fi'line'en.»

5 Ha'no hiyyichcho isike'ni culphisina'neek,

konne Duuchchi Woddike Goottika hiyyichcho laqqe:

«Ha'no dayyuwwa ha'nooka jibbitineek,

anke summixxe hitine fojendineeki,

‹Amme mee Duuchchi Woddik Gootti ulfaate'naa,

ha'nooka gammado uundo!›

kaddo malee shookkinebaak gattinabaan.

6 Qachchi giddo hexxeexxa raare laqqe!

Galmi giddika cancanna caqasse!

Tinninna Duuchchi Woddiki Gootti ye'injon:

Isi naaphuwwa ifikee hasisaachcho duuchcha qoqqoodaan.

7 «Tsiyooni ciniinfatebaangi edo,

ildemmaxxe:

Ciniitoti wixixxi hitebaa edo,

labbaka belto ilde tikendaan.✝

8 Iitta hexxeexxa yaane ayyi laqee ege'neta?

iitta hexxeenxa yaane ayyi uudeeta?

Mitte bogiki ardi mitte barra'ni ilema dande'aata?

yookaan gosa gosak ardi iikki woddi afemata?

Tsiyoonixxi ciniinto safonge'ni,

oose ifixanna ikki woddi ildaan.

9 Ilatee shiqqeexxa,

ildabaashsha assannoketa?» hiyya'neeni Duuchchi Woddik Gootti.

«Ilda wodda,

gadaameessa iseka cufannokeeta» hiyya'neen atik Mageni.

10 «Iseke hado kaddineek duuchchi,

Iyyerusaaleminni welti gammadde:

Isexxeenna ililise:

Ise'a ooxinemmaki duuchchi,

isenni welti yo'oshsha gammadde.

11 Dayyeessa'neeka iseka ununuwwa,

unu'nitinaan: godditinaan

Godditinaa qico'ni ha'witinaan:

bira saxxeexxe isexxe karranni gammaddinaani.»

12 Duuchchi Woddiki Gootti hiyye'nee qici:

«Kunnise nage'a gallaanike wodi'ishsha ise'a dinbiliqqi assannoni;

mootumuwwatixxa karranna yaasumiinke wodi'ishsha kanba kanba assannoni;

Unu'nitinaani: isexxe boba giddo hanqalfendinaan:

gulubo iseke'ni hana ofoldine kookisendinaan.

13 Ama finna ifika doggammashshanni,

aninna ha'no dogannon;

Iyyerusaalemi giddonna dayyatinaan.»

14 Tenne uuddinaa wodda, qalbe ha'nooxxi ililissaan:

micci ha'nokinna badda'atishsha haanjedhaan:

Duuchchi Woddike Gootixxi anga isike erganjuwwinni welti hexxeexxa egendaan:

mufe isixxi kinni isoo gibaake manna'ni geltaani.

15 Kunnise Duuchchi Woddiki Gootti giiratike bubenjinni dagaan:

sarageeluwwinna hobonbaltetishshaten:

Mufe isixxa aareti,

xixichchokanna giiratike bubenjinni leellishaan.

16 Giiratinna wolaantichchi,

Duuchchi Woddiki Gootti murte isixxa manjo duuchcha'ni iyye dagaan:

Duuchchi Woddike Goottik wolaantichchinni dulemaaki heddoke kadaan.

17 «Booyyetika maalanna lama'e itaan wele battootteexxa yaane itaake manni giddii'ni mittiinxa duuka hiddichchuwwiinke fichchi giddi'a me'iyyotee ifi foyaakinna ifi ca'a assaaki metteba mudaan» hiyya'neen Duuchchi Woddik Gootti.

18 «Ani huje insa'neexxanna yaada insa'neeka ege'nennaxxee gargariti hedheeke laagadika arduwwa duuchcha bukki asse'naa dageexxi; ulfinna anka uundaan.

19 «Insa'ne giddo beesisa uggannon; reyebaaki gateekeribaa'n anxa yaane laqebaakenna ulfinna anka uuddebaake gargaritti hedheeke ardibaa Terseesike ardibaa, Libiyake ardibaa, gabe darbataake Lidiyaake ardibaa, Tubbaalike ardibaa. Girkeeke ardibaa, bayya hexxeexxe giddichchuwwabaa ergaannoni; insa'neenna konne gosa gosake arduuwwi giddo lummine anka lallanbaan. 20 Insa'nenna ha'nooka Dayyuwwa duuchcha Iyyerusaalemi hedheeke anke Woyyichcha galmiba'a fadhaduwwake'n, fadhadiinxe gaaruwwa'ni, ganguwwate'n gaaluwwake'n gulufinse gargari hedheeke boganaa'n insa'ne iyyedagaan uwwatishsha iyyedangaan» hiyya'nen Duuchchi Woddik Gootti. «Isira'eeliki ardi ani'a midhatika tolcha seeriki ca'ichcha miya'ni Duuchchi Woddike Goottike Woyyichchi Galmibaa shiqinshammashshanni tennenna shiqinshaan tenne hiyyeneki ante Duuchchi Woddike Goottan. 21 Aninna insa'ne giddii'ni mitte mitte qeesenna Leewwitote kande ani'a ergantaashsha assannoni.

22 «Ani dadaannexxi haaroxxi iimuwwannaa haaroxxi butta duuchchi woddi'a ani edo ti'ni hite hexxammashshanni» Duuchchi Woddik Gootti hiyya'nee qici, «Iittanni ha'nooxxi hortenna ha'nooxxik summinna ti'ni hiyyee hedhaan.✝ 23 Agenjo agenjo'ninni baate fuldaaxxe taakkaxxe barra'ni baate fuldaake ayyaani qico'ninna Sanbatakenaa'n Sanbaati qico'ni gosa gosaki ardi duuchchi anee magenoonfato'a ani edo dagaan» hiyyee'neen Duuchchi Woddik Gootti. 24 «Insa'ne Fulle me'inna wodda anee gibemaake maniika rensha uundaan; insa'nee ittaaxxi coroqa hara rertaaxxebaan; insa'nee gubbaaxxi giiranna xoxxaaxxebaan; insa'nee uuddexxi manjiinxi sanne duuchchi corifataan.»✝