1 Kunnise Dada Duuchchik Gootti,

Dada Duuchcha Ajajaak Duuchchi Woddik Gootti

Iyyerusaalemikinna Yihudiinki ardi

gargaareme galaammaxxa

Iitanna wode'e iittanni welechcho duuchcha hoyye biraan.

2 Insa'neeka jannuwwa, loollinka mannuwwa,

insa'neeka hayyichchuwwannaa wabeeka, insa'neeka gojaammaka mannuwwannaa akeekisanjuwwa,

3 Insa'neeka looliinka manna ajajammakaranna gorsammakaara,

insa'neeka moraaka mannuwwanna edi'a kaddaaxxee faro uudaakaara duuchchiinga

hoyyeexxi bakka insa'neexxa balleessaan.

4 Duuchchi Woddiki Gootti Shiixaaro labbaxxa oose insa'neeke akeekisanuwwa assaan

reefixxi oose insa'ne galchitaan.

5 Ardikinna weli'aani weli mitti mitte miicaani,

manji manjoke'n jaali jaalonge'n ke'aani,

Oosichchi gedhee ulfeessabaani,

tuffantaaki manji ulfeessinaake manjo'n hollaan.

6 Mitte annixxi oose

dayyuwwa insa'neeki giddii'n mitte fildeexxi

«Ati weleechchonna gophphottole oddo'witattoxxa seemma afeettaxxee no'oke akeekanjo kadi;

duuchchingechchi ati assiteteshshanni kadowwali» hinaani.

7 Isinna eettene barra'ni hafuura gikki asseexxi

ha'no gargaara dande'abo'non!

«Ani mini anki giddo itanna seemma afa gophennaxxee

ha'nooke akeekanjo assitine fildinoqqe'e!» hiyye hiissaani.

8 Iyyerusaalemi daaqate'n hexxeeni;

Yihudikinna iba shiqeen;

Tinninna kaddeechchi insaa'nee hunjaaxxe hujenninna haasonnaake haaso'i duuchchi Duuchchi Woddika Gootta hega uundammaxxe

isike gaachchanixxa afenshanna shollishshaaxxen.

9 Insaa'ne uudaake manji'a albi insa'nenngi ege'nishaani;

Sooddoomike mannishsha cubbo insa'neexxi farri hite ege'nendeexxen;

sho'ne dandeenabaan;

Rakko ifi'aani adhdhinemmaxxe

insa'ne'a aanne.

10 Eloxxa assaaki ebbiseemaaxxa insa'ne'n kuli;

insa'ne eloxxe ifixxe hujeka hira alfinaan.

11 Fuggaalleeyyete aanne! Ba'ne

insa'ne'n daggaan;

huje insa'neexxika hira alfinaan.

12 Maalaqa liqeesaake manni'a aane'e

insa'ne dhaala dhaalchinsa'n adhdhanee arda anka duwwi gatisa'neen.

Anke arda, akeekisano ha'nooxxi ha'no dedhissa'neeni;

dabiinke ora'n me'itinaashsha assina'neen.

13 Duuchchi Woddiki Gootti murtetike barcuma'ni ofo'leeni;

ardakeenna murte uwwo'a qophpheffateeni.

14 Duuchchi Woddik Gootti ardiinxa akeekisanonna gorsa uwwammaka manna murtetibaa shiqisheexxi:

«Woyinetike hiddichchika fichcha saandineen;

hiyyeeyyetenaa'n saandinemmaxxa karra mine ha'nooke'n wonshexxineen.

15 Anke ardika micco enqitino'aanna

hiyyeeyye miiccino'a seera ha'no'a uwweeki hedhebaani;

Tenneenna haaso'aanek

ani Dada Duuchcha Ajajanok Duuchchi Woddike Gootta Magenon.»

16 Duuchchi Woddiki Gootti,

«Iyyerusaalemixxe melaallexxi holla birasaxxeeni;

Gooba qeerrisee

illeti qiphaa'neeni;

Mususuqqe laana tarkaafata'n me'ita'neeni,

lekkate'n usudhitemmaki seesi caca'issane'neen.

17 Tennexxee dada duuchchik Duuchchi Woddiki Gootti umo insa'neeka

sanqe birtaashsha assaan.

Duuchchi Woddiki Gootti biso insa'neekanna duwwi gatisaan» hiyye.

18 Eettene barra Duuchchi Woddiki Gootti ulfiniinka insa'neka seessuwwa kunniirinna: insa'nexxa lekkatixxa sageetto, umiinka seesuwwa, agenjiinxe fakkeekka gobiinka seesuwwa, 19 insa'neka mashatika gutichchuwwa, angatika hirbooruwwa, alba buqeccatichchuwwa, 20 insa'neka umo buqe'namachchuwwa, ciqiletika seessuwwa, boonduwwa, shittotixxa bilqaaxxuwwa, moro morsiisatixxi borro giddo borreeseneeka subbuwwa, 21 qubbatixxa qubuwwanna sanotixxa qubuwwa, 22 biifaaka zuuruwwa, giddixxa layinuwwa, kaabbuwwanna angatika borsuwwa, 23 daa'wituwwa, shimelik gandeexxa seemma, umiinka seesuwwa, illetike gaarika seesuwwa duuchcha insa'nenaa'n qoxaan.

24 Shittotixxa bakka bochcho,

eloke sabbatixxa bakka wodaro,

Goofaaretixxa bakka sanqe,

ejjiinxa baka muddexxa seemma,

danchuuwwi shooko odo'waan!

25 Ha'nook labballi wolaantichchike qarinni,

ha'nook jajjabbi ka'umuwwi bagedoke'ni reyaani.

26 Iyyerusaalemike qachchixxi huluwwa oose isexxa shinnee'naa duwwitti hexxe yaadda'nee ooxxaan;

isenna dedhende qofi hexxeexxe manjichchoshsha kaddaani.