1 Duuchchi Woddiki Gootti hiyya'nee qici:

«Anenna qullumma harsitinaa'neeki caqqasse;

Isonaa'ni afendinemmaka kinjonna

fuldinemmaxxa bale uudde.

2 Abirihaami ha'nooka annanna

ha'no ildemmaxxa Saara uudde;

Abraami ye'enne wodda ila afemabaan;

yaane kinni ani isoo eebbisennen;

horte isixxanna bira sa'issennen.

3 Ani Duuchchi Woddiki Gootti Tsiyooninna diigendemmake iseke boonchuwwaa'ni hedheeka duuchcha jajjabessannon;

uruma isekanna Edeenike eloke hiddichchiinke fichchishsha assannoon;

ookko gammashshotinna ilileette hexxaan;

iittanni galatiinxi faaronna laqendaan.

4 «Anke arda! Laqqe! Ha'no'a hiyyaannexxanna caqase;

seera ante fulchannoni;

qullumma anxinna gosa gosake ardi duuchchi'a ifake kadaan.

5 Rake dageneexxi ha'noo anjirannoni;

qullumma anxi hirbange'n daggaan;

Hunna anxenni gosa gosaka arda duuchcha galichchannoni;

giddichchuwwate'n hedhammak gosa gosak ardi,

Daga anxe heqqedhaan;

hunna anxanna addataan.

6 Toggi hitine iimuwwa, buttatanna uudde;

iimuwwa wilileetishsha higgeeba gonphaan;

buttatinna seemmatishsha muddaani;

ise'n hedhaaki duuchchi iittichchiinsha kutti hiyyaan;

anjira anxi kinni duuchchi woddi'a hexxaan;

qullumma anxinna baro baro'ninni hexxaaxxeni.

7 «Ha'no qullumma egendineekinna

seera anka qalbete'n abixxitineeke manna ani hiyyaannexxa caqase;

manniinka miidhdhaama sodaatinoqqe; yookaani yowwichcho insa'neeke riffi hitinoqqe.

8 Insa'ne bile itteexxe seemmashshanna

corroqa ittemmake gedhebiinxe ordan giissemeeke mi'yishsha kandaan;

injifaachcho anxi kinni duuchchi woddixxen;

anjirumma anxiinna ila ila'ni hexxaaxxen» hiyye.

9 Duuchchi Woddike Gootta! Ke'i kexxettexxi hunna atixxa leellishi!

Edike baro'n hexxemmaxxe ila'ni assiteteeshshaani ke'i;

Re'aabi hinammaxxa abbaayyatixxa jawwe kukkutte bulleessitetteki ateteni.

10 Ati woddetteki ardi foofaashsha abbaayyatanna dhi'mootika wode'e bassite,

insa'ne'a ora fulchitetteki atetebaa?

11 Tennexxee ati Duuchchi Woddiki Gootti anjirtetteki ardi

faarsaa'n Tsiyooni'a higaan.

Duuchchi woddi'anna gammadaan.

Duuchchi woddi'a gammada'ninnaa ililinsa'ni hedhaan;

yaaddonna rakko kinni insa'nenaa'n baxxaan.

12 «Ha'no dayyeessaanneki anten;

yoona badda'atishsha qoorakanna

reyaaka manjota mayee sodaatina?

13 Buttatixxa booso dadekanna iimuwwa dhiseeka,

ha'no dadeeka Duuchchi Woddika Gootta deetineen.

Ha'noo balleeso'a qophphefateeke ha'no miicammake mannixxe mufenaa'n kexxeexxa,

Duuchchi wodda soda'ati hexxinaa'neen.

Insa'neexxi mufe ta'a haba hexxe?

14 Usuriinke minki manni usurrakenaa'ni rake tikeeman;

usurememmaxxe balee giddonna reyaabaani;

itaachchonna gonphabaan.

15 «Abbaayya le'mise danbala'i ganemaashsha assaanneki,

ani Dada Duuchcha Ajajak Duuchchi Woddike Gootta ha'nooke Magenon;

summi ankinna dada duuchcha ajajannoke Duuchchi Woddike Goottan.

16 Hiyyichcho anka afo'o atike'n uggannon;

Iyyerussaam atenna anga anxike gaaddisinni golannon;

Iimuwwa dhisenneki, buttatixxa boosonna dadeenneki anten;

Tsiyooninna, ‹ati anke ardani hiyyannoni.› »

17 Ati Duuchchi Woddike Goottixxe angaxxe,

machchessite gatantarsitaaxxe mufe tixxe buudanaa'n,

Lummoke qasha'n cingise ha'witettexxe Iyyerusaalemi!

Dammaqi; kexxetexxi uurri!✝

18 Ate akeekaaki haranga hedhebaani;

ilde nossitettexxe oose duuchchanaa'n;

anga atixxa abide atee akeekaaxxi afemebaan.

19 Rakkotinna ba'ne, solo'ikinna bagedi,

tinni lame yaane ate'n gelteen;

yaaddato wodda atinni yaadaak ayyete?

Ayyete atee jajjabeessa?

20 Oose atixxi fonxoro abiddeexxe geedummashsha,

ora ora'in gophphe ibbe'en;

Duuchchi Woddike Gootti Mageninna insa'nee mufate xixeen.

21 Tennexxee woyinetika bulbulonni ha'witinebaangi rakkoti machchootineeke,

ha'no hiyyaanexxa laqqe.

22 Ardiinxe ku'la'a baassaaki ha'nooki Duuchchi Woddiki Gootti,

ha'nooki Mageni, hiyya'nee qici:

«Machcho'eke manjishsha gatantaarsitaaxxa uwwennexxa rakkotixxa buuda ha'nonaa'ni adhdhenneni;

konnechchinni edi'a lumoxxe anxe mufeke lummoke qashanaa'ni ha'witinabaan.

23 Rakkotixxi buudanna ati,

‹Heeshshi hitee'naa ha'nee dudduro atiki hana me'ino›

hiyya'n atee rakkisammake mannixxe anga'n uwwaannen;

Atinna ati hana ha'na'n me'ino'a dudduuro atika

insa'ne'a buttiniinshanna oriinsha assitetten.»