1 Kunni Eedoomi'ni

diimmooka ejja fugatee Bootsiraa'n daga'neek aate?

Kunni gaachchanna oddo'week

ifixxe hunnake lumminninni tarkaafata'n daga'neek aate?

«Qullummati haaso'aneek;

anjiratenna hunna afeennek anendeqqa.»

2 Atixxi oddoono maye'a

woyinetike miicendemmaba woyine hirbeessammake mannixxe seemmashsha diimmatte?

3 «Ani woyinetike miicendammaba'a eettene woyine qofinni hirbeessenne;

gosa gosaxxe mootummabaa'n ayyinna aninni hedhemmabaan;

Mufe anxe'n insa'nee hirbeessenne;

aare anxenninna insa'nee bulleessenne;

Munde insa'neexxi oddoono anxe'n fiffixende'een;

seemma anxanna daafe'een.✝

4 Halo fulannoxxa barra qalbe anxe'n hexxeen;

wodannoxxi wogganna gelte'een.

5 Uudennen; gargaaraak kinni hedhemmabaan;

kiphaak hedha gopheemmaxxee'e mamba'a hiyyenne;

Tennexxe anixxi anga ani'a anjira iyydage;

aninxi aare anee jabeessite.✝

6 Gosa gosaxxa mootummuwwa mufe anxenni hirbeessenne;

aare anxenninna insa'nee machchoossenne;

munde insa'neexxanna buttinake'n dhangalaasenne.»

7 Duuchchi Woddiki Goottixxa ba'lunte

Duuchchi Woddik Gootti ani'a asseexxe duuchchi'a

isi galatefatemmaaxxe isixxe hujexxe

Isixxe jaalalaxxe isixxe ba'luntexxe qixxe'n

Isira'eelike ardi'a asseexxa

eeti asseexxe eleoxxe yaanexxe haaso'annon.

8 Duuchchi Woddiki Goottinna, «Insa'ne dhugaandin anke ardanna;

dhara haasottabaaxxe anxe labbaxxe oosen» hiyye;

tennexxee insa'neeke anjirallo kade.

9 Wixixxii insa'neexxe duuchcha isi wixixxii hiyye;

ifixxe afenshak iimik erganji insa'nee anjire;

Ifixxe jaalalanninna ifixxe marartenni insa'nee wode;

edika baro duuchcha'n innsa'nee qophphi asse;

insa'neenna ba'edhe.

10 Insa'n kinni jalline;

isika Woyyichcha Hafuuranna yaadinse;

Tennexxee isi insa'ne'n wirri hiyye'e naaphake kade;

isinni umo isingenni insa'ne lole.

11 Ookkonneechchi uduma Duuchchi Woddike Goottik erganji Muuse hedhema woddika olmike barixxa qaabante;

ookkone gedhebik allallisanji

abbaayyatenaa'n insa'nee fulcheek Isi haba hedhee?

Woyyichcha isika Hafuuranna oddo insa'neexxe'n uggeemmak Isi haba hedhee?

12 Ifixxa ulfateexxa hunnaamete hirre

Muusexxe middixxe anga'n hexxaashsha asse;

Ifi'a duuchchi woddike gurra kadaashsha

wodu'uwwa insa'nee edo qoqqoode.✝

13 Fadhadi qiilla gammoojje giddo sa'ammashsha

Insa'nenna dhi'mo giddo sa'iseexxi akeeke;

tennexxee insa'ne gugufantebaan.

14 Dhooqa giddi'a adade me'ammake horishsha;

Duuchchi woddike Goottike Hafuuri insa'ne'a hafuura adhdha uwwe;

Arda atika konne qicinni akeekkettek

summi atik ulfaateeke kadaashsha assateten.

15 Woyyitte ulfaattexxenna lummoxxe atixxe mootenaa'n

iiminaa'n butti'a uudi;

Hunna atixxinna hinaaffe atixxi habaxxe?

Arjunte atixxainnaa ba'lunte atixxe habaxxe?

16 Abirihaami no'o ege'nanna gophoole

Isira'eelinna midde no'o qaabbata gophoole midde

atiqa no'oke Anna;

Ee, Duuchchi Woddike Gootta! Ati no'oke Annan;

Olmi'ninni summi atiki no'o wodaan.

17 Ee, Duuchchi Woddike Gootta! Ora atikenaa'n fullonna'a

qalbe no'oxxa dilloossat mayee atee sodaantebo'noshsha no'o assitette?

Atike gosa gosake mini hadixxee hite'e maganneten higi.

18 Heenooxxe yanna'a ardi atik eettenee woyyitte bakka dhaaleemman;

ta'a kinni naaphuwwi no'ok atika woyyichcha galma hirbeesseen.

19 No'oqa olmanni atike;

insa'nee kinni ati insa'nee galchiteboxxo;

insa'ne summa atikenninna ye'emmebaan.