1 Anike jaalike woyinetike hiddichchi'a

jaalalatixxa faaro faarso

Jaali anki yo'oshsha shamoxxe kaddeexxe tullo'ni

woyinetika hiddichcho afeemman.

2 Fichcha ookkone ko'we kino giddii'n qoce bire

eloxxe sanneka woyinetika hiddichcho kaase;

Fichchi giddonna heqedhatixxa xellebo ijaadhdhe;

bale umeexxi woyinetixxa gumma miicaaxxa bakkanna giisse.

Ookkoneechchi uduma eloxxa gumma gummisaashsha heqqedhe;

yaane kinn woyinetiki hiddichchi qaraartaaxxa gumma gummise.✝

3 «Ha'no Iyyerusaalemi giddo hexxina'neeke koo Yihudiinke arda!

Anixxennaa anke woyinetike fichcha ankixxe oddo'ni amme murte uwwe.

4 Ani assennexxe iimi darre konne woyinetike fichchi'a

wele isi'a assemiyyo hasisaaxxi maachchomma?

Mayete'ni eloxxa gumma gummissaani hiyya'n

heqqedhaa'naa mayee majajjaaxxa gumma gummisse?

5 Yoona anke woyinetike fichcha'ni

maa assannexxa ha'no'ni kulo:

Isi'a ijaarennaka dalla'a diige balleessannoni:

dalla'uwwakanna diigannon

biniinchi ita'ni hirbeessaashsha assannoni.

6 Ookkoneechchi uduma ququme giissabe'non kuufisabe'non:

bago boga assannon,

gorikinnaa ute itti lattaashsha assanoni:

Xeeni ganabashsha

Duumancha ajajannoni.»

7 Dada Duuchcha Ajajak Duuchchi Woddike Goottiki

woyinetik fichchi Isira'eelike ardan

Yihudaki ardinna

gammashsho isixxike hiddichchon.

Isinna dhugaatixxa murte halseen; yaane kinni munde dunedaa'naa afe;

yaane kinni dhugaa gorsine arda raarshinshe.

8 Mitti boonchinna weleke hedhabaa qico'ni

minenge'ni hana mine lebat

Bogange'ni hana boga lephphitine abixxatti

arda giddii'ni fulchitina'n qofitinni barqaaqqine hexxina'neeke ha'no'aa aanne.

9 Dada Duuchcha Ajajak Duuchchi Woddiki Gootti mansha anixxi laqqa'naa hiyye haaso'ee qici,

«Lumolli minuwwi duuchchi diigemee onake kadaan:

elolli minuwwi giddo hedhaak manjinna afemabaan.

10 Shoole hekitaareke boga'ni kansexxe woyine saddeeta neetiro booka calla kaddaan: mitte dhibbanna saddeeta tomme killo ronkeexxi midha tommenna saddeeta killo calla aaggaani.»

11 Machcheessaake ha'wika hasito

bariisa diiphiin ke'a'neekeeri'a

bubbi talli assaa qico'n woyine ha'wati

soodisaakeri'a aane!

12 Itate'ninnaa ha'wate'ni masinqonna kiraara

okolekannaa suusu'le iittanni woyinetixxi bookanna hedhdhaan;

Yaane kinni Duuchchi Woddik Gootti hujaashsha bakka isi'a uunebaan

egenne isixxe huje'a isoo galateefantebaan.

13 Tennexxee anki ardi

ege'na afa gophphemmaxxe'e booji'emaan

Hayyooletinna solo'ik rertaani

ardikinna wode'e dheebo'we gubataan.

14 Tennexxee hirreessi adda haani hiyye

insa'nee heqqedhaani geyeeni hiyyabaan:

Iyyerusaalemixxa hayyoolenna mitteba bukki hiteexxi gammadaaken welti

ookkonne ardiba liqiinsemaani.

15 Manji duuchchi shookaan

hollammaki duuchchi salphatan.

16 Dada Duuchcha Ajajak Duuchchi Woddiki Gootti kinni dhugaatixxa murte murati ulfaataan:

woyyichchi Magekeninna dhugaa hujati woyyichchumma ifixxa leellishaani.

17 Gedhebiink buruusuwwi, edo allalemmamaba bobba'aan;

ha'yeek re'etiki buruusuwinna qachchi diigememmaba badda'a dheedaani.

18 Dhara haaso'aati cubbote'ni ibaake,

balleessatanna sarageelik harkissina'neeke'e ha'no'a aanne!

19 No'onna illeti undannoshsha

Duuchchi Woddiki Gootti hiyyemmaxxa rake assowwaal:

hujetanna muddansowwaal

Isira'eeliki woyyichchi Mageni hedemmaka yaada

no'onna egennannoshsha shiqqowwaal

muuxowwali hiyyaake duuchchi'a aanne!

20 Eloxxa elobaaxxe,

elobaaxa eloxxe hiyyaake'e

Dukkana ifaake

ifakanna dukkanate assakeri'a

Xe'maachcho qaraarake

qaraarak xe'make hiyyaake aane!

21 Ifi qarote asse uudaake

ifike yaadinni beekichchake ifi assaake manni'a aanne!

22 Woyinetixxa booka ha'wati jannomaakee

machchossitaaxxa ha'wa makiyote'e soda'a gophaakee aanne!

23 Matta adhdhiyoti balleessanjo balleesesbaake,

balleessebaaka kinni dhugaa'a alfabaashsha seera gorsaake manni'a insa'ne'a aanne!

24 Tennexxee giira hicaacekanna huura itte birtammashshani

korikinna giirate'ni iteme ba'ammashsha

Insa'neeki hiddinna iittann alo'aan

daraari insa'neekinna huurake kade gataan

Dada Duuchcha Ajajak Duuchchi Woddik Goottika seer tuffantemmaxxee

Isira'eelik woyyichchi haaso'emmaka hiyyichcho shollinshe'en.

25 Duuchchi Woddike Goottixxi mufe ardake'ni ibbe'een

isinna anga ke'isse insa'nee ganeen

Koobuwwa sheke shekete;

renshuwwikinna orake'ni hunemeeke kora kade.

Kaddo malee kinni tinni duuchcha kadde'naa'n mufe isixxi ille iima higgeba'a;

anga isixxinna qophphiteeshshanni hexxeen.

26 Duuchchi Woddiki Gootti bayyii'n gosa gosaka arda ye'o'a

beesisa uurrisaan;

Buttatixxe gabala duuchchanaa'n insa'nee ye'aa;

insa'neenna wii'nama'ni dangaan.

27 Insa'ne giddii'n mittikinna shaqqaaki guggufataaki hedhabaan:

mugaaki diiphaaki hedhabaani:

Mixe insa'neexxi laffabaan:

kophe insa'nexxiki usurrinna ta'abaan.

28 Bagedi insa'neeki qaraken,

gabe insa'neexxi qophphooteexxen:

Fadhadi insa'neekixxi kotte cabbetishsha jabaxxen:

insa'neeke sarageeluwwixxi moluwwa hobonbaltetishshaten.

29 Insa'nenna neenqinsha ittannaani.

Oosichcha neenquwwishsha baroondaan:

Neenquwwi adame abidemmachcho gurura'n adhdhee me'aani;

ayyinna angii'ni ibisaaki hedhebaan.

30 Eettenne barra'n

abbaayyatike danbala'ishsha luula'ni Isra'eelike ardiba'a dagaan:

Ayyinna boga uudaa wodda

dukkanatinna rakko buqqee'naa anfaan:

duumanchakenaa'ni kexxeexxa ifikinna dukkanaani.