1 Giddichchote'n hexxina'neeke gosa gosake arda hiyyaaneexxa laqqe!

Bayyike boga'n hexxina'neeke arda qalbeefatte;

Ilemebo'noning Duuchchi Woddiki Gootti anee ye'een;

anxe amake gadaamessi giddonni hedhe'naa summa anka fulcheen.✝

2 Arrabo anka qareeke wolaantichcho asseen;

ifixxe angake gaaddis giddo anee sho'een;

Qarsemeeke mogido anee gonofi giddo sho'edheen.✝

3 Isinna anee «Isira'eeli! Ati anke erganjo;

atixxe hiyye arduwwi anee ulfeessaan» hiyye.

4 Ani kinni «Tolanga elo'ennen

la'o belo hunna anxa birennen;

Kaddoolenna anki hiri Duuchchi Woddike Gootta'n hedheen;

elo anxiki hirinna iso'inni hedheen» hiyye.

5 Ama anxike gadaameessi giddo hedhee'naa Duuchchi Woddiki Gootti anee fileen;

Xexxeeremeeka Isira'eelika arda bukki assonnaa anee erganjo ifike assedheen.

Ani Duuchchi Woddike Gootti edo ulfaateenneken.

Isinna anxe hunnan.

6 Duuchchi Woddiki Goottinna anee hiyyee qici, «Ya'iqoobixxe gosaka arda haaroba ulfaatashsha assitottaanna;

Isira'eelike ardinaa'n gateeka hiissitotta'a erganjo anke kadde huja calli geltabaan.

Kinni tennenaa'n saxxaaxxa anjrumma anxa buttatixxe gabala qico'n geessissattoshsha;

gosa gosake ardi duuchchi'a ati ifake kaddattoshsha assennen» hiyye.✝

7 Gosa gosake arda'n lumoshsha tuffatende jibbendetteka,

Arda galchammakiiri'anna erganjoke kaddeetteka atee,

Anjiralli Isira'eeliki Woyyichchi Duuchchi Woddiki Gootti Mageni hiyya'nee qici,

«Moyanjuwwi atee uudaa wodda iimi'a ke'aan;

Mooyanjuwwi atee'e uuda wodda ati'a qophphi hitaan;

moottoleeyye atee uude sagadaan;

tinni kaddeechchi atee fi'leeke xuurameesi Isira'eeliki woyyichchi Magenixxeeten» hiyye.

8 Duuchchi Woddiki Gootti hiyyanee qici:

«Eeyennexxe yanna'n soodachcho atixxee hiissichcho uwwannon;

anjirannoxxe barra'ninna atee gargaarannon;

Ati gosa gosake ardi'a kakotike kaddattoshsha

boga haaroba ijaartattoshsha;

hujemebaak turemmaka boga annannake'n hiissitattoshsha;

atee heqqannon giissannon.✝

9 Atinna usurrii mine hedhemmakara, ‹Tikemme!›

dukkana giddo he'dheeka, ‹ifake'n fulle!› hitattoshsha assennen.

«Insa'nenna ora ora'ninni indaachcho alfinaan;

bagoxxe kooba'n hana re'etishsha bobbaanaan.

10 Insa'nenna solo'winabaan dheebontabaan;

arishsho yookaani qiilla gammoojjexxi diidallo insa'nee miitabaan;

tinninna kaddeechchi insa'ne'a marareeki isi wodi'inxi muumme hexxemmaxxe bakkaba'a insa'nee akeekemmaxxeeten.✝

11 Koobuwwa anxa diriirse'e dirre ora assannon;

ba'laki anki oruwwinna lummedhaan.

12 Ardi anki bayyike boganaa'n dagaan;

middi'ninna dhidhimii'n,

ittanni Sinimi'ni dangaan.»*

13 Duuchchi Woddiki Gootti arda jajjabeessammaxxenna;

rakkatemmakee mararammaxxe;

tee iima! Faaro faarsi;

Tee butta! Gammadi;

koobuwwaa! Ilillisse.

14 Iyyeruussaalemiki ardi kinni, «Duuchchi Woddik Gootti anee waale'en,

Goottikinna anee dedheen» hiyyeen.

15 «Ama ununstaaka ifika finna deetaa?

Yookaani ildeexxe anno'aa marartabaa?

Ise deetolenna midde

Ani kinn atee dedhabo'non! Hiyya'nee Duuchchi Woddik Gootti.

16 Iyyerussaalem ani kinni anxe angake baatani hana borreessedheennen;

dalla'a atikanna duuchchi wodda qaabbatannon.

17 Atika qachcha qammachchaakiir rakee dagaan

findigeeki kinni atenaa'n bayyatee me'aan.

18 Ille atixxenni toggi hite qarqara atika uudi;

oose atixxi duuchchi bukki hite atiba'a daggaan.

Ani hedhannek kada anxenni kakataanen»

tenne duuchcha ati seesiinsha oddo'witattoni.

«Waajubiinshanni fugattatton hiyya'nen Duuchchi Woddik Gootti.

19 «Ati diigende olete kaddottole

bogi atiki kutti hiyye ba'eele

Telcho arda atike cu'matte kaddotolenna midde

atika qachcha findigeekiiriki atebaa'n bayyate me'aan.

20 Booji'ote'n ilendemmaxxi atixxi oose

‹kunni boonchi no'o'a cu'matemmaxxee

he'nannoka baa'laka boga no'o'a uwwi› hitaan.

21 Ookkonneechchi uduma atinna godobi giddo,

‹Tennee oose ayyete ani'a ile?

Heddo anxa oose gophphe ildebaaxxe masento kadeennan;

shorreme, jibbeme hedhennan;

tenne ooseta ayyete nosse?

Ani calli qofinni gateennan;

tinni ooseta habaa'n dagge?› »

22 Duuchchi Woddiki Gootti hiyya'nee qici,

«Atixxa labbaxxa oose angate'n luu'me'ne, dubarra atikanna

gurumote'n dulkine iyyedangaashsha

gosa gosake moyanjuwwake arduwwa'n beesisa leellishannon.

23 Moyanjuwwi ha'no'a annake kandaan;

moyanjuwwiinxi arenna ha'no'a amate kaddaan;

Albi buttina tuqaa qico'n heeshshi hinaa'ni ha'noo ulfeessinaan.

Lekka ha'nooxxixxa bukonna arraaphphinaan;

tennenaa'n kexxeexxe'n ani Duuchchi Woddike Gootta kadennexxa egendatton;

gargaronna'a anee heqqedhaaki shookabaan.»

24 Janniinxe anganaa'n boji'o dandeenne adhdhinaa?

Yookaan hunnaameesiinxe anganaa'n boji'emeeka manjo dandeenne fulchinaa?

25 Duuchchi Woddiki Gootti kinni hiisse hiyyee qici,

«Atinni lolemammakenni ani lolemannaxxee'e

janni booji'eexxi boji'o midde adhendaan;

Hunnaameessi manjixxe anganaa'ninna boji'o hiissendaan;

aninna oose atixxa anjirannon.

26 Atee micaammaki weli'aanni weli shiyaashsha assannon;

woyinetixxa booka ha'wine machchoonnammashsha ifinxa munde ha'wine machchoonnaashsha assannon.

Tennenaa'n kexxeexxa ani Duuchchi Woddike Gootti atike anjirallonna gargaarsanjo;

Isira'eelike hunnaameessa Mageno kadennexxa buttatiki ardi duuchchi ege'naan.»