1 Koo ha'no gosa gosake arda amme caqasse!

Ha'no koo manna qalbeefatte;

buttatinna ise giddo hedhaaki duuchchi

butta duuchcha isenaa'n mudhaachchi duuchchi laqowwaal.

2 Duuchchi Woddiki Gootti gosa gosaka arda duuchcha'n mufate'een;

isixxi mufenna insa'neeke loliinke manna duuchcha'niten;

isinna insa'nee bakka balleessa;

dulemo'anna sa'isse insa'nee uwwaan.

3 Insa'nenaa'n shiyemekiir gadho hunemaan;

renshi insa'neekinna booncho biraan;

koobuwwatinna mundeti munde kaddaan.

4 Iimatixxe urjuwwa duuchchi shudhudhdhi hitaan;

iima mirqisanjo maxaafishsha mirqendaan;

Urjuwwatik sannachchi duuchchi

qoore harca'emmake woyinetike shafishsha

bageexxi ibemmake balasetike shafishsha kadaan.

5 Duuchchi Woddik Goottik wolaantichchi iimate'ni asso'a heedeexxa asseechchi uduma ba'netee mureemmake Eedoomike arda'ni murte muro'a dirraan.✝

6 Duuchchi Woddike Goottik wolaantichchi mundeti mundete kade'een;

ha'yokanna godde'een;

Gedheebiinke buruusixxenna re'etixxe mundenni

gedhebiinke korbeessixxe kalattek ha'yinni buqende'een;

Duuchchi Woddik Gootti Bootsirake qachchike tolchinni

Eedoomi giddonna jabaxxa murte qophpheesse'een.

7 Gafarsiixxi sannenni welti

laliink korminna goronsik welti ibaan;

Bogi insa'neekinna mundeti corco hiyyaan;

buttin insa'neekinna ha'yiki ha'yoke kadaan.

8 Duuchchi Woddiki Gootti halo fulo'a barra

Tsiyoonixxenna moromaaxxi wogga afe'een.

9 Edoomixxi muummuwwa renje,

buttin isekinna ha'yaake kinjo,

bog isekinna ha'yitaaxxe leeyyanni.

10 Giira isexxinna hashshanna barra xoxxabaan

wiliile isseexxinna duuchchi woddi'a tuqu tuqu;

Ilatenaa'n ilati qico'n ise onake kaddaan;

ayyinna langaxxa ookko'n sa'aabaan.✝

11 Joluwwatinna dhaddo ise giddo aaggaan;

guutiguutalenna qoodhandi ise giddo mine ijaadhaan;

Mageni Edoomi'n

isexxe diigenshaxxa wodaro

isexxe ba'nexxa tunbenna diriirsaan.

12 Isexxi hayyoolenna mootummaxxe hiyyeme ye'emaaxxa dandeessaaxxa yaane affabaan

akeekisanjuwwi isek duuchchinna kutti hiyyee ba'aan.

13 Kinjiinke dalla'inni ijaremeeke iseke qachchiinxa ute

golluwwa isexxanna laalessikinna hagali liqinsaan,

jeedaluwwiinxi bale

guutiguutaluwwike galdumanna kaddaan.

14 Qiilla gammoojjek biniinchuwwinna woraabeessuwwiki welti mitteba hedhaan;

qiilla gammoojjexxe re'e fakkataak duriisuwwinna weli'aa weli ye'edhaan;

Hashshixxi daduwwanna galduma ifika ookko assexxaanni

umo ifikeenna he'naaxxa bakka alfinaan.

15 Guutiguutalenna ookko mine ijaadhdhiteexxi quuphphe ibisaan;

quqquussexaan, beltanna ifixxanna keela ifike'n kabbitaan;

Allaattuwwatinna qaphpho qaphpho kaddaann

hortete ookko bukki hitaan.

16 Duuchchi Woddike Goottike maxaafa'n tennete hiyyende borreesendeexxa haasosse;

konnelchuwwanaa'n mittikinna xe'yabaan;

Mitti mitti geelchinna ifixxa qaphpho gophphabaan;

kunni ajaji afo'o isikenaa'n fule'een

konnelchuwwa Hafuuri isiki mitteba bukki assaan.

17 Konnelchuwwi isi qoobbo qoobbo insa'ne'a uggaan;

anga isixxinna mikkeexxi konnelchuwwi'a qoodaan;

Isenna duuchchi woddi'a konnelchuwwixxe kaddaan;

ilatenaa'n ilati qico'ni kunnelchuwwi ookko hedhaan.