1 «Tee Iyyerussaalem!

Ifi atik ifemmaxxee kexxe ifi;

Duuchchi Woddike Goottik ulfinni ate'n ife'en.

2 Kunnise Dukkana butta

dimma dukkana arduwwa buqqaan;

Yaane kinni Duuchchi Woddik Gootti ate'n hana dage'een;

gaachchanna ifikanna ate'n ifisaan.

3 Gosa gosaki arduwwi atike ifibaa

moyanjuwwikinna atike ifike wa'inniba'a dagaan.

4 «Qokki hite qarqara atika uudi;

duuchchiing bukki hiyyeexxi atiba'a dagaan;

Labbaxxi atixxi oose bayyii'n

meyyaxxi atixxi oosenna hanqafende atibaa daggaan.

5 Ookkonneechchi uduma atinna uuddatton; wa'a hitatton;

qalbe atixxinna xoggitaan; gammashshotinna ise'n wo'mita;

abbaayyuwwate'n hexxeexxi karruwwa atibaa dagga;

moyanjuwwiink qabeenninna atike kadaan.

6 Gaaluwwiink haagan,

Midiyaamixxinna Eefaaxxi gaaluwwiinxi baltanna

Boga atike'n wo'mitaan

worqenna hixaana aadhdheexxi Duuchchi Woddike Goottika galata lassaa'n

duuchchingi Saabanaa'n dagaan.

7 Qeedarik gedhebi duuchchi atiba'a bukki hiyya;

Nebayootixxi gedhebiinxi korbeeyye atee ergatta;

kunnichchuwwinna anke tolchimalchi hana eeyyemeeke tolchuwwa kadaan;

aninna anke ulfinnika galma danchoossanno.

8 «Guugenjuwwa ifike minbaa phirrissammashsha

duumanchiinsha me'a'neek kunni ayyeera?

9 Dhugaaten giddichchuwwa anete addata;

isi gaachchanna ifika ate'n oddeessemmaxxee

Isira'eelike Woyyichcha

Duuchchi Woddika Gootta atike Mageni'a ulfinni'a

bayyii'n atixxa labbaxxa oose;

insa'neeke birretike sbiljinninnaa insa'neexxe worqenninni iyyedagatee

Terseesixxi lumoxxi hoboluwwa edissee fuldaan.

10 «Alagi manni dalla'a atika ijaraan;

moyajuwwi insa'neekiirinna ati'a ergataan;

Aare anxenni atee ganonnolenna

mararte anxa jaalalati ate'n leellishanno.

11 Atike dalla'ixxi huluwwa haanonna banendeeshshanni hexxe;

hashsha barra haranga cufendabaan

Tinninna gosa gosaxxe mootummuwwaxxi karra atibaa daggaashsha

moyanjuwwa insa'neekirinna atiba'a injiffachchoti e'yinaashshaten.✝

12 Ati'a hiremabaak ardinna mootummuwwa baxxa

haranganna kutti hita.

13 «Anke woyyichchi galmixxa bakka danchoossonnaa

Libaanoosika gaachanna

hi'neessi, asitikinna barsineeti hiyyemaaki haqichchuwwi atibaa dagaan;

lekka anxi haxxaaxxa bakka ani ulfeessanno.

14 Atee miicammake mannixxe labbaxxi oose sagada'n atibaa daggaan;

ate'e tufaataaki duuchchi lekka atixxe'n ibaan;

Duuchchi Woddike Goottik qachchi

Isira'eelike woyyichchixxe maallaqa kaddetexxe Tsiyooni hinee atee ye'naan.✝

15 «Waallendeettexxennaa gibendeettexxe

ayyinna ati giddii'n sa'abaaxxe kaddottolenna midde

Ani duuchchi woddixxe atixxe ifi saada'a

ila ila duuchchixxe gammashsho atee assanon.

16 Ati gosa gosaxxe mootummuwwaxxe ado ha'witatto;

moyanjuwwiinka ununanna unu'nitatto;

Ookkoneechchi uduma ani Duuchchi Woddik Gootti anjirallo atike

wodallo atikinna ani Ya'iqoobixxe hunna kadeennexxa egendatto.

17 Sageettotike sibilixxa bakka worqe

sibiliinxa bakka birretika sibilo ati'a iyyedaganno;

Na'ge'a ati'a galchallo atike

qullummatannaa atike akeekisanjo assanno.

18 Ta'anni edi'a atike boga'n weekkensha

atixxe gabaluwwa'ninna ba'netinna diigensha laqendaba'a;

Yaane kinni atika dalla'uwwa anjira

atixxa dalla'iinxa huluwwa galateke hitee yexxatto.

19 Ta'anni edi'a barra arishshoti ifi ati'a hasisabaan

hashshanna agenjiink ifi ati'a ifisabaan;

Duuchchi Woddik Gootti duuchchi woddike ifa

atik Mageninna atike gaachchanna kada.✝

20 Arishsho atixxi ta'anni edi'a aagabaan

agenji atikinna ifa uwwa uurrisabaan;

Duuchchi Woddik Gootti ati'a duuchchi woddike ifa kadaan;

atixxe yaaddoxxi barranna gattaan.

21 Arduwwi atik duuchchi qulliyyete kadaan;

ookkonee boganna duuchchi woddi'a dhalaan;

Ulfinna anka leellishaake kadaashsha

anxe angaxxe huje

insa'nee ani kaasennexxe qosorruwwan.

22 Atik heenoke kadeek kumaa,

duuchchingenaa'n udu'maak maa'n hunnaameette mootumma kadaan;

Ani Duuchchi Woddike Goottan;

yanna geltaa wodda tennee rakee assannon.»