1 «Gosa gosak ardi isi hunda galaashsha,

Moyanjuwwa galchatenaa'n hoyyaashsha,

qachchuwwiinke dalla'ixxi huluwwa isi'a banedaashsha;

Middixxa isixxa anga abide hariire moyanjo asseka

Qiroosi'i Duuchchi Woddiki Gootti hiyya'nee qici,

2 Ani ati edo me'annon;

koobuwwatanna dirrete assannon;

sageettotike sibiljxxa huluwwanna sibiljiinka danqarsanjuwwa eenqannon.

3 Dukkanate'ninna qoonnete'n tuulendeexxa karra ati'a uwwannon;

ookkonechchi uduma atee summa atikenni ye'eneki Isira'eelike Duuchchi Woddike Gootta

Mageni ante kadennexxa egendatton.

4 Fi'leenneka anka Isira'eelika arda gargartattoshsha,

ati anee ege'na gophphoottolenna midde summa atika gane atee ye'ennen;

ulfinniinka summanna ati'a uwweennen.

5 Ani Duuchchi Woddike Goottan, ani gadho weli ayyinna hedhebaan;

anee malee weli Mageni hedhebaan.

Ati anee'e ege'na gophphottolenna midde jabeenna ati'a uwwannon.

6 Tennenna assaaneki arishsho fuldaabaa'n arishsho aggaa qico'n hedheeki mitti mittingi

Ani calli Duuchchi Woddike Gootta kaddeennexxanna anee malee weli Mageni hedhebaaxxa ege'naashshaten.

7 Ani nage'akanna yaaddo;

eloxxanna elobaaxxa iyyedagannon;

an Duuchchi Woddiki Gootti tenne duuchcha assannon.

8 «Ha'no iimate'ni hexxineexxe iimuwwa! Qullumma xeenishsha iimii'n butti'a gansiise;

duumanchikinna butti'a coccobowwaali;

buttinikinna haanni hiyyowwaal; anjiratinna lattowwaal;

ani Duuchchi Woddiki Gootti dadeennake kadennaxxe'e qullummatinna anjira welti lattowwaal.

9 «Isoo giissemmake moromakee aanne'e!

Isiqqa wele faariinke miyishshande;

Mitti faariinki miyi giissammaka manjo

‹Maachcho assitatte?›

‹Anga affebexxoo?› hiyye dande'e qoraa?✝

10 Anna ifika belti, ‹mayee i'litette› hiyyaakee,

ama ifixxanna, ‹mayee ildette?› hiyyaakee isi'a aanee.

11 «Duuchchi Woddiki Gootti Woyyichchi Isira'eeliki Magenina

Dadekinna

Anxe oosexxe ane qortino'aanna

yookini anga anxenni hujenedeexxa huje

anee ajajjino'a seeri ha'noo uwwa?

12 Butta dadenekinna

manjokanna dade buttate'n hedhdhaashsha assenneki anten;

Anga ani iimuwwa diriirsite'en;

iimate'n hedheechcho duuchcha ajajanneki anten.

13 Dada Duuchcha Ajajak Duuchchi Woddiki Goottinna Qiroosii qullummatixxe huje'a ke'issennen

orakanna isi'a qajelchannon;

Qachcha anka Iyyerussaalemi haaroba ijaraan;

booji'emeeka anka arda booji'otenaa'n fulchaan;

tennenna assa'neexxe ayyinna maallaqa isi'a uwwo'a

yookaani eloxxa isi'a asso'atebaan» hiyye.

14 Duuchchi Wooddiki Gootti, hiyya'nee qici:

«Gibtsexxinna Tophiyiinxi karra ha'nooxxe kaddaan;

Ejjuma qeqerarami Saabaki manninna

insa'nenna atiba dangaan:

Atike kandaan:

insa'nenna ate udumii'ni hordonfaan;

haachchabik usuremme atiba dangee

ati edo saganda'n

‹Dhugaandinni Mageni atinni welti hedheen

isi gadho weli Mageni hedhebaan› hine atee kadhantaan.»

15 Isira'eeli'i anjirtatoke Mageno!

Dhugaandinni ati ifi shoxxatoke Magenon.

16 Magenoonfantaaxxa fakkuwwa giisaki duuchchi shookee salphataani;

duuchchingi mitteba salphataani.

17 Ha'no Isira'eelike arda ani Duuchchi Woddiki Gootti kinni hunna anxenni

duuchchi wodda ha'noo anjirannon;

duuchchi woddi'anna shookinna salphinni ha'no geyabaani.

18 Iimuwwa dadeeki

isi Duuchchi Woddike Goottaba;

buttatanna bifa affashsha giiseeki, dadeeki;

boosotanna giiseek

manji ise giddo hedho'ate malee'e,

Duwwike kaddo'atebaani:

«hiyya'nen Duuchchi Woddiki Gootti

Ani Duuchchi Woddike Goottan

anee malee weli hedhebaani.

19 Dukkana giddo

sho'iki haaso'ebo'noni;

Ya'iqoobixxe sanne'a

‹Tola bodichcha ane'e halse› hiyyebo'noni.

Ani Duuchchi Woddiki Gootti dhugaate haaso'annoni;

seerinxa yaane kulannon.

20 «Bogi bogii'n booji'otena'n gattine daggineeki,

mitteba bukki hitine amme!

Magenoonfantaxxa haqichchiinxa fakke abixxe mammaremma'nekanna

dandeette fayyissabaaxxa fakkuwwaba soodata'neek

ardi ege'na anfeekebaani.

21 Yaada ha'noka farri assitine haa'so'we;

mittebanna bukki hitine mar'atte;

bireke baro'n haaso'eki ayyete?

Ante Duchchi Woddike Goottabaa?

qullichchakenna anjiraake kadeek Mageni

anee malee weli hedhebaani.

22 «Anee malee weli Mageni hedha gopheemmaxxee,

ha'no buttatixxe gabala qico'n hexxineeki duuchchi

aniba'a higgine fayye

23 Jijjiremabaaka hiyyichcho afo'o ankeni haaso'enaxxe'e ifi'n kakateeneni.

Tennexxee gulubi duuchchi ani'a gulufataani;

arabi duuchchi summa ankenni kakataani.✝

24 Insa'ne anxe'e hina'ni haasonnaa qici, ‹Qullumatanna hunna

uwwaaki lumok Duuchchi Woddike Gootti'a callan› »

Insa'ne'ni mufeti ke'aak duuchchi

isiba dageexxi shookaani.

25 Yaane kinni Isira'eelixxi horte duuchcha

anee Duuchchi Woddike Goottini qulloome ulfaantaan.