1 Amootsiki belti Issayaasi Baabiloonixxee uudeexxa yaane;✝

2 Mittilchinna latabaaxxe koobaxxe xungo'ni hana beesisa fannisse;

hafuura ha'nooka gikki assitineexxi raarre;

Babiloonike galchatike manniba'a e'yinammaxxe hulaba'n e'yinaashsha

angati akeekke.

3 Anxe injifachcho'n gammaddaaxxa woyyoole ajajaannen;

mufe anxanna muunxaashsha

anxa jannoolle ye'eennen.

4 Koobuwwatenaa'n hedheka heddo ardike cancishsha

laqenda'neexxa raarre laqqe;

Mootummuwwati giddonna

lumoke ardike hafuurishsha hedheeka hoga laqqe;

Dada Duuchcha Ajajak Duuchchi Woddiki Gootti

isika sannachcha lolakee qophphesa'neen.

5 Duuchchi Woddik Gootti ifixxe mufeka loliinka mi'ya

ookkone boga duuchcha balleessatee

Bayyi boginaa'n

iimatike kasinaa'n dage'een.

6 Dada Duuchcha ajajaake Duuchchi Woddike Goottixxi barra gelteen woo! Woo! Hitinaa'n oodhdhe;

duuchiinxa dande'aakenaa'n ba'ne daggaan.✝

7 Tennexxe anguwwa duuchcha naaafake kaddaan;

mitti mittinge manjixxi qalbe sodaate culphisaan.

8 Weekensha insa'ne'n daggaan;

wixxirrinnaa ciniinto insa'ne'n geltaan;

ciniifattammaxxe manjichchoshsha ciniifantaan;

Alaayyik weli weli uundaan;

alb insa'neek alaayyik kashiloke kadaan.

9 Kunnise Duuchchi Woddike Goottixxi barra shiqqeen;

butta duwwi gatiso'a

Ise giddo hexxeexxa cubbaalleeyyenna balleesso'a

balatinna jabaxxe mufenni dagaan.

10 Mitte urjenna isek sannachchuwwi

ifa uutaba'a

Arishshotinna fuldeenge hirba'n dukkanda;

ageenjikinna ifa uwwabaan.✝

11 Butta fuggo isexxee,

fuggaalleessa manna cubbo insa'nexxe xixannon;

Hollaameeyyetixxa ifi dukanna gatisannon;

mararte afeebaaka mannixxa ifi saadanna salphisannon.

12 Manjo ca'itte worqe caala fiixxa

Ofiirixxe worqe caalanna quba sa'eeke assannon.

13 Tennexxe Dada Duuchcha Ajajannoki Duuchchi Woddiki Goottixxe bala

isixxi mufenna bubbaaxxa barra

Iimuwwa le'misannon;

buttatanna isexxa bakkanaa'n shekesheke assannon.✝

14 Adamendeexxe geedummshasha

allalisanjo afebaake gedhebishsha

Mitti mittingi manji ifike ardiba'a higginaan;

mitti mitting ififike bogiba'a baajaan.

15 Booji'eeke duuchchi otema

abidemeek duuchchinna wolaantichchik shiyema.

16 Ille insa'neexxi unda'naanni annoole insa'neexxi hoocendaan;

mine insa'neeka saamemaani; are insa'neexxinna hunnat diinphaan.

17 Kunnise birretike sibilji insa'nee maachchonna lababaaka

worqete'ninna gammadabaaka

Meedoonika manna insa'ne'n ke'issannon.

18 Gabe insa'neexxi dargaggeeyye birtaan

annooletanna waaldabaan

ille insa'neexxi ooseteenna mararabaan.

19 Mootummatike seesa

Kalaadayike mannike ifi saada

Kaddeexxa Baabiloonii'i

Mageni Sooddoomishshannaa Gomorashsha fonqolchaan.

20 Ise giddonna baro duuchcha'n ofo'laak hedhebaan

ise giddo hedhaakinna hedhabaan

Arabiink manni ookko dunkaana ifika oltabaan

allalisanji ore ifika okko bobbaasabaan.

21 Yaane kinni qiilla gammoojjek biniinchi okko ciisa;

jeedaluwwi okko hedheeke minuwwa'n wo'maan;

Urunguwwa ookko hexxaan;

qiilla gammoojjexxe re'e labbaak duriis ookko burraaqaan.✝

22 Woraabesuwwi ookko hedheeke kinjuwwike mini giddonna

ookko hedheek jeedaluwwinna danchoomeke mootomatike mini giddo ookko hedhee raraan;

Yanna isexxinna sheqqexxeen;

barra isexxinna qeerrexxabaan.