1 «Yaane kinni higgeen anke erganjo Ya'iqoobi,

fi'lenneke koo Isira'eelike arda! Caqasi.

2 Amati gadaameessi giddo ha'no dadennekenna

ha'noo gargaarenneki ante Duuchchi Woddike Goottan;

anke erganjuwwa kaddinemmaxxeenna ha'no fi'leenneke koo, Yishuruun sodaatinoqqe.

3 Wode'e gopheeke bogi'a wode'e uwwannon;

bagok buttinanaa'n muummuwwa yaataashsha assannon;

Hafuura anka oose atixxe'n dunannon;

eebba anxa oose atixixxe oosuwwa'a uwwannon.

4 Insa'ne wode'e adda ha'winseexxe badda'ashsha,

lagin qarqara hedhemmake hokkokotike haqichchishsha lantaan.

5 Mitti, ‹Ani Duuchchi Woddike Goottiken› hiyyaan;

weli Ya'iqoobike summinn ifi ye'naan;

Weli kinni, ‹Ani Duuchchi Woddike Goottike manjon› hiyyaaka beesisa angate'n naqqase borreesedhaan;

Ifinna Isira'eeli hiyyemeeke summinni ye'emaan.»

6 «Duuchchi woddiki Gootti Isira'eeliki moyanjinna

anjiral Dada Duuchcha Ajajak Duuchchi Woddiki Gootti hiyya'nee qici:

Edikinna udumik anten;

ane malee weli Mageni hedhebaan.✝

7 Anishsha hedheeki ayyete?

Hedheexxe kaddoole haaso'owwaali;

arda anka olma dadenne wodda maachchi kadeexxa

Edi'a maachchi kadaaxxa haaso'owwaal; ani edo barrisowwaal;

Edi'a kaddaaxxeenna ediseenn haaso'o'wwaal.

8 Ha'no sodaatine, alaaltinoqqe;

ediseen edike baro'ni ha'no'n kuleennabaa? Yookaani farri asse ha'no'ni haaso'ebe'no?

Tennexxeenna ha'no dhugaa anxen;

anee malee weli Mageni hedheessi?

Ani gadhi darre wele jabaxxi rassa hexxebaan.»

9 Magenoofataxxa fakkuwwa giissaaki duuchchi woyi fulaakeerabaan;

giissinaaxxi yaanuwwa hira afebaachchon

Insa'ne'a haaso'a'neek manninna balla'uwwaken

ege'na afeekeerabaan shoonkaan.

10 Manji mitti mitte la'onna uutabaaxxa magenoofachchotixxa fakke yookaan misile hucca?

11 Insa'ne magenoofataaki duuchchi salphataan; magenoofataxxa fakkuwwa giissaaki manjoke malee Magenokebaan; mee insa'ne duuchchiingi ani edo uurrinowwal; insa'ne duuchchiingi alaanne culphinsee salphantaan.

12 Sibilo tumammaki manji magenoofataaxxa fakkuwwa giisso'a sibilo giirate'n finiinsan. Sibilokanna afeexxe hunnanni burrisikinna tume bifa afaashsha assa; tennee iitta assa wodda solo'waan, dheebo'waan, gophaani.

13 Haqqe bocatixxe ogeki manji haqichcho mikaan;

itti hana xerri assa'n borreessaan;

Bocammake miyinninna toora toora fulchaan;

soofexxinna giissaan toora toora fulche seesaani.

Dedhi hedhebaaxxa kokeessaan.

Dancha manjixxa fakke afaashsha asse giissaan;

isoonna magenoofatammaxxe fakkuwwake mine'n uggaani.

14 Tennexxee assatte birbirsa, weddeessa yookaani qilxa gongomakenaa'ni fi'laan; iitta kada gophphoole haqqetixxe ogeka manjo hi'neessa kaasise xeenik nophphaa qico'ni heqqedhaan.

15 Manji haqichcho gamisa giidhdhaan, gamisa magenoofachchotixxa fakkuwwa giissedhaan; gamisa giira giire ita ra'isedhaan; isoonni magenoofataaxxa fakke giissedheexxi magenoofataan.

16 Gamisa giireexxi ita ra'issedhaani; maalakanna dudhdhiirshe goddaa qico'n itaan; guba'le eebbeechchi uduma, «Yo'oshsha mambe'iinxe giiran! Hittata eebita'ne!»

17 Gatemmaka haqichcho magenoofataaxxe fakke assedhe giissedheexxi isi edo sagada'n magenoonfataan; «Ati anke magenon; anee anjir!» hiyya'n ise soodaataani.

18 Iitta hedheeki manni ille insa'neexxi abidedemmaxxee uuda dandeennabaan; woyi fuldabaaxxa fakkuwwa magenoofantaa woddanna qalbeenfantabaan;

19 «Konne haqichchika gamisa giireenneni;

isike kashilo'ninna ita ra'isedhenne;

maalakanna ise'n dudhdhiirshe itennen;

yoona ta'a gatemmaka itisanjo magenoofatammaxxe fakke assedhanno?

Konne mitte itisanji haqichchi edo ibe magenoofatanno?»

hiyye hedaaka beekkuma yookaan yaada afeeki mitti manji hedhebaan.

20 Gubate bululoke kadaaka haqichcho magenoonfataa qico'n manji hitta gowwomma; gowwumamtiki yaadi isoo dedhiseen; dande'e ifi anjirabaan; yookaani «Kunni anxe middixxe anga'n hedhdhechchi magenoofataaxxe fakke malee magenokebaan» hiyya dande'abaan.

21 «Koo Isira'eeli! Ati anke erganjonn, koo Ya'iqoob tenne hiyyannexxa duuchcha qaabbat:

ani atee dadenneki;

atinna anke erganjo kaddettexxa deetoxxe;

aninna atee dedhabe'non.

22 Balleessa atixxa dumanchiinsha cubbo atixxa gorisixxe hurreshsha atenaa'n fugusseennen,

atee wodeennakee anibaa higi.»

23 Iimuwwa! Duuchchi Woddiki Gootti arda ifika Isira'eeli anjire'naa ardikinna isoo ulfeessammaxxee;

gammadik faaro faarsi; buttatinna hundii'n ililisi;

koobuwwa, gongomi giddo hexxineexxi haqquwwa duuchcha;

gammadik burraaqqe.

24 «Atixxe amake gadaameessi giddo atee dadeek atenna wodeek

Duuchchi Woddik Gootti hiyya'nee qici:

«Ani Duuchchi Woddik Gootti,

Ani duuchchiingechcho dadenneki,

ani calli iimuwwa dhiseenneki

buttatanna ani calli diriirsenneki,

ani Magenoken.

25 «Dhariyye wabeekoka beesisuwwa,

morammake mannixxa moro tola gatisannon.

Beekkoletenaa'n ege'nanna hoyyaannon;

ege'na insa'neexxanna gowwummate'n jijjiirannoni;✝

26 Ergatoole anxika hiyyichcho duudhannon

wabeeko anxiki wabeekummanni muuxendaashsha assannon.

«Insa'neenna Iyyerusaalemii'i, ‹Ardi hedhaaba kaddattoni›

Yihudiinka qachchuwwa, ‹haarooba ijaarraani›

findigememmaka qachchuwanna, ‹qammalchemaan› hiyyannon.

27 Lumoxxa abbaayya, ‹atinna bagi,

ani abbaayyuwwatanna bassannon› hiyyannon.

28 Qiroosii, ‹Ati anke horike allalisanjoni

yaada anka duuchcha muuxxatton;

Iyyerusaaleminna, «Ati haarooba ijaarendattoni.»

Isi galmakanna, «Booso atixxi safenduun» hiyyaan› hiyyannon.