1 «Isira'eelike arda Yihudaxxe sanne,

ha'no Ya'iqoobixxi oose! Laqqe;

ha'no dhugaatite kadebaaki,

Duuchchi Woddika Isira'eelika Gootta magenoonfantannen hitinaa'n;

Magenike summinninna kakattina'neen.

2 Ha'no ifi Woyyichchi qachchi giddo he'naanneken hitina'neeki;

Dada Duuchcha Ajajaaki Duuchchi Woddike Isira'eelike Gootta'n addantannen hitina'n hollitine'e.

3 Duuchchi Woddiki Gootti Isira'eelii,

edi'a kadda'neexxa yaane qeerraaxxe yanna edigama haaso'ennen;

iseenna hirbange'n muuxendaashsha assenen.

4 Mirqemabaake jabake sibiljishsha;

godoba jajjabatinaake manna,

kaddineexxa ege'nennen.

5 Tenne yaanuwwaxxa duuchcha ediseen ha'no'a haaso'eennen;

kaddebaa edi gama ha'no'a ege'nisheennen

Tenne assenechchinna,

‹Anxi magenoonfatannaxxi fakkuwwa tenne assiteen;

haqqetixxinna sibiliinxi misiluwwa tennee assiteen hitaboxxoshshaten.›

6 Ani haaso'ennexxa laqqine'en; tinninna muuxendee'naa uuddine'en;

heddine dhugaate kaddeexxa kuldaboxxoo?

«Ta'a edi wodda sho'onde hexxemmaxxa;

ha'no egendinebaaxxa haarooxxa yaane, ha'no'n leelishannon.

7 Kunnichchuwwi bire hedhemmachchuwwa kadebaaki ta'a dademeechchuwwan,

‹ha'nonna edi woddanni egeneennachchuwwa› hitinabaashsha,

edigama konneechchuwwixxa haranga laqqine egendinebaan.

8 Ani haaso'annexxa laqqinabaan; egendino'anna hassinebaan;

hundii'ninni ha'nooxxi mansha duudde'exxen;

Tinninna kaddeechchi ha'no xaqartiyyete kaddinexxanna

ilendineexxenninni jalliyyete hiyyendinaaxxa ege'neennen.

9 «Anike summike ulfinni'a hiyye muddame mufatabo'non;

manni anee galateefato'a aare ha'no birabo'noshsha enqedhannon.

10 Birretike sibiljishshate kadebaaki rakkotixxe giiranni ha'noo ca'a assennen,

abaratinna ha'noo hega uudeennen.

11 Ani umo ankee hiyye tennee assanon;

mayee summi anki tuffatema?

Ani gatee'naa weli ulfeesemo'a waalabo'non» hiyye.

12 «Koo Ya'iqoobi

ye'ennek Isira'eelike arda! Hiyyaaanexxa laqi!

Ani aneden;

Ani calli Magenoken edikenna udumiken.✝

13 Anxe anganni buttatixxa booso dadennen;

iimatanna diriirissennen.

Ye'ano wodda iimatinna butta ani'a ajajendaan.

14 «Duuchchiingi bukki hitine amme laqqe!

Konneechchuwixxe edise haaso'eki;

Magenoonfachchotixxe fakkuwwa giddii'n hoonte?

Ani Duuchchi Woddik gootti filenneki manji Baabiloonii yaada anka muuxaan.

Baabiloonike arda'ninna lolaan.

15 Ani umo anigenninni iso'ni haaso'eennen; isoonna ye'ennen;

ani isoo iyyedagannon; isi assaaxxanna qajeldaashsha assannon.

16 «Ani bira shiqqine hiyyaannexxa laqqe:

«Edinaa'ninni ani haaso'enneki sho'ikitebaan;

hiyyennexxi muuxendaa woddanna ani ookkonni hedhennan.»

Ta'anna Duuchchi Woddiki Gootti Mageni hafuuri isiki anee erge'en.

17 Ha'no anjiraaki Isira'eeliki Woyyichchi,

Duuchchi Woddiki Gootti Magen, hiyya'nee qici:

«Ati'a la'ote kaddaaxxa duuchcha barachchiisannekinna,

me'iyyo hasisaaka ora'n me'itotta'a akeekaanneki,

Duuchchi Woddiki Gootti Mageni anten.

18 Ajaja anka laqqineele,

nage'i ha'no'a xo'abaake galaani wodi'ishsha,

qullumma ha'no'a abbaayyatike danbala'ishsha bira saxxe daggamman!

19 Horte atixxa buttatike maanchishsha laakkonne dhaqqambamabaan;

ardi ha'nook mudee'naa summi insa'neekinna dedhemamabaan!»

20 Yooni Baabilooni'n fulle,

Baabiloonike mannanaa'ninna baaje!

Tennenna ililitiki ege'nishshe, lallabbe

tennenne bogiinxe gabala qico'ni haaso'we;

«Duuchchi Woddiki Gootti erganjo ifika Isira'eeli anjire'en.»✝

21 Duuchchi Woddiki Gootti gammoojje qiilla boga'n insa'nee akeekamma wodda wode'e dheebonitemabaan;

wodi'i insa'ne'a rassa shate fulaashsha asse.

Rassa shate wodi'i insa'ne'a phu'isiise.

22 «Fuggaalleeyetee nage'i hedhabaan» hiyya'neen Duuchchi Woddiki Gootti.✝