1 «Tee Baabiloonnixxe duuddo dubarichcho

dirri bukote'ni hana ofo'li

Koo Baabiloonike manna

mootumma atixxenaa'ni dirri butta ofo'li

ta'inni elqi'a dancha yookaan lollobbe

hiyyende ye'endaboxxon.✝

2 Yooni daama adhdhite bulle dayi;

hagooqiteettexxa seemma fulchite butta uggi;

ka'liteettaxxa seemma iimi'a enqeexxe gudeedi leela'naa wode'e foof.

3 Ardi duuchchi duwwitti hexxee'naa uudaan;

saali belo gattaatton;

ani ayyi'aanna mararebo'noni halo fulannon.»

4 Anjiraaki Dada Duuchcha Ajajaak Duuchchi Woddiki Goottan;

summi isikinna Isira'eelike Woyyichchan.

5 Duuchchi Woddiki Gootti,

«Tee Baabiloonii! Dukkana giddo ofo'li cuqqi hitoxxe;

konnechchinni edi'a buttatixxe mootitte hiyyedaboxxon.

6 Ani anke arda'n mufatennaan;

insa'ne batto'eechchishsha uudennexxi,

Anga atixxe'ninna sa'isse uwwennen;

ati kinni insa'nee mararteboxxon;

gedhuwwate'ninna ha'ureeka qanbara geessisseten.

7 Isinna, ‹Ani duuchchi woddixxe mootitte kadannon!› hitette;

kaddo malee assitettexxe yaane'ninna mittetanna heddeeboxxon;

tinni uduma maa kaddaaxxanna qaabbateboxxon.

8 «Ati godobi giddo anishsha hedheeki ayyinna hedhebaan;

aro'o shi'witeexxe manjichcho kade hedhabo'non;

‹yookaan ane'ni oose miidhendabaan

ifi addatte ofoldettexxe tee qananitte!

Tennee laqi› hitetten.

9 Tinni lame yaane dedhange'n mitte barra ate'n geltaan;

fedhee qico quba saxxeettexxe gojaameettetenna mortaattexxe kaddottolenna

aro'o atikanna oose atixxa reretee'naa gophphatton.✝

10 Fuggoxxe atixxe huje'n ifi addatte,

‹Ayyinna anee afaak hedhebaani› hita'ne

Ifi saaddetten atixxi ege'nanna beekkumi atiki atee dedhiseen,

‹Godob giddonna anishsha hedheeki ayyinna hedhebaan› hitetten.

11 Gojoti ifi iimii'n hoyyexxaboxxoxxi fuggoxxi yaane ate'n geltaan;

ifinaa'n hoyyedha dandeettaboxxoxxe rakkonna ate'n futti hitaan;

hara heddeboxxoxxi ba'nenna ate'n dedhange'n geltaan.

12 «Amo mee oosummatenaa'n duuchchi wodda

la'onfata'n hexxettaxxa

hawwi assite doochchisatixxa hujenna gojo hucci;

Aki magaada tinni yaanuwwa gargaartaaxxe hexxeen;

yookaani naapha atika konneechchuwwinni sodaachchissatton.

13 Adhdhitetteki gorsi duuchchi eleessaake malee,

mitte la'o ati'a uwwaakebaan;

agenjo agenjoge'n urje uudda'ni edi'a kaddaaxxa moraaki manni dagabaata;

daggaaxxa rakko atenaa'n gatisaqqata.

14 «Insa'nee huuriinsha giira ittaan;

giiratike bubenonaa'n ifi gatisa dandeennabaan;

huurikinna gubadhdhatee kashilo afebaan.

15 Baro atike duuchcha'n ati'a gorsa uwwammakir;

duuchchiingi ora ora'nininni xeeremaan;

mittikinna atee anjiraaki hedhabaan» hiyye.