1 Gibtseexxe haaso'emeeki Duuchchi Woddike Goottiki hiyyichchi konneechchinni butti'a hedhekeni:

Kuniseteni, Duuchchi Woddiki Gootti duumanchake'n hedhe

Gibtse'a rake daga'neen;

Gibtseke manni magenooffatammaxxi fakkuwwa isi edo rankitaan;

Gibtseki ardinna sodaate culphisaan;

2 «Gibtseeke boga'ni ardi weli'aani weli lolaaki bagedi ke'aashsha assannon;

dayyi dayyonge'n,

olla'i olla'aange'ni naaphake kade ke'aashsha assannon;

qachchuwwi qachchuwwaa,

moyaanji moyaanjuwwa naaphake kade lolaan.

3 Gibtseeki manni hophpholaan;

hendeemmaki heduminna muuxemabaashsha assannon;

Ookkone wodda magenooffantammaxxi fakkuwwa insa'nee gargarto'a morsiilsnaan

ekedha haasossammake manniba marre mari'aantaan; ekedhuwwatenaa'n qorte laqe'naan.

4 Insa'nee mararabaake moyaanjixxe angaa'n sa'isse uwwannon;

Ani Dada Duuchcha Ajajannoki

Duuchchi Woddiki Gootti» tenne haaso'ennen hiyye.

5 Abbaayyike galaani wodi'i xe'yaan;

galaanikinna laana laana bagaan;

6 Wodi'uwwi bobaan;

Gibtseke boga'n dareeriki gorsinemmaki wodi'i laana laana xe'ya'ni bagaan;

baaranguwwanna qooccuwwatinna qortaan.

7 Abbaayike galaani qarqara

hedheeki hiddichchuwwi duuchchi bagaan;

Galaani qarqara hujendeexxi midha duuchchi

baggee'naa diidallo adhdhitaan.

8 Qulxume'e abixxammki manni yaadaan;

Abbaayike galaananaa'n malnxaqqoti qulxu'me darbedhammak duuchchi oodhaan;

Wodu'uwwi hana manxaqqo darbedhaakiir

hunna insa'neexxi gophaan.

9 Fuutta suqa'n giissammakiir,

qa'lake shimalinni haarre hiyyendaaxxa seemma ganammakiir shookaan.

10 Seemma ganammakiir mekki hiyyaan;

runda adhdhamakirinna yaada'ne oodhdhani.

11 Tso'aanke qachchiki moyanjiki jaliqabuwwi haranga gowwoleten;

beettote hiyyemaaki Gbitseke moyanjiki gorsalluwwi isoo woyyifulabaaka gorsa gorsineeni;

Hittata insa'nee moyanjo «No'o beettoten;

hundii'ninni moyaanjumma sanne no'oxenaa'ni daggeexxeni»

hitta hitina?

12 Koo Gibtseeke moyaanjoo! Iikki beeki gorsalluwwi habate hedhe?

Dada Duuchcha Ajajaaki Duuchchi Woddiki Gootti

Gbitse'ni hedeeka yaada

ha'no'n leellishaqqata; kulaqqata?

13 Tso'aaniki jaliqabuwwi gowwe'eeni;

Memifisiki akeekisanjuwwi sobeme'en;

Ardake umoke hiyyemeeki gorsalluwwi

Gibtse'e dedhise'en.

14 Duuchchi Woddike Gootti dillo'atika hafuura insa'ne'ni dune'een;

machcho'alli honqo'emmaxxe honqo'o qarara tinitimammashsha

Gibtsee assitaxxe yaane duuchcha'n

tinnidaashsha assineen;

15 Dureessake kado hiyyeessi, gurra fuleeke kado yookaani ege'nemebaaki

mitte yaannenna Gibtsee'a assa dande'aaxxi hexxebaan.

16 Gibtseeki ardi sodaate meyyaxxe kadaaxxi yanna daggaan. Dada Duuchcha Ajajaaki Duuchchi Woddiki Gootti insa'nee xixo'a hunnati ke'aa wodda sodaante culphinsaan; 17 Yihuda Gibtseeka arda sodaachchisaake kadaan; Yihuda summa ganaa wodda midde lummoshsha weekemmaan; tinninna kaddaachchi Dada Duuchcha Ajajaaki Duuchchi Woddiki Gootti insa'nee xixo'a qophpheefatexxa ege'nemmaxxeeten.

18 Eettene yannaa'n Gibtseeke bogi giddo hedheeki ondi qachchuwwi Ibraawwika laagada haaso'aan; ookko hedhaaki arduwwi kakataa wodda Dada Duuchcha Ajajaake Duuchchi Woddike Goottike summinni kakantaan; konne qachchuwwanaa'n mitti «Arishshotike qachcha» hiyyemaan.

19 Eettene yanna'n Gibtseeke bogi giddo Duuchchi Woddike Gootti'a tolchimalcho giissemaan; iittanni Gibtsexxe gabala'n Duuchchi Woddike Gootti'a foyendeexxi sooddo kaasendaan. 20 Insa'nenna Dada Duuchcha Ajajaaki Duuchchi Woddiki Gootti Gibtseke bogi giddo hedheexxa beesisake kandaan; ookko hedheeki arduwwi rakko insa'ne'n gelteema wodda Duuchchi Woddikal Gootta lanqa wodda insaa'nee anjiraaka ergaan; isinna naphuwwakenaa'ni insa'nee gatisaan. 21 Duuchchi Woddiki Gootti Gibtseeke ardi'a ifi leellishaan; eettene yanna insa'nenna isi Duuchchi Woddike Gootta kadeexxa egenne isoo magenooffaantaan; uwwanna tolcha isi'a shiqinshaan; werreengemmak werreega duuchchanna muunxaan. 22 Duuchchi Woddiki Gootti Gibtseeka manna mura woxisaan; yaane kinni wirri hiyye insaa'nee fayyisaan; isiba'anna wirri hinee hingaan; isinna sodaachcho insa'neexxa laqeexxi insa'nee fayyisaan.

23 Eettene yanna Gibtseekinna Asoorike ardiixxe oddo'n ba'laki ori banemaani; konne lame bogiki ardi elqe kayyanni mammaremaan; lamiinge bogiki ardi mitteba magenooffataani. 24 Eettene yanna'n Isira'eeli Gibtsee'ninna Asoori'ni lebende sakkake boga kaddaan; kunni sase bogiki ardi butta duuchchike ardi'a eebbatixxe kaddaan. 25 Dada Duuchcha Ajajaaki Duuchchi Woddiki Gootti «Ha'no Gibtsee giddo hexxineek anki ardi, daxxeenneke Asoorike ardanna fi'leenke Isira'eelika arda ani ha'noo eebbisennen» hiyyaan.✝