1 Dhugaa gorsatika seera fulcha'neeke,

arda anka miiccaaxxa aada fulchitinaake insa'ne'a aanne!

2 Hiyyeeyye seera affebaashsha assaakee

miicemeek ank ardi dhugaa alfabaashsha assaake

Aro'i reyeexxa melaallenna saamakiri'a

nossaaka affebaaxxa hadi reyeexxa oosexxa karra hunnatti adhdhaakeri'a aanne.

3 Tenne ha'nooxxe fuggoxxe huje'a duuchchi'a Mageni ha'noo xixaaxxa yanna ma assitinaa laati?

Bayyike boginaa'n manna iyyedagee ha'noo ganaashsha assanno wodda maa kaddina?

Ha'no gargaro'a ayyiba martina?

Karra ha'nooxxa haba sho'exxina?

4 Booji'ematenaa'ninnaa shiyematenaa'n hitta gattinata

tinni duuchchi kaddee'naa Duuchchi Woddike Goottixxi mufe qiiddebaan;

tennexxee ha'noo ganatee anga isixxi qophphi hiteeshshanni hexxe.

5 Duuchchi Woddiki Gootti, hiyya'nee qici, «Anxe mufe'a siqqo kadeekee,

anke xixichchi'a kuti anga isixxe'n hedheeke, Asoori'a aane atti'a!✝

6 Karra insa'neexxa saame

arda ori giddixxe dhoqqeeshsha hirbeessinaashsha

Mageno ege'nebaake ardiba'a isoo ergannon;

anee mufachchiiseeke arda'n Asoori'i ke'isse ergannon» hiyye.

7 Insa'ne kinni konne yaada anfebaan;

hedumi insa'neeki giddo hedhebaan;

Yaane kinni heduma isika balleessatee

yaadi kinni henookee kadebaaki gosa gosaka arda biroo'aatten.

8 Tennexxe moyaanji insa'neeki hiyyee qici,

«Loliinka manna ajanja'neeki duuchchi moyanjuwwakebaa?

9 Kalinooka, Karikeemishshika,

Hamaatikanna Arifaadika qachchuwwa injifateennen;

Semaariyanna Demasiqo anga ibilseennen.

10 Iyyerusaaleminna Semaariya magenoonfantammaxxa fakkuwwa

laakkossiki saxxaaxxa fakkuwwa afeexxa mootummuwwaka moyanjuwwa injifatennen.

11 Semaariyanna isexxa fakkuwwa birenneshshann

Iyyerusaalemi'ninna ise giddo magenoonfanta'neexxa fakkuwwa biraabo'noo?» hiyyaan.

12 Duuchchi Woddiki Gootti hiyya'nee qici, «Iyyerusaalemi'ninna Tsiyoonixxe kooba'n hana iyyedagonna'a hedennaxxa duuchcha birennechchi uduma Asoorik moyanji holleexxe holla duuchchi'a isoonna ganannon. 13 Asooriki moyanji holla'n hiyyee qici:

« ‹Tenne duuchcha anten anxe hunnani assennen;

ani jabaken, beekakenna qaroten;

Gosa gosaxxe mootummuwwaxxa gaballuwwa diige birennen;

Tuu'lineemmaxxa karra duuchchanna adhdhennen;

ookkone boguwwika arda duuchcha anxe jannummanni salphisennen.

14 Manji anga ifixxa ci'atike miniba'a wirri assammaashsha

aninna iittanni anga anxa buttatixxi mootummuwwixxe karrabaa wirri assenne;

Manji waalmeeka quuphphe bukki assammashsha

aninna iittanni butta duuchcha bukka assennen;

Ayyinna keela ifika le'miseek hedhemaba'a;

afo'okanna haanni hiyye raareke hedhemmaba'a› » hiyye.

15 Maxirabi isinni haqichcho qinxammake manji iimi darre hedhee?

Magaaze isenni haqichcho daramaake manji iimi darree hexxee?

Iittanni siqqichcho isee abixxammake manjo'n hunnata dandeetabaan;

Zange heqichchoke kaddeebaashsha ifi saadama qicishshaten.

16 Tennexxee Dada Duuchcha Ajajaaki Duuchchi Woddiki Gootti

fuffurdallamma loliinke manna'ni qa'lise biraaka dhukuba ibisaan;

Bisi insa'neeki giddo giiratishsha gubaaka eebinjo

wocci assaan.

17 Isira'eeli ifi giirate kadaan;

iikki Woyyichchinna bubenjoke kadaan;

Mitte barra giddonna

eettene qu'mudonna ute giira ittaan.

18 Jabaxxi dhibo manjo yaayyisse'e shiltammashsha;

yo'oshsha biifeeka gongominna shamoki huccinaammaki fichchi

lubbotannaa maala haranga balleessaan.

19 Gongomi giddo gattaaxxe haqquwwaxxe hee'no'manaa'n kexxeexxa

oosichchi belti midde tenne haqquwwa laakko'e borreessa dande'aan.

20 Eettene yaana ba'netenaa'n gatemmaki Isira'eeliki ardi,

Ya'iqoobike ardinaa'n gateek

Ta'anni edi'a

insa'ne'n miidhemaake Asoorika manna addata waale;

Eettene bakka Duuchchi Woddike Gootta'n woyyichcha Isira'eelike Mageno'ni

dhugaati addatan.

21 Hafe gateek manni illee iima higaan;

Isira'eelke ardana'ni ba'netenaa'n gantemmaki Lumoke Magenibaa higaan.

22 Tee Isira'eeli

atike ardiki laakkossi abbayyaati maanchishsha bira sa'eeke kadolenna

Insa'ne giddii'ni gateke calla higaan;

ardake'ne lumoxxinna dhugaatixxe kaddeexxi ba'ne murnde'en.

23 Ee! Dada Duuchcha Ajajake Duuchchi Woddiki Gootti

mureexxa ba'ne boga duuchcha'n iyyedagaan.✝

24 Dada Duuchcha Ajajaaki Duuchchi Woddiki Gootti

Hiyya'nee qici,

Tsiyoonii'n hedheeka lumoka arda

«Edo Gibtseeki manni ha'noo miicemmashsha

ha'noo miidheeka Asoorika manna sodaatinoqqe.

25 Shiixxooxxe yanna uduma ha'no'ni mufateennaxxa mufe balleefatannon;

ookkonechchi uduma insa'nee birannoni.

26 Ani Dada Duuchcha Ajajannoki Duuchchi Woddik Gootti Herebike kinji bira Midiyaamika manna assenneshshani

insa'nee halngeti ganaannon;

Gibtseeka manna'n assemmashshanni

siqqichcho ifixxa wodu'uwwake'n qophphi assaan.

27 Eettene barra insa'neexxa ba'o dugummo atixxenaa'n

qanbara insa'neekanna atixxe qucenaa'n ke'aan;

Atike furdinnenaa'n kexxeexxa

iikki qanbar enqemaan» hiyye.

28 Naaphiinki sannachchi Ayike qachchiba geye.

Migironi giddii'ni sa'aa woddanna

miya ifika ookkoo uggudhdhe.

29 Ora ookkone qaxxaamure hinaa qici,

«Gebayi'n kaanbe oltine gallannon»

Raamak qachchi duuchchi alayye;

moyanjo Sa'oolike qachcha'n Gibi'a hedhaak duuchchi baajje.

30 Koo Gaalimike arda! Raarre!,

Layyishshake arda! Laqqe!

Anaatootike manna hiissichcho uwwe!

31 Madimeenahi lubbo gato'a baqake'n hedhenni;

Gebeemik ardinna sho'omo'a gonga'neen.

32 Telcho naaphi Noobike qachcha'n geyaan;

anga insa'neexxa Iyyerusaalemike qachcha kadeexxe tullichcha'n

Tsiyoonixxe beltoxxe kooba'n afo'o fulchedhati

qubichcho tonge.

33 Dada Duuchcha Ajajaaki Duuchchi Woddiki Gootti

lumoxxe hunnanni damuwwa kurkuuraan;

Lumolla haquwwanna fottoqqaan;

qeerraramma haqquwwanna ibbaan.

34 Gongomiinxa haqqe qoceti kakkaaran;

Libaanoosinna isixxe hunna edo ibaan.