1 Ookkone Isira'eelike Woyyichchiba uudabaakiiri'a

Duuchchi Woddike Goottika gargaarsa halsakeeri'a

Yaane kinni gargaarsa alfatee hine Gibtsee'a dirrakiiri'a

fadhado ifike'ni addatekeeri'a

Sarageelluwwiinxe bira sa'ne'ni

insa'neek fadhadixxa jabaxxa hunna irko assedhe ifi saadaakeeri'a aanne'e!

2 Duuchchi Woddiki Gootti kinni beekaken; bala iyyedagaan

hiyyichcho isikanna muuxaan.

Fuggoxxa asseke mannike mine'ni

balleessanno gariggaarammak manna ke'aani.

3 Gibtseeki manni manjoke malee Magenokebaan;

fadhadi insa'neekinna maalake malee hafuurakebaan;

Duuchchi Woddiki Gootti anga ifixxa dirriissa wodda

gargaarammak guggufataan;

gargaremaammakinna ibaan;

lamiingi mitteba ba'aan.

4 Duuchchi Woddiki Gootti anee hiyyee qici;

«Neenqi yookaan neenqiink beltanji

adameeka abixxeexxi ittaa wodda

Heddi allalisano

weli yexxeexxi isiba'a daggaa wodda

Raare insa'neexxi isoo sodaachchissammabaashsha

isinna hafuura insa'neeke culphisammabaashsha

Dada Duuchcha Ajajaak Duuchchi woddik Gootti

Tsiyoonixxe kooba'ninna isike tullichchuwwa'n lolakee iittanni dirraan.

5 Ciichcho mine ifiki hana keela bande doota'n beltanna ifixxa heqqexxammashsha,

Dada Duuchcha Ajajaaki Duuchchi Woddiki Gootti Iyyerusaalemi gollanoni,

Ise buqaan; anjiraan,

ise hananna sa'aan ise wodaan.

6 «Koo Isira'eelike ardaa! Anee gibbinemmangiba'a wirri hitine higge! 7 Cubbo callixxe anga ha'nooxxenni giisexxinemmaxxa birreti sibilijuwwixxanna worqetixxa fakkuwwa magenoofatinammaxxa duuchcha fugussitinaaxxi yanna daggaan.

8 «Asoorik manni manjiinke kadebaake wolaantichchinni mudaan,

maala oddowebaaki wolaantichchi isoo itaan;

wolaantichchi ediin baajaan;

insa'neexxi dargaggeeyenna garbummatixxa huje hujjaan.

9 Weekensha kexxaaxxa yanna insa'neeki kinjiinke dalla'uwwiki qachchuwwi diigemaan;

isik akeekisanjuwwinna bagediinka baandira udaa wodda

Soda'ati liqisemaan»

hiyya'neen giira isixxi giddo hexxeek

ha'ishatixxe bakkanna Iyyerusaalemi giddo kadee'eek Duuchchi Woddik Gootti.