1 «Tee ati maseento manjichcho,

ati tee ilde egendebexxoxxi,

Faaro faars; ilillis, gammashshotinna hanga'i;

tee ati ciniifatte egendebexxoxxi,

Aro'o affeexxe manjichcho erra

qofi hexxeexxe manjichchoxxe oose birsaxxaa'n»

hiyya'neen Duuchchi Woddik Gootti.✝

2 Atike duunkaanixxa bakka ba'lis;

atike duunkanika golowwanna lumo qico qeerris;

heeno'maashsha haranga assitoxxe;

Wodaruwwa atixxara qeerris;

chikaala atikaranna jabeessi.

3 Middi bita'aanna ba'lattatton;

horte atixxiir gosa gosaka arduwwa daldee,

Insa'neeke duwwike qachchuwwa'ninna hexxaan.

4 «Mee co'o, sodaattoxxe; shooki ate'n geyabaan;

salphinni ate'n geya gophammxxee mee cuqurto'i;

Dargaggeessumma atixxika shooko deetatto;

aro'o shi'witette woddixxa atixxa yowwema ta'anni edi'a qaabbattabexxo.

5 Ate dadeek atike aro'o kadeemmaxxee

summi isikinna Dada Duuchhca Ajajaake Duuchchi Woddike Goottan;

Atee wodaakinna ookkone Isira'eelike Woyyichchan;

isinna butta duuchchike Mageno hiyyema.

6 Eettene diqatendeexxe muttaara areshsha

irrik cuqurtottexxenna jibbendeexxe areshsha

Duuchchi Woddik Gootti atee higgeen ye'a»

hiyya'neen atik Magen.

7 «Heenooxxe yanna'a atee waaleennan;

yaane kinni lumoxxe mararittenni atee ille iima hiissedhanno.

8 Heenooxxe yanna'a lummoshsha aarennaxxee

alba atenaa'n sho'edheenne;

Yaane kinni duuchchi woddixxe anxe ba'lummanni

ati'a o'wanno»

hiyya'neen atee wodaak Duuchchi Woddik Gootti.

9 «Tinni ani'a Nohike wodi'i butta langaxxa danbala'abaashsha kakatennake

Nohike barishshaten;

Tennexxe ate'n langaxxa mufatabe'noshsha

atee xixabe'noshshanna kakateenne.✝

10 Koobuwwa sheke sheke hitoolenna

tulluchchuwwi ifi fixxe bakkanaa'n midde fuggusemoole,

Hojjoggi hitabaaxxi ani ati'a afennexxi jaalala sheke sheke hitabaan;

ati'a aagenexxi nage'iinxi kakonna diigendabaan»

hiyya'neen ati'a o'waak Duuchchi Woddik Gootti.

11 «Koo ati wixixxi hiteetteke qachchaa, jabaxxe diidallonni rassa'naa'a dayyate'ebexxokee

kunnise eettene fiixa konnenni atee danchoose ijaarannon;

Senper hiyyemaake fiixa kinjinninna booso atixxa giissanno.✝

12 Anixxe fooqexxe guutoxxa bokko diimooke kinjinni,

atike dalla'ixxa huluwwa cala cala hiyyaake fiixxa seesuwwinni,

dalla'uwwa atikanna fiixa kinonni ijarannon.

13 «Atixxi labbaxxi oose duuchcha Duuchchi Woddike Goottinaa'n baratteexxe kadda;

atixxe oosek nage'inna birasa'eeke kada.✝

14 Ati qullummati ijaarendatto;

seeribeloxxi galcha atenaa'n fuggussenda;

atee sodaachchisaachchi hedhabaan;

Weekensha atenaa'n bayyatta;

qarqara atike'ninna shiqabaan.

15 Ayinna ate'n ke'eexxi miidhoole, itti anenaa'nitebaan

atee miidheek duuchchi ati'a anga uwwa.

16 «Kunnise anee ookkone kashili qassiisemaashsha buufaaka

loliinka miya giissaaka, sibilo tumaaka dadennek anten;

ba'ne iyyedagaashshanna isoo dadennek ante;

biraakanna dadennek ante;

17 Ate'n otaashsha giissemeek loliink miyi hujabaan;

atee ku'laaka arbonna injifattatto;

Ta'anni edi'a Duuchchi Woddike Goottike garbuwwik qoobbi konnete;

insa'ne anenaa'n alfinaaxxi insa'neexxi qullumma tenneten;»

Hiyya'neen Duuchchi Woddik Gootti.