1 Tee Tsiyooni! Ke'i; dammaqi!

Hunnatanna oddo'wi!

Woyyichcha Iyyerusaalemike qachcha!

Atixxa danchitte seemma oddo'wi;

Jila ofo'lebaakinna batto'eki manni

konneechchi edi'a atike dalla'i giddi'a e'yabaan.✝

2 Tee booji'endeettexxe Iyyerusaalemi!

Kexxetexxi buko atixxa hargulfi mootete'ninna ofo'li;

Ha'no booji'endineeke Tsiyoonike manna;

goobake'ni usudhdhitinemmaka haachchaba fulchite huni.

3 Duuchchi Woddiki Gootti arda ifika hiyya'nee qici,

«Hiri belo gurgurendeemman;

Maallaqi belo wodendinaan.»

4 Dada duuchchik duuchchi Woddik Gootti hiyya'nee qici,

«Sirnde'ni anki ardi hedho'a aade Gibtsee me'e;

udumii'n Asoori mitte buutobelo arda anka wixxixxi asse galche.

5 «Ani ta'a kabaa maa afeene?» hiyya'neen Duuchchi Woddik Gootti.

«Ardi ank mitte buuto belo adhdheme'een;

isoo galcheekiir insa'ne'n gacifate'een»

hiyya'neen Duuchchi Woddik Gootti.

«Barra duuchcha

summi ank cita belo yowema'neen. ✝

6 Tennexxee ardi anki summa anka ege'naan

eettene barranna

Edisennexxi haaso'ennek ante kadennexxa qalbeefanta;

kunse anende» hiyyye.

7 Koobuwwate'n uurteexxi

eloxxa odo aaxxe daggaaxxe lekkaka

Nage'a haasotaaxxiir

eloxxa odo lallabbaaxxiir

Anjire lassitaaxxiir

Tsiyooni'ninna

«Atiki Magen moyedheen» hiyyaakiir hittata biifomeekera.✝

8 Laqi, atik heqqanjuwwi hafuura gikki asseexxi

mitteba ilillisat faarsaan;

Duuchchi Woddik Goottinna Tsiyooni'a illee iima higaa wodda

ille ifixxeninna uundaan.

9 Ha'no tee Iyyerusaalemixxe ole,

mittebanna ililisati faarse,

Duuchchi Woddik Gootti arda ifika dayyeese'een;

Iyyerusaaleminna wode'een.

10 Duuchchi Woddiki Gootti mootummuwwa duuchchi edo,

woyyitte ifixxa hirre leelisha;

Buttatixxe gabala qico'n hedheekiir duuchchi,

Mageno no'okixxa anjira uundaan.

11 Ha'no Duuchchi Woddike Gootitka miya ba'exxinaakiir

foyemme, foyyemme; ookkoo'n fulle;

battitte yaane tuqqi hiyyee;

ookko'n fulle luqqinnayye.✝

12 Kaddo malee wiinamik fuldinabaan;

baajinenna me'itinabaan;

Duuchchi Woddik Gootti ha'noo edii'n me'aan;

Isira'eelik Mageni ha'no'aa kiphaake kadaan.

13 Uudde, garbichchi ank hujaak qalbeefachchotiten;

isi gurra fuleeke kadaan; kubbisemaan; lumoshsha ulfeesemaan.

14 Heddi manni iso'n henkekki hiyyaa qico'ni

dhagga isixxi ayyee'ninna manjokenaa'n gargar higgeexxe,

manjiinke belto duuchchanaa'n cuqurto'een.

15 Tennexxe heddo gosa gosaxxi mootummuwwa saadaan;

isixxe buuto'a mootummuwwa afo'o abixxitaan;

Insa'ne'n kulendebaaxxe anfaan;

lanqebaaxxanna qalbeefantaan.✝