1 Kunnise Duuchchi Woddiki Gootti butta urmake assaan;

haranganna ise balleessaan;

Isenna oletixxe tuulo assaan;

ise giddo hedheekaranna xexxeeraan.

2 Yaane duuchcha mitte bifaxxe kaddaan;

ardake'n kaddaaxxi duuchcha qeesichchoke'n,

erganjoke'n kaddaaxxi isike gootta'n,

erganjote'n kaddaaxxi isexxe giitte'n,

hidhdhaake'ni kaddaaxxi gurgudhdhamake'ni,

liqeefatamake'ni kaddaaxxi liqeesammake'ni,

liqa hiisamake'ni kaddaaxxe liqeesammake'ni kaddaan.

3 Butta haranga duwwi gattaan;

harnga saamendaan;

Duuchchi Woddiki Gootti konne hiyyichcho haaso'edheen.

4 Butta yo'oshsha baggee'naa harcataan;

butta duuchchi hana hunna harcaataan;

buttatixxi hayyoolenna shaqqitaan.

5 Butta ise giddo hedheeke ardinni battoottaan;

ardikinna seera sa'eedheen;

Aadatanna enqe'een;

duuchchi woddixxa kakonna diige'een.

6 Tennexxee badino butta balleessita;

ardi isekinna balleessa ifixxe muremaan;

Tennexxe buttate'n hedheek manni gubate'een;

lumooshsha heenok manni calli gate'een.

7 Reefixxi woyinetixxi booka mudde

woyinetik hiddichchinna bage;

gamadammak duuchchirinna yaade.

8 Okoliinxi gammashonna sammi hite

burraaqammake mannik cancinna uurre;

gammachchiisammak lumoo kiraarinna bucuqqi gophe.

9 Ta'anni edi'a sirbina'n woyinetixxa booka ha'winabaan

ha'watinna ha'wammake qaraarta.

10 Diigemeeki qachchi onee gataan;

mini minixxi hula cufende.

11 Ora ora'n tee woyinetixxe booka hina'n raarraan;

gammashsho duuchcha yaaddotiba'a jijjiierenda;

lumoxxi gammashshonna butta duuchchanaa'n baxxe'een.

12 Qachchi findigeme kutti hiyye'een;

isixxi huluwwanna buttuttee ibbe'een.

13 Ejersiink haqichchi ganemaa wodda

woyinetixxi roddenna woxendaa wodda deegge gattammashsha

Ookkonne boga'n

ardake'ninna tennende kaddaan.

14 Hafuura ifikanna gikki assinaan gammashshotinna raarraan

dhidhimakenaa'n Duuchchi Woddike Gootitika ulfinna laqinsaan.

15 Tennexxee borote'n Duuchchi Woddika Gootta ulfeessaan;

abbaayyatixxe giddichchonaa'ninna

Duuchchi Woddike Gootta Isira'eelike Magenika summa lummisaan.

16 Tenne buttatixxe gabalanaa'n lanqennexxi;

«Qullichchi'a Ulfinni kaddowwaali! Hitaaxxa faaro.»

Ani kinni «Huqqate bagenne! Ani'a aanne'e!

Seera sa'aak manni ane'e sa'isse uwwe;

Seera sa'aak manni insa'neexxe seera sa'anni anee sa'issine uune» hiyyenne.

17 Koo buttate'n hexxetteke ardaa!

baletinnaa fonxoro atee heqqexxa'neen.

18 Weekenshatike hafuurnaa'n baajak

balete'n iba;

Baletenaa'n fulaakinna

fonxorote'n abidemaan.

Iimatixxi maskootuwwanna banendemmaxxe

buttixxi boosonna sheke sheke hite.

19 Butta hacaqqi hite;

butta wa'a hite;

butta haranga sheke sheke hite.

20 Butta machcho'ee manjishsha gatantartaan;

diidallo daassitaake minishsha kadde;

Isek bululik ha'ure jabake kademmaxxe ise ibbaan; higge dandeette kexxabaan.

21 Eettenne barra Duuchchi Woddiki Gootti

iima hexxeexxa hunnuwwa

aadde hunda butta hedheeka moyanjiuwwanna mura woxaashsha assaan.

22 Eettene bale giddo hedheeke alallisanjuishsha

insa'ne mittebaa gafemmaan;

Usurriink mininna insa'ne'n cufemaan;

heddo barra udumanna murtetee shinqaan.

23 Dada Duuchcha Ajajaaki Duuchchi Woddiki Gootti

Tsiyoonixxe kooba'ninna Iyyerusaalemi'n

Isexxe geedhe edo ulfinnik moyaan;

agenji rubukki hiyyaan; arishshotinna shookkaan.