1 Ookkone baro'n moyaanji Hizqiyaasi jaba qicinni ela gonphe reyo shiqeemman: Amootsiki belti Wabeekichchi Issayaasi iso Yihudo'a isiba mareexxi «Duuchchi Woddiki Gootti ‹tenne ela gonphenaa'n fayyitaboxxon; rertattaxxee mine atika giissedhi› hiyyeen» hiyyeexxi kule.

2 Hiziqiyaasinna albi gimotiba'a wirri hiyye Duuchchi Woddike Goottiba'a soodata'n hiyyee qici, 3 «Duuchchi Woddike Gootta! Mitte godobinninna addatenshati ati'a ergatemennexxa, ati gammaddattoxxa yaane assennexxa kassi hiyyi» hiniqqifate oodhe.

4 Ookkonneechchi uduma Duuchchi Woddiki Gootti Issayaasi'i hiyye ajajee qici: 5 «Hiziqiyaasiba marte, ‹Kunniseten edik ani atiki Daawwitiki Duuchchi Woddiki Gootti ani Mageni sooddachcho atixxa laqennen; indiddo atixxanna uudennen; tennexxee tommenna onde wogga edi'a hexxattoshsha ati'a lebeennen. 6 Ateenna konne Iyyerusaalemika qachcha Asoorike moyanjixxe anganaa'n gatisannon; qachchakanna golle heqqannon.

7 « ‹Duuchchi Woddiki Gootti asso'a uwweeka addachchiis isika hiyyichcho muuxo'a ati'a uwwa'neeke beesis konneechchin butti'a hedheeken: 8 Moyaanji Akaazi giissisemmaxxee iimi'a mine isikiba'a da'minammake riqiinki gaaddisi Duuchchi Woddik Gootti higgeen tomme taakkarro udumi'a higaashsha assaan› » tennexxee gaadiddotinna tomme koobowwa saxxe udumi'a higge.

9 Hiziqiyaasinna elagonphetenaa'n fayyeeshshanni konneechchi butta hexxeexxa faaro borreesse.

10 Ani «Anqan woggaake gamisa'n

reyotixxe hulabaa'n sa'a ani'a hasisaata?

Ank gateek bari anenaa'n adhdhema hasisaata?» hiyyenne.

11 Aninna hiyyennee qici, «Higgeen Duuchchi Woddika Gootta;

Duuchchi Woddik Gootta hedhaake manxe bita'n uudabe'no;

Ta'anni edi'a

manjiinxa sanne uudabe'non;

tenne butta'n hedheekiirinninna hedhaba'non.

12 Mini ank allalisnajiinke duunkanishsha goshemeen;

aninaa'ninna adhdhemeen;

Hedho anxannaa seemma gamake manjishsha mirqedhenne;

isinna mirqisanjokenaa'n anee kute'een;

gorsinaa'n galgali qico'ni anee qubi assatee wiinandette.

13 Soodaa qico'n raara'nanni galaanan:

neenqinsha miqe anxa duuchcha enqitetten:

hashsha yookaan barra shiltattochcho labbeemman.

14 Huummotishsha raarannan;

faachchiinxe amashsha yaaddoti yuusannen:

Iimi'a ceeqqisatenaa'n kexxeexxa,

ille anxi yo'oshsha gophpheemman.

Ee duuchchike Duuchchi Woddike Goottaa maganneten tenne rakko duuchchaana'n anee gatisi!»

15 Tennexxee maayyannota?

Duuchchi Woddike ane'n haaso'edheen; umo isikenni isi tenne asse'een

Anxe lubboxxe wixxinni'a

baro anka duuchcha shaqqunteti me'anno.

16 Ani atixxee hedhotike kadeennen;

hedho anxa hafuura adhdhisi;

Anee fayyise hedhannoshsha assi,

hedhotanna ani'a uwwi.

17 Kunnise wixixxi hiyyat rakkatennexxi

anxe la'o kadde;

Ba'netixxe balenaa'n

atixxe jaalalanni anee heqqitette;

Cubbo anxa duuchchanna

ifi udumi'a hundette.

18 Wiidda bale atee galateefataba'a

reyo atee ajajeba'a;

hunda balete'n dhidhimaakiir

atixxa xuurameessumma addatabaan.

19 Ani atee assaanelsha

hedhoti hedheekiir atee galatefataan;

atixxe addatenshaxxenna

anuwwi oose ifixxe kulaan.

20 Duuchchi Woddiki Gootti anee anjiraan

tennexxee no'o baro duuchcha'n

Duuchchi Woddike Goottike galma'n

jimmaatetike faarotike miyinni faarsannon.

21 Ookkonneechchi uduma Issayaasi «Raxxeexxa balase runbe miserake'n hana gannoole fayyanni insa'ne'a kuleemmani» hiyyeeman.

22 Moyaanji Hiziqiyaasinna, «Fayye galmiba'a me'a dande'annoxxa ege'nishshaaki beesisi maachcho?» hiyye Issayyaasi qore.