1 Ooziya, Iyyo'ataami, Akaazinnaa Hiziqiyaasi Yihudiinke moyanjuwwa kande moonemmake sane'ni Mageni Amootsike belto Issayaasi Yihudiinxeennaa Iyyerusaalemixxee uudeexxi waleella konneechchi butta hexxeexxen.✝

2 Iimuwwa laqqe!, Butta caqasi!

Duuchchi Woddik Gootti hiyya'nee qici,

«Oose i'lennen; nossedhennen;

insa'ne kinni ane'n jalline.

3 Qotiyyichchi horateeka ifika anna

harretinna gootti iseki isee itisamaxxa bakka egendaan;

Isira'eeli kinni egendebaan;

ardi ankinna qaabbateba'a» hiyye.

4 Ha'no cubbaaleeyye

balleessa callik ard!

Fuggoxxa hujjinaaxxi ila!,

Hedho ha'nooxxi baxxe'ek!

Duuchchi Woddika Gootta waaldine'ekinnaa

Isira'eelika woyyichcha Mageno tuffatine'e

duddurokanna iso'n wirri assitineen.

5 Mayee higgeenna mufeti mayee ganedina?

Mayeeta jallonde'n jallo lephphitina'ne?

Umi ha'nooki duuchchi ela gophe'een

qalbe ha'nooxxi duuchcha gophpheen.

6 Tennenaa'n kexxeexxa lekkatike qe'yanaa'n umiinke ordichchi qico'n

bisi ha'nooki fayya afeebi hedhebaan;

Miseeriinke madatikennaa mala callike kadeen;

tinni ha'nooxxi mada malootebaan; usurendebaan bunqe'ebaan;

zayitetinna shaqqitebaan.

7 Bogi ha'nook duwwike kadaan;

qachchuwwa ha'nookanna giira itte brteen;

Uudinaa'naa'n

fichcha ha'nooka naaphi adhdhaan;

duuchchiingechcho balleesse birenaa boga ha'nooka duwwi gatisaan.

8 Tsiyooniki ardi woyinetike fichchi giddo hedheeke fooqishsha

baaquliinke fichchi giddo hedheeke minishshannaa qachchishsha buqeendeexxe kadde'een.

9 Dada Duuchcha Ajajaak Duuchchi Woddiki Gootti ba'netenaa'n gattaaxxa

sanne no'aa gatisa gopheele

Soodoomishshanna Gomorashsha

kande ganteennan.✝

10 Ha'no Soodoomik akekisanjuwwa!

Duuchchi Woddike Goottika hiyyichcho laqe;

Ha'no Gomorake arda

no'oke Magenika seera caqasse;✝

11 «Ha'nooke tolchixxi bira sa'ne

ani'a maa woyifulda?» hiyya'nen Duuchchi Woddiki Gootti.

«Techchi qico'n ani'a tolchitineeki gedhebiinxi korbeeyye,

cincaatiki tolchinnaa horiinxi ha'yo anee gelteen;

Ani jibootiinxa gedhebiinke buruusixxa re'etixxe korbeeyyexxa munde

eeyyabe'non.

12 Anee magenoofatino'a dagginaashanna

konnelchuwwa duuchcha iyyedaginaashsha

anke galmixxa baxxe haxxinaashsha ayyete ha'noo laqe?

13 Konne toliinka tolcha yoona ani'a shiqishinoqqe'e;

gubbina'neeki hixaani ane gibiseedheen;

Baate reefi leellitaa woddika ayyaanannaa

ha'nooka sanbatuwwixxe,

Magenooffachchoti bukki wodda hujjinaaxxa cubbo

eyyeeben'on.

14 Baate reefi fuldaa woddikanna wele ayyaanuwwa

jibbeennen.

Kunni ayyaanuwwi ha'urtammaxxe ba'oshsha ane'ni ha'uremmaxxee

ko'we gibeennen.

15 Soodachchotee anga ha'nooxxa aniba'a diriirsitinoole,

ha'noba'a mi'latabo'non;

Manjo anga saxxineeke manna kaddinemmaxxee

fedhee qico kadha birasa'issitinooelnna laqabo'non.

16 Ifi ansheexxine ca'a hiyye;

fuggoxxa ha'nooxxa huje anxe ille edii'n fuggusse;

Balleessanna waalle.

17 Eloxxa assa baratte;

dhuugaa dabbabaashsha asse;

Miicemeeka anjirre;

annanna ama affebaaxxe oose'a gamote kadde;

aro'ir eyeexxa melaalluwwi'a baasse.

18 «Amme mari'aanto»

hiyya'neen Duuchchi Woddiki Gootti.

«Cubbo ha'nooxxi sorsiinsha diimmattoole

ani anshe kaadetishsha ca'a assannon.

Mundetishsha diimmattoolenna

fuutinsha golalooxxe kaddaan.

19 Ani'a ajajendinoole

butta fulchitechcho misee'naa ittinaan.

20 Ani'a ajajema gophphine jallatinoole kinni

wolaantichchik muddinaan»

Tennee hiyya'neeke ante Duuchchi Woddike Goottan.

21 Addatememmaki qachchi

hitta yababuldeexxe areshsha kade!

Edo dhugaa callikennaa

qulliyye hexxa'nemmakemman.

Ta'a kinni manjo anga sa'eeke manni itti wo'meeke kadee'en.

22 Birretiki siblijji atik ciile'een;

atiki woyinetixxi booka wode'eke kadde'e.

23 Atiki akeekisanjuwwi jalliyyetennaa

moodhaalsheti gudditeeke kadeen;

Mitti mitti matta adhdha'neen;

anga iblshanna jaba qicinni halsaan;

Annakannaa ama affebaaxxa oosennaa

aro'o affeebaxxa melaalle gamote kandebaan.

24 Tennexxee, Dada Duuchcha Ajajaak Duuchchi Woddiki Gootti

Isira'eelik hunnameessi Mageni hiyya'nee qici,

«Anka naaphuwwa hunnati ganaane'e

anee gibammakeera'n halo fulannon.

25 Jabaqi cinni atee xixannon;

ciila atenaa'n hoyyannon;

Xurekanna atenaa'n ca'a assannon.

26 Galchalluwwa atika olmishsha

gorsammake atika mannanna edi woddishsha ati'a ke'issannon;

Ookkoneechchi uduma dhugaatikennaa

addetemeeke qachcha hiyyendatton.»

27 Tsiyooni dhugaatixxe murtenni,

Iyyerusaalemi giddo hedhaake manninaa'ni aade agaaka anjiraan.

28 Yaane kinni cubbaaleeyyetinnaa jalliyye mitteba biraan;

Duuchchi Woddika Gootta gibaaki duuchchinna ba'aan.

29 «Ha'no eettinammaxxa dharichcha magenuwwa magenoofattinammaxxee haqqe'a

shookinaan;

Ha'no fi'litinemmake hiddichchiinke boonchuwwa'n

salphatinaan.

30 Shafa harcalsemmake qilxishsha

xeena gophemmake hiddichchinke fichchishsha kaddinaan.

31 No'o hunnaameeyyeten hiyyaaki manni ba'aan;

huje isixxinna gooffaaxxen

Lamiingi giirate'ni gubantaan

ayyinna insa'nee tenne ba'neenaa'n gatisaaki hedhebaan.»