1 Haanjaaxxe dhooqaxxe xungo'n hana hedheeke Samaarake qachchi'a aanne'e!

akeekisanjuwwi iseki ha'we machcho'a'neekeran. Yaane kinni insa'ne bage harca'aamake daraarishsha kandaan.

2 Kunse Duuchchi Woddiki Gootti jabaxxanna worbiteexxa yaane afe'een;

tinni kaadetixxe hobonbalteshsha, balleessitammaxxe hobonbalteshsha

Hunnaameessa danbala'ishsha, jabake xeenishsha

hunnati isee butti'a darbaan.

3 Efireemike machcho'alluwwiki ifi saadatik kallachchi

lekkati hirbeessemaan;

4 Quffeexxe dhooqaxxe xungo'n hexxeexxi

isike ulfinniixxi danchumma kade'eeke qooreek daraari

Midha bukki asseccatixxe yanna edi darre

manjikinna dedhange'n isee afeexxi qocedhammaxxe

iikki woddi isee liqinsammaxxe balaseshsha kaddaan.

5 Eettene yanna Dada Duuchcha Ajajaak Duuchchi Woddiki Gootti

gateeke ifike ardi'a

Ulfinniinke kallachcha

danchummatike seesa kadaan.

6 Isinna murtetixxe moote'n ofo'laake

dhugaatika hafuura

Bagedokannaa qachchiinxe hulanaa'n ille iima hiissakeri'anna

hunnatixxe muume kadaan.

7 Kunniir woyintixxe bookanni gatantarra'neen;

machchoossitaaxxe ha'wanninna tinitimaan;

Iitti qee'lonna wabeeko machchoossitaaxxe ha'wanni gatantarte

Woyinetixxe bookanna yaane insa'nee dommi assite;

Maachchositaaxxe ha'wanni tinitimme;

waleella unda wodda dedhake'n inbaan;

murte uuna woddanna guggufantaan.

8 Indammaxxi qoruwwa duuchcha honqo'oti wo'miteen;

honqo'otinna hanqateexxe bakka hexxeba'a.

9 Insa'nenna hinee qici, «Ayyete barachchiisaane isi?

erga eettene isi ifisa'neek ayyi'aate?

Ununa waldeexxe annoole'aate?

yookaan guuteexxe annoole'aate?

10 Ajajange'n ajaja, ajajange'n

ajaja

aadande'n aada; aadande'n aada*

kaba heenoxxi ookkonna heenoxxe kaddaan.»

11 Kunse Magen

alagiinke haaso'inni haaroke laagadinni konne ardi'a haaso'aan.

12 Isi

«Tinni hafuura adhdhatixxe bakkanni; shaqqakinna hafuura adhdhowwaal;

Tinni hafuura hiissedhatixxe bakkan» hiyyeek ayyi'aatemma?

insa'ne kinni laqa eeneba'a.✝

13 Tennexxee Duuchchi Woddiki Gootti hiyyichchi

ajajange'n ajaji, ajajange'n ajaji

aadande'n aada aadande'n aada

kabaa heenoxxi ookkonna heenoxxe insa'ne'n kaddaan;

Tinninna insa'ne'n kadda'neechchi marreexxi udumi'a inbaashsha

madoonnashshanna fonxorote'n abidemmashsha

booji'emmo'aaten.

14 Tennexxee Iyyerusaalemi hedheeka arda galchitinaak

ha'no coortinaak Duuchchi Woddiki Gootti hiyya'neexxa laqqe.

15 Ha'no «Reyoti welti weli kako angeenneni;

hundike wiiddinninna weli aangeennen

Dharakanna ifike golla assineennen;

sobokanna ifixxe irko assineenne;

Jabaxxi ba'ne filta'n saxxaa wodda

no'o kisa dandetabaan» hitina'ne ifi saadine'een.

16 Tennexxee Dada duuchchika Duuchchi Woddiki Gootti hiyya'nee qici:

«Kunni, hega uudemeeka kinjo, boosotika kinjo

jabaxxe booso'a kadaaka fiixe'eeka dhaaddoti kinjo

Isoo Tsiyoonixxe booso'n uggannon;

iso'n amanaakinna salphataba'a.✝

17 Dhugaatixxa murte wodaro,

qullummatanna miniixxe boosotixxe mike assannon

Gollatineek ha'noka dhara kaadetik xeeni itti ganaan

umo uggitinammaka boonchonna lola'i fiyee balleessaani.

18 Reyoti weli aagginemmaxxi weli aaggo gattaan;

reyemmaki manni hedhemmaba'ninna aagginemmaxxi kakonna diigendaan;

Jabaxxi bala ha'noo gudhdhita'ni saxxaa wodda,

ha'no'aanna ba'nendeni.

19 Ise daggeexxe qixxe'ni ha'no adhdhe me'aani;

ise gorsa gorsa, hashshannaa barra

gudhdhaan.»

Konne Mageniinka hiyyichcho qalbeefattineele

weekenshatende'n weekensha lebaan.

20 Kunni manjichchi lekka diriirseexxi taqete'ni diiphabaashsha taqe harumaaxxen

biso buqedhabaashsha buyyedhaaxxi seemma harumaaxxen.

21 Duuchchi Woddiki Gootti huje isixxa eeti mambe'a isika hujatee

assaaxxa, haaroxxa yaane assatee

Pheeratsimixxe kooba'ninna assemmashsha ke'aan

Gaba'oonixxe dhooqa'n assemmashshanni ta'anna assatee ke'aan.✝

22 Tennexxee coora ha'nooxxa waalle

iitta kada gophphoole usuraak ha'noo heqqaan

Dada Duuchcha Ajajake Duuchchi Woddiki Gootti

boga duuchcha balleesso'a lasse mudhdheexxa laqeennen.

23 Caqasse hiyyaannexxa laqqe

qalbeefatte hiyyichcho ankanna caqasse.

24 Wiisallichchi midhatika fichcha sammi hiyye huccaa?

qote gangane buttina shaqishebangi kaalsaak hedhaata?

25 Fichcha qophphessedhe

xillooxxa qimamenna kemuuni hinaaxxa qimame rokaba

Dinnetanna

so'a hasisaa booncho'ni

iittanni ajjiinxa gummanna qophphessemeke booncho'ni rokabaata?

26 Isiki Mageni barachchiisaan,

toggichcha oranna isi'a leellishaan.

27 Xillooxxi qimamenna uxxisanjiinke miyinni uxxendaba'a;

Kemuuni hiyyendaaxxi qimame'ni sarageeliinxi mole hana me'itaba'a

Xillooxxi qimame kutik

Kemuuninna sibiljiinxe siqqonni uxxendaan.

28 Buddeena ra'issatee midha dayendaan

tennexxee mitti manji duuchchi woddi'a midha uxxa'ni hedhabaan

Uxxatixxi sarageelixxi molenna fadhadi ise hana me'eexxenna kaddoole

fadhadikinna isee bulleesaba'a.

29 Kunni beekkumi duuchchi afemeeki

lumoke kadeeke

Dada Duuchcha Ajajaak Duuchchi Woddike Goottinaa'niten.