1 «Waleellatixxa dhooqa» hiyyemaake boonchi'a kulemeeki hiyyichchi konnechchinni butti'a hedheeken;

Ha'noo maachchi rakkisammalete

duuchchiingi fooqete'n hana fuldineeki?

2 Koo ati canci wo'me'eek qachcha

weekenshatikinna fenxeyatike qachcha

Ati giddo shiyemeekiir wolaatichchike reyeekebaata

bagedoke'n rennebaan.

3 Atik akeekisanjuwwi duuchchi mitteba baaje'een;

mogido midde darbinebaak booji'emmeen;

Naaphi iikki bayyanni hedhee'naa baajjineeki duuchchi

abidendineexxi mitteba usurendineen.

4 Tennexxee «Hiiqqise oodhonnaa

anenaa'n bayyatte.

Anke ardixxe ba'ne'a

anee dayyeessitino'a wolaadinoqqe'e» hiyyeneni.

5 Dada Duuchcha Ajajaak Duuchchi Woddik Gootti

leellatixxe dhooqa'n

hunbaashshatixxa hirbessematixxannaa weekkematixxa

Dalla'uwwa diigatixxa

koobuwwatiba'a raaratixxa barra afe'een.

6 Elaamike mogidiinka gonofa

ifika fadhadonna fadhadiinxa gaaruwwa qophpheesse;

Qiirinna ifixxa wonte dobbe.

7 Atixxi elollamma dhooquwwa'n atik sarageelluwwi wo'meen;

atik fadhadi ookkone qachchixxe huluwwa'n uurre'een.

8 Yihudaki dalla'uwwi duuchchi diigemeen;

eettene yanna miyiinke mine'n tuulemeeka

loliinka miya afette.

9 Daawwitike qachcha'n

ole bira saxxeexxa uudine'een;

Aadi gamike balleessanaa'n

wode'e candine'en.

10 Iyyerusaalemi giddo hexxemmaxxa meelalle laakkotineen;

dalla'uwwa qammalchatee minuwwa diiggineen.

11 Olmke baleessanaa'n kadaaka

lame dalla'uwwixxe oddo'n wodi'i camemmammaachcho giissitineen;

Yaane kinni tenne asseeka uuddinebaan;

edo hedeexxi hujeekanna qalbeefattinebaan.

12 Eettene yanna Dada Duuchcha Ajajaaki Duuchchi Woddiki Gootti

ooxxinaashshanna hunbaashshitinaashsha

Umo ha'nooka haaxxitino'a

yaaddotixxa seemmanna oddo'witinaashsha ha'noo ye'ennen.

13 Yaane kinni xoo'mama galatinna gammashsho

gedhechchokannaa ha'yeeka saayya duldineen;

maala ittinaa wodda woyinetixxa booka ha'wa hexxeen;

«Soodonni rennaannen

telcho indo ha'wino!» hitineen.✝

14 Dada Duuchcha Ajajaak Duuchchi Woddiki Gootti «Lubboti he'nee qico'n tenne lumoxxe balleessa'a insa'ne'a gattowwaali hiyyendaabaan; tenne hiyyeenneki ante dada duuchcha ajajaanneke Duuchchi Woddike Gootta Magenon» hiyye ane'n kule.

15 Dada Duuchcha Ajajaaki Duuchchi Woddiki Gootti hiyya'nee qici:

«Martettexxi konne mineka umo akeekisanjo Saaminaasii hitatto qici;

16 ‹Kaba maa assitaatte?

tenne bakka ati ifi'a hirreessink booncho qopheessitottaan,

konne qephphina'n moogendattoxxa bakka bocexxe giissexxottaan,

renshi atiki hedhaaxxa rassa qottotto'a aate ati'aa eetti uwwe?›

17 «Koo ati worba manjo xexxe'ati;

Duuchchi Woddiki Gootti atee jabeesse abido'aanna anga ifixxenni atee qolaancho'aaten.

18 Wirisse wirisse buffiinsha atee

ba'lake bogibaa atee qolaanchaan;

Ati atike minike goottike salphine kaddatton;

ookkonna rertatton;

atike ulfinnik sarageelluwwinna ookkonn gataan.

19 Atike baallomixxe bakkanaa'n atee dirrisannon;

affetexxe hujenaa'ni shorrendaton.

20 «Eettene yanna erganjo anke Hilqiyyaasika belto Eliyaqeemini ye'issannon; 21 Atixxa ulfiniinxa seemma iso'n oddeessannon; sabbata atikanna isi'a uwwannon; ate'n hexxemmaxxa baalle sa'isse isi'a uwwannon; isinna Yihudiinkenna Iyyeerusaalemi hedhaake ardi'a anniinsha kadaan. 22 Daawwitike minixxe qulfeeka banisanjo isi'a uwwannon; isi baneeka cufaaki, isi cufeeka dande'e banaaki hedhebaan. 23 Ani iso miya fannissammake jabake fansanjishsha jabeessannon; isiki mini hadi duuchchi isi darree'n ulfaataan. 24 Yaanne kinni isika mini hadonna bayyika isika fira duuchcha gargaaraaki isote kadaan; Siinetenaa'n waabiin qico'n hedheeka mini giddika miya duuchcha miya fanninsammak ba'isanji ba'edhammashshann insa'nee ba'edhaan.

25 «Eettene barra'n» hiyya'neen Dada Duuchcha Ajajaaki Duuchchi Woddiki Gootti, «Tinni duuchchi kaddaaxxa yanna kinni jabaki miya fanninsammalchi gosheme ibaan isi hana hedhemmaki miyi duuchchinna ibe enqemaan» tenne haaso'eeki Duuchchi Woddike Goottan.