1 No'o lanqennexxa yaane aate amane?

Duuchchi Woddike Goottixxe hirre ayyaa iffe?✝

2 Isi edo isi mudhiinsha

bagoke buttinanaa'n fuleeke hiddishsha nophpheen;

Ille aaxxaaxxa danchumma yookaan gaachchanna afeemmabaan;

isoo eenannoshsha assitaaxxa dhagganna afe'emmabaan.

3 Isi mannake'n tuffatemeekennaa gibemeeke;

yaaddotike manjonnaa abari isonaa'n gatebaakemman.

Manni alba isonaa'ni sho'edhaa qico'ni

Tuffatemeemmakeman; no'onnaa isoo ulfeessinebo'no.

4 Dhugaandinn isi dhibo no'oxxa adhdhe;

elagonphe no'oxxanna ba'edhe;

no'o kinni Mageni isoo ga'neeshsha

isoo ote'eshsha, madeesseeshsha assinenne.✝

5 Yaane kinni isi no'oxxee sa'eexxi oteme;

no'oxxe balleessaxxe bullo'e;

Iso'n ibbeexxi mura woxxa no'o'a nage'a iyyedagge;

mada isixxenninna fayyinenne.✝

6 No'o duuchchiingi gedhebiinsha orakenaa'n gorre ba'nenne;

mitti mittingi no'onna ifi fike oriba'a me'inennen;

Duuchchi Woddik Gootti no'oo duuchchingixxa balleessa

isi hana fe'e.✝

7 Isi abara uude; wixxixxi hiyye;

yaane kinni bucuqqi hiyyebaan;

Buruusinshanna dulenshatee oofeme;

isinaa'n orda cirammaki edo sammi hiyyammake gedhechchiinsha,

bucuqqi hiyyebaan.✝

8 Abaratinna murtet adhdheme;

anke ardixxe sannexxee ganeme,

Hedhotik mannixxe buttanaa'n fuggussemeexxa

isixxe hortenaa'n aate qalbeefate?✝

9 Afo'o isike'n shokko afendeba'a;

seeribeloxxa yaane assebaangi

Reya isixxi fuggaalleeyyet,

mooggi isikinna dureeyyetikenni welt kade.✝

10 Isixxe bullo'anna isixxi abara uuda kinni Duuchchi Woddike Goottixxe fedhiiman;

Duuchchi Woddik Gootti lubbo isixxa cubbotike tolcha assexxe kadoolenna midde

Isi horte isixxa uuda; wogga isixxanna qeerrisa;

Duuchchi Woddike Goottixxe fedhinna anga isixxe'n muuxema.

11 Isixxe lubboke abari uduma

hedhotika ifa uuda; gammashshotanna gammada;

qullichchi ank garbichchi ifixxe ege'nanni heddo manna qulloonsa;

sanne insa'nexxanna ba'edha.

12 Tennexxee ani qoobbo isika jajjabuwwiinxe oddo'n isi'a uwwanno;

isinna eettene booji'o jajjabuwwik welti qoodema;

Reyoti qico'n lubbo ifixxa sa'isse uwwemmaxxee

fuggoxxa asseek mannirinna laakko'ememmaxxee,

Heddi mannixxa cubbo ba'edhe;

sanne mannixxeenna kadhate.✝