1 Dayyeesse arda anka dayyeesse

hiyya'neen ha'nook Mageni.

2 Iyyerusaalemi'a shaqake haaso'inni ise'n kulle

ise'ninna lallabbe;

Garbumati ergatendammak isek bar muuxemeedheen;

isexxe cubbok hirinna uwwemedheen;

Ifixxe cubbo duuchchixxee Duuchchi Woddike Goottixxe anganaa'n

lame anga mura woxa adhdhite'een.

3 Lallaba kulaa'neeke manjiki hafuuri hiyya'nee qici:

«Duuchchi Woddike Gootitka ora

qiilla gammoojje'n qophpheesse;

No'oke Mageni'a lumooka ora

qiilla gammoojje'n giisse!✝

4 Dhooquwwa duuchcha wo'mitaani;

koobuwwatinna tullichchuwwi tiriggi hiyyaan;

bobboqqichchi boginna dirrete kadaan;

gooruwwatinna diidake kaddaan.

5 Duuchchi Woddik Gootti gaachchaninna leellaan

manji duuchcinna isoo mitteba uudaan;

Duuchchi Woddike Goottik afo'inna tenne haaso'edheen.»✝

6 Mitti hafuurinna anee'e «Raar!» hiyye.

Aninna «Maa hiyye raaranno?» hiyyenne.

«Manji duuchchi badda'atishshaten;

isik gaachchanninna badda'atike daraarishshaten.

7 Badda'a baggaan;

daraarikinna harca'aan

Duuchchi Woddike Goottik hafuuri itti diidalleessedheen;

dhugaande, ardi badda'aten.

8 Badda'a baggaan; daraarikinna harca'aan;

No'oke Mageniki hiyyichchi kinni duuchchi woddi'a hedhaan.» ✝

9 Ati koo Tsiyooni'n eloxxa odo kuldaatek

lumoxxe kooba hani'a qabati;

Koo ati Iyyerusaalemi'a eloxxa yaane iyyedagaattek

atika hafuura gikki assite raar;

Gikki assi meenni sodaat;

Yihudake qachchuwwa'ninna

«Kunnise ha'nook Mageni!» hiyyi.

10 Kunnise Lumok Duuchchi Woddiki Gootti hunnat

dagaan;

Isixxi hirre isi'a galchitaan;

kunnise isik hiri isinni welti hedheen;

isi uwwaaki hirinna isinni welt hedheen.✝

11 Ifika hore alalsanjishsha bobbaalsa;

gedhebiinka buruusuwwanna ifixxe anganni bukki assaan

Hanqalfenna insa'nee abixxaan;

unu'naakaaranna xexxe'achchoti akeekaan.✝

12 Wode'uwwa oobot mikeeki;

iimuwwatanna ifixxe taakkonni mikeek;

Buttatika buttinuwwa safaranjik bukk asse abideek;

koobuwwa kiiloti

tullichchuwwakanna mikisanjik mikeek ayyete?

13 Duuchchi Woddika Goottika hafuura qalbeefateek

isi'a gorsa uwweexxi isoo barsiiseek aate?✝

14 Ege'na alfo'a Duuchchi Woddik Gootti gorsa ayyena'n laqedhe?

toggichcha ora isoo aate barsiise?

Isoo ege'na barsiseek

qalbeefachchotika ora isi'a leellisheek aatemma?

15 Kunnise gosa gosak arduwwi waabi giddo hexxeexxe cingoshaten;

kiilot hana hedheeke huurishsha laakko'emaan;

giddichchuwwatanna bukotishsha mikaan.

16 Libaanoosi hedheek haqqichchuwwi tolchimalchiinxe haqqe'a geyaba'a;

Libaanosi hedheeke horik laakkossinna cincatike tolchi'a heeno'maan.

17 Gosa gosak arduwwi duuchchi isi edo mitteechchonabaani;

insaa'ne isi edo laakkossa afeebaachchishshaten.

18 Yoona Mageno ayyinni welti qixxeessitina?

heene fakkenni weltita weli afensissina?

19 Bocendeexxa misile angatixxe ogek hujalli bocaan;

worqe tumaakinna ise'e worqe buqaan;

biretika sibiljika haachchabanna ise'a qixxesaan.✝

20 Iitta hexxeexxa uwwa shiqisha dande'aabak buxxanji hiyyeessi;

quqi itabaaka haqichcho filaan;

Ibbabaaxxa fakkenna uurrisatee

ege'nemeeka angatixxa oge afeeka manjo hasaan.

21 Ha'no egendineeba'a adana?

Laqqineebaa adana?

Olminaa'n ha'non kullebaa adana?

butta dadeendeexxe yannaa'n qalbeefatinebaa adana?

22 Isi buttatike ququbbinni iimi darre eettene ifixxe moote'n ofo'laan;

buttatik arduwwinna awwaanesiishshaten.

Iimuwwatanna gogiinsha dhisaakenna galdumiinke duunkaanishshanna otaaken;

23 Isi lumollamma galchammaka manna salphise;

he'nebaashsha assaan.

24 Insa'ne reefi latee hidda adda oltebaake hiddichchishshaten:

Duuchchi Woddiki Gootti diidallo ergaa wodda iikki woddi bangaan:

huuriinshsha inbeebi gopheman.

25 «Yoona, anee ayyinni qixxe assitina'nee?

Ayyinnita fakkesesitina?» hiyya'neeni woyyichchi Mageni.

26 Toggi hitine Iimi'a uude:

uudina'neexxa urijuwwa dadeki ayyete?

Isi tenne urjuwwa sannachchinsha bobbaasaan:

laakkossik me'eke kaddeexxa ege'ne'en:

mitte mittenda summiki ye'aani:

isi hunnaameesakenna yo'oshsha lumoke kademmaxxee:

tenne urjuwwanaa'ni mitte midde baxxaaxxi hexxabaan.

27 Ya'iqoobixxe sanne koo Isira'eelike arda!

«Duuchchi Woddiki Gootti anee uuda'nebaan;

anxa yaane butta ugge waalen»

hita'n mayee gungundatto?

28 Egendeboxxoo? Laqqeeboxxoo?

Mageni Duuchchi Woddike Goottan;

isi buttatanna ise giddo hedheechcho duuchcha dadeeken:

Isi haranga shaqqabaan yookaan gophabaan,

yaada isika ayyinna dande'e ege'naak hedhebaani.

29 Isi hunna gopheeke hunna uwwaan;

jabeenna afebaake jabeenna lebaan.

30 Dargaggeyye midde hunna gophphaan:

ka'umuwwikinna jabenna gophe ibaan:

31 Duuchchi Woddike Gootta'ni addante he'naake'e kinni

haaroonse'ma'ne me'inaan.

Sinbiriinsha keelik ke'naan:

gonginaani gonphabaan

me'inaani shaqqinabaani.