1 Eettene barra Duuchchi Woddiki Gootti

Carrisa bofa Leewataanii

Mirqemaaka dhudhdhufa Leewataanii

ifixxe jabaxxe lumoxxennaa hunnaameessa wolaantichchinni xixaan

Eettene abbaayyaka lumooka biniinchanna kukkutaan.✝

2 Eettene yanna hiyyendaa qici:

«Eloke woyinetike hiddichchixxa bakka faarse;

3 Ani Duuchchi Woddiki Gootti isoo heqqannon;

duuchchiin wodda iso'n wode'ekanna ha'wisannon;

tennexxee ayyinna isoo miidhabaan;

hashsha barra isoo heqqannon

4 Ani mufatebe'non;

Utetinna qu'muuddo ane'n kexxeelenna

konnelchuwwa lolatee fuleennele

mitteenba silaan konneechchuwwa gubbannan.

5 Kada gophphoole kunniichchuwwi dageexxi anee golla ifike assedhuun;

nage'ik insa'nenni hedhannoshsha asse'nowwaal;

eetti, nage'ik insa'nenni hedhannoshsha asse'nowwaal.»

6 Dagaake baruwwa'n Ya'iqoobixxi sanne Isira'eelik ardi woyinetike hiddichchishsha hidda oltaan;

daraaree gumma gummisaan

gummatinna butta duuchcha wo'mitaan.

7 Isee ganeekara ganemmashsha

Duuchchi Woddiki Gootti Isra'eli ganeedheesi?

Isee shiyeekara shiyemmashsha

isi isee shiyende'eeta?

8 Duuchchi Woddiki Gootti ifika arda boji'eme me'aashsha assiyyoti xixe;

borotixxi diidallo gandammaxxe barrashsha

jabaxxe hobonbaltenni ise shorrishete.

9 Ya'iqoobike tolchimalchiink kinjuwwi

boo'etike kinjishsha insa'nee dayeexxi bulleessaa wodda

Ashaarixxi soodduwwanna hixaanik tolchimalchuwwa,

bakka ififixxenaa'n goshe hunaa wodda,

Eettene yanna balleessa isixxi isi'a gattowwaal hiyyendaan;

tinninna cubbo ifixxa fuggussitaxxa wo'ma gumma kaddaan.

10 Kinjiinke dalla'iki qachchuwwi gataan;

qiilla gammoojjeshsha waalendeexxe bakka kaddaan;

Jabbuwwa ookko bobbaataan;

ookkonna ciissaan;

damuwwa isexxanna coonqeexxi indaan.

11 Damuwwa isexxi enqendaan;

melaalletinna daggeexxi konnelchuwwa giirtaan;

Qalbefachcho afeeke arda kedeemmaxxee'e

daddalikinna insa'ne'a mararabaan

insa'nee giisseekinna eloxxa isi'a assabaan.

12 Wiisalli dinne huurakenaa'n gargari hiissammashsha eettene barra Efiraaxxisike galananaa'n Gibtseeke bogixxe gabala qico'n hedheeka arda ifika Isira'eeli Duuchchi Woddiki Gootti mitti mittinginni bukki assaan.

13 Ookkone baro'n lumooki malagati ufuufemaan; Asoorike bogiba'anna Gibtseeke bogibaa booji'eme me'emmaki Isira'eliki ardi higeexxi Iyyerusaalemi hexxeexxe woyyitte kooba hana magenoonfantaan.