1 Dada duuchchik Duuchchi Woddike Goottik Hafuuri ane'n hedheen;

hiyyeeyyetee eloxxa odo lallabonna'a

Duuchchi Wodik Gootti anee hariiredheen;

Qalbe insa'neexxi enqendeekara qammachchannoshsha

booji'emeekaranna leexumma

usuremeekiiri'anna tikensha lallabannoshsha anee erge'een.✝

2 Eeyyendeexxa Duuchchi Woddike Goottixxa wogga

no'oke Magenixxa halo fulatixxa barra lassannoshsha

Oodhaakara duuchcha dayyessonna'a anee ergeedheen.✝

3 Tsiyooni giddonna yaadeekara jajjabeessannoshsha

Bululiinxa bakka

danchummatika kallachcha insa'neeke umo'n uggonnaa

Oodhishshatixxa bakka

gammashshotixxa zayite umo insa'neeki hana dhangalaasonna'a

Cumummi hiyyeke irrixxa bakka

galatiinka ejja insa'ne hana lebe oddeessonna'a anee erge'een;

Insa'nenna isik ulfinni itti leellaake kandaashsha

Duuchchi Woddik Gootti insa'nee kaaseeke

qullummatike haqichchuwwa hiyyemme ye'emmaan.

4 Insa'ne olmixxa ole hiissine ijjaarraan;

edi wodda baxxemmaxxara haarooba urrinsaan;

Heddo ila edi darre baxxemmaxxa

oluwwatik qachchuwwi langaxxa qammachchemaan.

5 Alagi manni ha'nooka gedhebo allalaan

wele bogik manni ha'nooke fichchcha'inna ha'nooke woyinetike hiddichchike fichcha'n ha'no'a hujaan.

6 Ha'noonna Duuchchi Woddike Goottixxe qeese hiyyendinne ye'endinaan;

no'oke Magenixxe garboole hiyyendinaan;

Gosa gosaxxe mootummuwwaxxa karra ittinaan;

insa'neeke qabeena'inna ifi saaddinaan.

7 Ardi ank ifike salphinnixxa bakka

lame anga qoobbo adhdhaan;

ifike saphinnixxa bakka

ifixxe karra'n gammadaan;

Ifike bogika lame anga qoobbo dhaalaan;

Duuchchi woddik gammadinna insa'neeke kadaan.

8 «Ani Duuchchi Woddik Gootta dhugaa assa eeyyannaxxee

mulqedhatannaa balleessa huja jibbannon;

Xuurameessumma anxeninna insa'nee'a hiissichcho uwwannon;

insa'ne'aanna duuchchi woddixxa kako aaganno.

9 Insa'neexxi hortenna gosa gosaxxe mootummuwwa'n

oose insa'neexxinna ardake'n ege'nendeexxe kaddaan;

insa'nee uudeeki duuchchinna Duuchchi Woddik Gootti eebbiseeke manna kadeexxa ege'naan.»

10 Ani Duuchchi Woddike Gootta'n lumoshsha gammadannon;

lubbo anxinna anke Mageno'n adda gammaddaan;

Waajubichchi ifi danchoosedhammashsha

waajubbichchotinna seesuwwik ifi seefattammashsha

Isi anjiratixxa seemma ane'n oddeesse'een;

qullummatixxa oddononna hana ane'n oddeese'een.✝

11 Buttin mudho latisammashsha

hiddichchuwwi lataaxxi bakkanna sanne nophphitashsha assitammashsha

Duuchchi Woddik Goottinna gosa gosaxxe mootummuwwa edo

qullummatanna galata burqaashsha assaan.