1 Mageni hiyya'nee qici: «Ha'no giddichchuwwa giddo hexxina'neeke gosa gosak ardaa! Ca'li hitine laqqee!

ardi hunna ifixxa haaroonsedhowwaal;

Edo dange haasonnowwaal;

murtetixxe songo'n mitteba shinqo.

2 «Lole injifataaka ke'isseexxi borotenaa'n iyyedagaki,

ergatemo'a ifi'a ye'eeki ayyete?

Gosa gosaka arda anga isixxe'n sa'isse uwwaani:

moyanjuwwikinna isi hunda gallaashsha assaani;

wolaantichchi ifikinni bukotishsha gabetanna huurinsha xeeraani.

3 Konneechchi edo lekka ifixxeenni mare ege'nebaaka ora

insa'nee gusse shorraa wodda mittilchinna isoo miidhaachchi hedhebaani.

4 Tinni kaddaashsha asseeki ayyete?

Hundii'ninni manji beltixxa jirte towatammaki ayyete?

Ani Duuchchi Woddiki Gootti sirende'n hedhennan;

udumanna hedhannoki anenden.»

5 Giddichchuwwa giddik ardi

ani assennexxa duuchcha uude'en:

tennexxee yo'oshsha alaayye culphisen:

Mitteba bukki hiyye aniba'a dageen.

6 Mitti mitte gargaaraan:

dayyokanna, «Meeco'o jabaati!» hiyyaan.

7 Haqqetixxe ogeki manji worqe tume giissammaka jajjabeessaan:

magenoonfantamaxxa fakke qoceti boce ca'a asse giissammakinna

tumatik siblji hana tummammakanna.

Mee co'o jabaati, «Elo qico tunde'eten!» hiyyaan;

magenoonfantammaxxi fakke lele'mitabaa qico'ni mismareti ganaan.*

8 «Yaane kinni ati, koo erganjo anke Isira'eeli

Anke arda kaddotta'a atee fi'lenneken

jaalo anke Abirihaamixxe horten.✝

9 Buttatixxe gabalanaa'n ate iyyedagennen,

shooliinge kasanaa'n atee ye'enneni;

‹Erganjo anke kaddatton› hiyye atte fi'lenne malee gibebo'non.

10 Ani atinninn welti hedhennen sodaattoxxe!

Ani atike Magenon, alaaltoxxe!

Ani atee jabessannon, gargaarannoni;

jabaxxe anxe hirrenni atee kiphannon.

11 «Ate'n aareti ke'aaki duuchchi injifatemee salphataan:

ate'ninna fuggoxxin ke'aaki

ba'aani.

12 Ate'ni ke'aaka naphuwwa hassenna midde

affabexxon;

Atee lolo'a ke'ammakaranna

inbeeba gophphatton:

13 ‹Meecco'o sodaattoxxe, alaaltoxxe,

middixxa atixxa anga abide atee gargaarannon›

Hiyya'n atee jajjabeessaneeki,

ani Duuchchi Woddike Gootta Mageno atiken.

14 Corroqatishsha hunna afebexxoke koo Ya'iqoobi!

Koo shiixexxetteke Isira'eel,

Ani atee gargaarannon sodaattoxxe,» hiyya'neen Duuchchi Woddiki Gootti,

atee wodannok ante Isira'eelike woyyichcha Magenon.

15 «Kunnise, haaroxxa

qaraxxa isso affeexxe haaroxxe midha uxxinammaxxe maashineshsha atee assannon:

Koobuwwatanna hirbeessite bulleessitattoni:

tulluwwatanna huurake assitatton.

16 Iimi'a xeertatton:

diidallotinna bukki assite adhdhite me'itaan:

hobonbaltetinna xeerte birtaan:

Ati kinni Duuchchi Woddike Gootta'n gammaddatton:

anke Isira'eelike woyyichchi summinni elle alfitatton.

17 «Hiyyeeyyenna rakkiyye wode'e haalsexxaan

kaddo malee mittechchonna alfinabaan

wode'e dheebotte qonqo insa'neexxi baggaan.

Yaane kinni ani Duuchchi Woddiki Gootti soodaachcho insa'neexxa laqannon;

aninna Isira'eeliki Mageni haranga insa'nee waalabe'non.

18 Bagoxxe tulluwwa hana wodi'i ya'aashsha assannon;

dhooquwwa giddii'ninna muummetki wodi'i sa'aan:

Qiilla gammoojje wodi'i eelaaxxe bakka kaddaashsha assannon:

bagoki buttininna muumme phu'issaake kadaan.

19 Qiilla gammoojje'n

birbirsuwwa, waaccuwwa, dakkadhatixxa haqqenna ejeersuwwi lataashsha assannon:

gammoojjichcha boga'ni hi'neessa, qeerraro hi'neessanna

ejeersuwwa mitteba kaassannon.

20 Tennee manni uudaan; ege'naan

Duuchchi Woddike Goottixxi angan tenne assiteexxa,

Isira'eeliki woyyichchi konnechchuwwa dadeexxa,

duuchchiingi qalbeefataan, hubate galchedhaan.

21 «Ha'no moronsha ifixxa shiqishshe» hiyya'neen Duuchchi Woddiki Gootti.

«Ha'nooxxa dhugaanna iyyedaaqqe» hiyya'neen Ya'iqoobik moyanji.

22 Edi'a kaddaaxxa duuchcha no'o'n kuldo'a,

magenoofatinammaxxa fakkuwwa iyyedagge:

Hubantonna'a

muuxama insa'neekanna egennonna'a

edo kadde saxxeexxa yaanuwwa no'a haaso'we

Daggaaxxe yaanuwwaxxenna no'a ca'a asse.

23 Magenumma ha'nooxxa egennona'a,

edi'a kaddaaxxa duuchcha no'o'ni kuldinaata;

eloxxa yaane assitinaata:

Yookaani uundennexxi alaanne culphinsannoshsha

fuggoxxa yaane assitnaata.

24 Ha'no laakossi giddo e'itnabani

huje ha'nooxxi haranga mitte la'o affeexxebaan:

ha'no fi'liteneek corifachchisa'neeken.

25 «Ani mitte middii'ni ke'isse'naa isinna dage'en;

arishsho fuldamma darre'n daga'neek Isi summa anka ye'aaken

Waatichchi dhoqqe hirbeessammashsha

isi boga galchammaka manna dhoqqetishsha liissaan.

26 No'o egennannoshsha tenne'e sirende'ni haaso'ek

‹isi dhugaaten› hinannoshsha edise haaso'ek ayyete?

Mittikinna bucuqqi hiyye haaso'ebaan

edise kuleengi hedhebaan

haaso'a ha'nokanna laqeek hedhebaan.

27 Sirende'ni, ‹konnechchuwwa uudi›

hiyyennexxi Tsiyooni'n kulennak anitemman

Iyyerusaalemi'ana

eloxxa odo sa'issaak uwwe'ennen.

28 Uudennenni ayyinna hedhemmabaan

oddo insa'neexxe'ni gargaraak hedhebaan

laqanno woddanna hiissichcho uwwaak mittikinna hedhemmabaan.

29 Kunnise magenuwwi duuchchi woyi fulakebaan;

huje insa'neexxinna onaken;

insa'neexxi fakkuwwa diidallo duwwixxen.