1 Abbaayyati qarqara hexxeexxe qiilla gammoojjexxee haaso'emeek Mageniki hiyyichchi konneechchinni butti'a hedheeken.

Bita'i ga'minaa'n gandaaxxi diidallo duuchchigeechcho filte adhdhitammashsha

sodaachchisaake mitte bogiki manni

qiilla gammoojjenaa'n dagaan.

2 Sodaachchissaaxxa yaane Mageni ane'ni leellishen;

tinninna mitti mitte sa'isse uwwaan; mulqedhammak mulqedhaan;

Elaami ke'e; Meedooni qoqqobe;

ise aassitemmaxxa wixxirri assitammaxxa yaane duuchcha gatisannon.

3 Tennenaa'ni kexxeexxa hidhi anee kuteme;

ciniintoti rakkattemmaxxe manjichchoshsha rakkatennen;

Uudaaneexxi yaane ane sodaachchisse;

laqaaneexxi yaanenna anee mekki assite.

4 Godobi anee culphise;

sodaatenaa'n kexxeexxa gilgilenne;

Bogi rake hashshaashsha halchenne;

anee alaalshitaaxxa yaane malee mitte ani'a woyya hiyyannoxxa gophenne.

5 Ita ha'wa qophphootee'naa

keessumma ofoldaaxxi rachchuwwa fayendeemman;

inde ha'wine;

«Ha'no bagediinki jaliqabuwwi! Ke'we;

Wonte ha'nooxxa fi'witine qophpheessedhdhe!» hiyyaaki ajaji dedhange'n uwweme.

6 Konneechchi uduma Duuchchi Woddiki Gootti anee hiyyee qici,

«Marte heqqallo ugge;

isinna afeexxa haaso'oole.

7 Fadhadi harkilsaaka

sarageelluwa uudaa wodda

Harrenna gaaluwwa

gulufaakaara uudaa wodda

Qalbeefatowwaal;

xonxommachchoti qalbeefatowwaal.»

8 Heqqanjikinna

«Gootta anke! Ani xellephphote'n barra duuchcha heqqonde'ni uurreennen;

hashshanna anxe bakka'n hedhenneni» hiyya'ni cance.

9 Kunnise mitti manjichchi fadhado harkissaa'neexxe

gaarenni dage'een;

Heyye heqqanjikinna

«Baabilooni ibbeeni! Ibbeen;

Ardi magenoofatammaxxi fakkuww duuchcha

enqende butta ibbe» hiyya'n lallabaan.✝

10 Aldumete'n uxxendineeke anke ardaa

Dada Duuchcha Ajajaake Duuchchi Woddike Gootta,

Isira'eelike Magenonaa'n,

laqenneka hiyyichcho ha'no'ni kulennen.

11 Edoomixxe kulemeeke hiyyichchi konneechchinni butti'a hedheeken;

Mitti manji Seyiirixxe koobanaa'n ye'eexxi

«Heqqanjoo! Bogi isi haano sooda?

Heqqallo Soodo'a hitteexxi yanna gatteexxa ane'ni kuli» hiyyaan.

12 Heqqanjikinna

«Bogi sooda shiqe'een; yaane kinni hashsha wirri hitee dagaan;

Higgenna qortotta'a hassottole qorre

yaane kinni higgene dagge» hiyye.

13 Arabiinke bogi'a kulemeeki hiyyihchi konneechchinni butti'a hedheeken;

Ha'no Arabiinxe qiilla gammoojje giddo hexxineek

Dedaan Siraaraxxi daddaltuwwa,

14 Dheeboti ha'noobaa dagaakeeri'a wode'e uwwe;

Ha'noona Teemaake arda!

Baqatekee itaachcho uwwe.

15 Ardi wolaantichchokenaa'n

luqqisemeeke wolantichchinaa'n

darbatematee aggaamendeexxe gabenaa'n

eebbeeke bagedinaa'n banje'een.

16 Ookkoneechchi uduma Duuchchi Woddiki Gootti ane'ni hiyyee qici, «Hujjaluwwi hujetike anninni hujetee weli aagemmaxxi barra geltoole huje uurrisammashshanni mitte wogga giddo Qeedarixxe gosaki luminni gataan; 17 Qeedarike looliinke mannanaa'n gataaki shiixxoke mogidik lolammake mannan. Tennee haaso'eneki ante Duuchchi Woddike Gootta Isira'eelike Magenon.»