1 Duuchchi Woddiki Gootti Ya'iqoobi'a mararaan;

Isira'eelinna haaroba fi'laan;

insa'nee boga insa'neegi giddo galchaan;

Alagikinna insa'nenni welti hedhaan;

Ya'iqoobike ardinninna welt mittek kandaan.

2 Gosa gosak ardinna insa'nee adhdhaan;

insa'neenna insa'neexxe bakkaba iyyemarraan;

Isira'eeli ardi gosa gosaka arda geegoke assedhaan;

Duuchchi Woddike Goottike boga'n labbakenna meyyake garba assedhe insa'ne galchaan;

Insa'ne booji'emaaka boojinaan;

insa'nee miicemmakanna galchinaan.

3 Duuchchi Woddiki Gootti atixxe wixxirrinaa'n atixxe rakko'naninna atixxe jabaxxe garbummanaa'n atee hafuura adhisseexxa barra. 4 Baabiloonike moyanjo'n gacifata'n hitinaa qici,

Iikki miicaa'n hitta gate!

isixxi irbo ibisanna hitta baxxe.

5 Duuchchi Woddiki Gootti fuggichchixxa zange

galchaluwwiinxa bokko enqe'een.

6 Ardi kuta belo mufet ganemaaka

mararte belo shorrishaa'n

cancaqemaakanna eenqe'een.

7 Butta duuchcha nage'akannaa afuura adhdha alfite'een;

gammashshotixxa faaronna lolaasa'neen.

8 Hineesikinnaa Libaanoosik birbirsuwwi midde gammadeexxi

«Ati salphattettexxe barranaa'n

Haqqe karamma manni

qoce ifixxenni no'oba dagebaan» hiyye.

9 Ati daggette wodda

wiidda dhi'mo atee qophedhatee qophphi hiteen;

Atee qophexxo'a reyemmake mannixxi ekedha

butta duuchcha galchammakara duuchcha lele'mise'een;

Gosa gosake arduwwa'n moyemmaka moyanjuwwa

insa'ne moote insa'neexxenaa'n dirrise'een.

10 Kunniir duuchchi ate'n hiissine haasonna'n

«Atinna no'oshshanni hunna gophpheetten;

no'onde kaddeette» hine.

11 Atik ulfinni atike lumoke kiraarike hafuurinni welt;

wiidda dhiimoba'a dhidhime;

Oolo ati hunda fayende'een;

coroquwwatinna atixxe buyyeccatixxe seemma kaddaan.

12 Ati soodimariinke belto koo bakkalcha,

hitta iimii'ni ibbette

Koo ati qara moyanjuwwa salphissetteke

hitta butti'a huneddette!✝

13 Ati godoba ati giddo hitette qici,

«Ani iima me'eennen;

Moote anxanna Mageniinxe urjuwwa iimi darre assedheennen;

koobatixxe bukkixxe bakka'n

Woyyitte koobaxxe xungo'n, moote anxe'n

ofo'lannon.*

14 Duumanchuwwi iimi ga'ma sa'anno

ifinna Dada Duuchchike Duuchchi Woddike Gootta Mageno assanno.»

15 Yaane kinni hundi wiidda'n

dhi'mo bale'n dhidhinde'etten.✝

16 Atee uudaak duuchchi dho'o hiyye uudaan;

mancira hiyyoti, atixxee,

«Iikki butta le'misemmakinna;

motummuwwa shekesheke assemmak konne manjomma?

17 Butta duuchcha qiilla gammoojje assee'emmaki

qachchuwwa diige'emmak

booje'ememmak manni ifike bogaba'a me'abaashsha hoyyeemmak konnetamma?» hinaani.

18 Gosa gosake arduwwiki moyanjuwwi ulfinnik reyedheen;

duuchchiing ifi fike mooggi giddo moogemedheen.

19 Ati kinni gibendeexxe dameshsha

mooggokenaa'n fuldettexxi hunendeetten;

Wolaantichchik otememmake mannishsha

dhi'motixxe kino hundi darre sa'emmakiirishsha

shiyeemeke manni hunda buqende'etten;

Hirbeessemeeke renshishshanna kaddeetten.

20 Ati insa'nenni welti mooggi giddo hexxabexxon;

Butta balleessiteetten;

arduwwakanna birteexxen.

Fuggoxxa assaakerixxi sanne

haranga qalli hiyyendaba'a.

21 Insa'ne ke'neexxi butta dhaalabaashsha

butta duuchcha'ninnaa qachchuwwa ifika wonshinabaashsha

Annuwwa ifikixxe cubboxxe

isixxi labbaxxi oose dulendaaxxa bakka qophpheessine.

22 «Insa'ne'ni ke'annon»

hiyya'nee Dada Duuchcha Ajajaak Duuchchi Woddiki Gootti,

«Summa isikanna hafe iseka manna

horte isixxanna ila isixxa Babiloonii'n qurbi assannon»

hiyya'neen Duuchchi Woddik Gootti.

23 «Ani Babiloonii dhaaddotike galdumixxe bakka

caffa'atike boga assannon;

Ba'netike fiiyisanjinninna ise fiyannon»

hiyya'neen Dada Duuchcha Ajajak Duuchchi Woddik Gootti.

24 Dada Duuchcha Ajajak Duuchchi Woddiki Gootti, hiyye kakatee qici:

«Hedenneshsha dhugaaten muuxendaan;

hedenneshshanna kaddaan.✝

25 Asoorika manna anke bogi giddo bulleessannon;

anxe kooba iimanna hirbeessannon;

Baabiloonik qanbarinna anke ardinaa'n ke'aan;

ba'a isexxinna dugummo insa'neexxenaa'n dirritaan.»

26 Butta duuchchi'a hedeek yaadi konneten;

gosa gosake ardi duuchchiba'aanna diriirisendeexxi anga tennete.

27 Dada Duuchcha Ajajaki Duuchchi Woddiki Gootti hedee qici iittaten;

aate iso ille iima hiissa?

Anga isixxinna diriirrite'een;

aate ise'e ille iima hiissa?

28 Moyanji Akaazi reyeexxe wogga'n wabeekichcho Isayyaasi haaso'eki Mageniink jechchi konnechchinni butti'a hedheken.✝

29 Ha'no koo Filisixxeemike arda!

ha'no gandeexxi siqqo enqendemmaxxee ha'no duuchching mee gamadde;

Bofakenaa'n buute ilndaan

iseke quuphphinaa'ninna keelik ke'aak ha'latike bofi ilemaan.

30 Hiyyeeyyetike hiyyeessi belti la'ataachcho afaan;

rakkiyyetinna nage'ik diinphaan;

Atika hidda kinni ani solo'ik shiyannon;

atixxa gateexxa hafenna birannon.

31 Tee, Huluwwa uurritine oodhdhe! Koo qachchi giddo hexxineekeera uu, uu hiyye!

koo Filisixxeemike manna duuchching soda'ati baqqe!

Duumanchi middii'n ate'n dage'een;

googessakenaa'n fule gataak hedhebaan.✝

32 Ookkone ardibaa'n ergeme dagaake erganjuwwi maa hiissichcho uwwema?

hiissichchi «Duuchchi Woddik Gootti Tsiyooni'i jaare'een;

Rakko adhdhemmak ardinna

Tsiyooni giddo golla alfe'een» hiyyaaken.