1 Qiilla gammoojje wido hexxeexxe Selanaa'n

ookkone bogike galchalli'a

Tsiyoonixxe beltoxxe koobaba'a

gedhebiinke buruusixxa irbo ergine.

2 Mine ifikenaa'n shorrendeexxi

mekki hitemmaxxe ci'ashsha

Mo'aabixxi melaallenna

Arinoonika galaanixxe foofaba'a iittanni kandaan.

3 «Gorsa no'aa uwwe;

murte murre;

Barra saafo'a ha'nooxxe gaaddiddonni

hashshixxe dukkanashsha no'oo golle.

Baajekara sho'we;

shoremeekara sa'issitine uutinoqqe.

4 Mo'aabike boginaa'n baaje dagemmaki manni ha'noonni welti hedhowwaal;

insa'nee biro'a dagammake mannanaa'n insa'nee golla kadde.»

Miicammak manni ta'anni edi'a hedhabaan;

ba'netinna gattaan;

rakkisammakirinna ookkone boginaa'n ba'aan.

5 Eettene yanna jaalalatixxi mootumma uurritaan;

Daawwitixxe sanneenaa'n

dhugaati muro'a haasaak

Qullummatinna wiinandaashsha assaak

Mitti manjichchi addatensha eettene moote hana ofo'laan.

6 Mo'aabixxe ifi duka'a

isixxe yo'oshsha ifi saada'annaa holla'a

Ane malee hiyya isixxanna wele tuffata isixxa lanqe'ennen;

ifi dhaada isixxi kinni toliinxe.

7 Tennexxee Mo'aabiki ardi oodhowwaali;

duuchching Mo'aabi'a odhowwaali;

Qirheereesi qachchike manna qalli hiyyati

lumoxxe yaadonni oodhaan.

8 Haseeboniki fichchi

Sibimaki woyyinetike hiddichchuwwi qoore'een;

Gosa gosak galchalluwwi

Iyyazeeri sa'eexxi

Qiilla gammoojje qico'n mare geye

abbaayatiba'a hidda yaalsitemmaxxa

Filendeexxa woyyinetika hiddichuwwa

hirbeessine'een.

9 Tennexxee konne Sibimake woyyinetike hiddichchixxe

Iyyazeeri oodhemmashsha aninna oodhannon;

Koo Haseeboni, koo Eli'aale,

indiddo anxenni atee corci assannon;

Gumma gummisseeta wodda hexxemmaxxi gammashshotixxi raare;

midha bukki asecatixxi atixxi mayeexxi gammashsho gatte'een.

10 Gammashamonna iliilleette eettene hiddichchiinxe bakkabaa'n gate'een;

woyyinetike hiddichchixxe bakka'n faarsa hexxeba'a;

ililisatinna gatte'een;

woyyinetinetike miicatike booncho'n hirbeessaak hedhebaan;

ani hirbeessammake mannika canca balleesseennen.

11 Tennexxee qalbe anxi Mo'aabike lumoke kiraarsha yaaddotixxe oodhishsha laqisa'neen;

giddixxi hedho anxinna Qiirheeressixxee ooxa'neen.

12 Mo'aabik ardi fakkuwwa magenoofanittammake ifike tullichchuwwibaa qabantoole

la'o alfaaxxi elo callan;

soodachchoteenna ifike gamiba'a e'yoolenna

isi la'o afeba'a.

13 Duuchchi Woddiki Gootti Mo'aabixxee edo haaso'eeki hiyyichchi konneten. 14 Ta'a kinni Duuchchi Woddiki Gootti «Shiixxoxxe yanna'a maallaqakee manjokee hujaaki mitti manji huje uurrisammashshanni Mo'aabiki ulfinninna heddi isiki ardi sase wogga giddo salphataan; Mo'aabike arda gateeki heenokenna hunna afebaake kadaan» hiyye.