1 Moyanji Hizqiyaasi tennee duuchcha laqeexxa yanna yaadoti seemma ifixxa dadare; dooniyyatanna oddo'weexxi Duuchchi Woddike Goottike woyyichchi galmiba'a me'e. 2 Mootummatike miniki ajajalli Eliyaaqemii'i, mootummatike minika borreessanjo Shebinanna qeese giddii'ni ege'nemeeke kadeeka manna Amootsika belto wabeeka Issayaasiba'a erge; insa'nena dooniya odo'winemaani. 3 Ins'nenna Hiziqiyaasixxa erga Issayyaasi'n hine kullee qici, «Tinni barra wixixxi hiyyatixxe, xixxichchiinxenna salphiniinxe barran; ildaaxxi yanna gelte'naa ciniiffachchotee hunna gophpheexxe manjichchoshsha kandeennen; 4 Asooriki moyanji konne hedhotika Asoorika loliinka sooreessa ajajallo Duuchchi Woddik Gootti yowwo'a ergeen; aki magaada Duuchchi Woddiki Gootti atik Mageni konne yowwichcho laqeexxi yowwammaka xixaaxxe hexxeen; tennexxee arda no'okixxe oddonaa'n lubbo gataake mannixxee Mageno soodaat.»

5 Wabeeki Issayaasi moyanji Hizqiyaasi hiyye ergee qico laqeexxi, 6 Isinni wirri asse hiyye ergee qici, «Asoorike moyanjiki erganjuwwi anee yowwemmaka yowwichcho laqqetaxxee sodaattoxxe ‹hiyya'neen Duuchchi Woddiki Gootti› hiyye. 7 Boga isike'n hexxeexxe yaanexxa hame laqe weekemaashshanna boga ifikixxa odo laqeexxi weekemmaashshana illee iima hige ifike bogiba'a me'aashshanna wolantichchoke'ni reyaashsha assannon.»

8 Asoorik ajajalli Lakishii'n ke'e bira hedheeke Libiinake qachcha mare lolate'n hedheexxa laqe; tennexxee ookko'a me'e. 9 Isinna Tophiyiinki moyanji Tirihaaqi atee lolatee dage'een hitaaxx odo laqe; tennee laqee yanna Hiziqiyaasibaa konneechchi butta hexxeexxa erga erganjuwwake'n hiyyeexxi ergee qici, 10 «Yihudiinke moyanjo Hiziqiyaasii! Ati addattatteki mageni ‹Iyyerusaalemi Asoorike moyanjixxe anga'n sa'isse uwwabaan! Hite addattattek mee atee sobowwaal!› 11 Asoorik moyanjuwwi mitte boga lole balleessatee ke'aa wodda duuchcha hitta ookkonee boga bakka balleessaaxxa laqqeeten; atita tennenaa'n fuldattochcho ate'n fakkaattaata? 12 Ediki annuwwi anki Gozaanika, Karaanikanna Retsefiinka qachchchuwwa bakka balleessineen; Telaasar hedhammaka Edeenika arda shinneen; tinni duuchchi kaddaa wodda insa'neke magenuwwinaa'n mittikinna midde insa'nee gatisa dandeemmata? 13 Hamaatiki, Arifaadik, Sefariwayimiki Heenakinna Iwwaake qachchuwwiki moyanjuwwi haba hedhe?»

14 Moyanji Hizqiyaasi borreessa iyyemaremmake mannixxe anganaa'n adheexxi haasesse; woyyichchi galmi giddi'a borreessa adhdhe me'exxi Duuchchi Woddike Gootti edo uggeexxi, 15 hiyyeexxi soodaate qici: 16 «Dada Duuchcha Ajajatoke Duuchchi Woddike Gootta Isira'eelike Magenoo! Kurubelite hinaaxxe keela affeexxe dada hana hexxettek Mageni ate callan; butta duuchcha'n hedheeke moyanjuwwi duuchchi'a Duuchchi Woddiki Gooti ateten; iimanna butta daddetteki ateten.✝ 17 Ee Duuchchi Woddike Goottaa! Seenaakireemi! Ate hedhotika Mageno maa hiyye yowweexxa laqi.

18 «Ee Duuchchi Woddike Goottaa! Asoorik moyanjuwwi heddo moyanjuwwa bireexxi insa'neka boganna urmake assineexxa lanqeennen. 19 Haqqetanna, kino bonce giisse'ne magenooffatammaka gosa gosaka dharichchuwwa magenuwwa gunbe balleessineen. 20 Ee Duuchchi Woddike Gootta no'oke Magenoo! Atin calli Magenoke kaddettexxa buttatiki ardi duuchchi ate ege'naashsha ta'a konne Asoorike mannixxe anganaa'n inbabo'noshsha no'o gargari.»

21 Ookkonneechchi uduma Amootsiki belti Issayaasi moyanjo Hiziqiyaasibaa ergeexxi ergaa: «Duuchchi Woddiki Isira'eeliki Gootti Magenikinna moyanjo Asoorikixxa soodaachcho laqeennen, 22 Duuchchi Woddiki Gootti isixxee hiyyeeki hiyyichchi konneechchi butta hedheeken:

«Senaakiremi! Iyyerusaalemiki ardi,

atee cee'ma'n atee gebaan ati baqattatto woddanna ati uduma hedhe umo ate'ni le'misaan.

23 Holati ille atixxa bandettexxi,

qonqo atixxa qeerisse cancita'n,

Yowwita'ninna hegaa uuddetteki ayyete ati'a fakkaate?

Isira'eelike woyyichcha Magenobaa?

24 Ati'a ergatammaka manna ergite

Duuchchi Woddika Gootta

Hite yowwitette qici,

‹Anxe loliinxe gareke jabeenninni lumollamma Libaanoosixxa koobuwwa abixxennen;

Qeqeraramma Libaanoosixxa haqquwwanna elollamma birbrissuwwa kakkarennen;

yo'oshsha himmi hiyyeeke gongomi giddo mare geyennen.

25 Annafee boguwwaa'n bale u'menne,

ookko'ni wode'e fulche ha'wennen;

lumoke anke loliinke manniki hirbi Gibtseke bogika wodu'uwwa basseen› hita'n ifi saaddetten.

26 «Qeerraaxxe yanna edi gama tenne duuchcha murenneki ante kadennexxa laqqeebexxoo?

Konne yaada qophpheesse muuxamiin qico'n geessisenneki anten:

Kinijiinke dalla'ika qachchuwwa diige oletixxe tuulo kadaashsha hunna ati'a uwwenneki anten.

27 Ookkone qachchuwwik ardi hunna gopheen:

alaannenna kandaaxxa gonpheen shoonkeen:

Diidi giddike daraarishsha,

reefixxe lattoshsha, mini iima fulde ikki woddi baggammaxxe badda'ashshaten.

28 «Ani atixxa duuchchiinxa yaane ege'neennen:

maa assitattoxxanna haba'a me'itaattexxa uudaannen;

Ane'n mufetti kexxettexxanna ege'neennen.

29 Ane'n mufate kexxettaxxee

ifi saada atixxe mansha anxe'n laqendemmaxxee

Sano atixxe'n hookko

afo'o atike'ninna bixaala anka uggannon;

Daggettenga ora illee iima higgattoshsha

atee assannon.

30 «Ookkonneechchi uduma Issayyaasi moyanjo Hizqiyaasi:

«Tinni duuchchi muuxendaaki beesis konnechchi butta hedheeken,

«tenne wogga'ninna daggaaxxe wogga'n ifitti lattaaxxa midha ittinaan;

Sakkaxxe wogga'n kinni wiilsitine aasexxinaan:

woyyinetika hiddichcho karisexxinaan gumma ittinaan.

31 Haaroba Yihudake ardixxa hafe

hidda ifika butti'a oltaan; iimi darre'ninna gumma gummisaan.

32 Tinni duuchcha muuxendaashsha Dada Duuchcha Ajajaaki Duuchchi Woddiki Gootti mureme'en.

Iyyerusaalemi giddonna Tsiyoonixxe kooba hana ba'netenaa'n gataaki manni hedheen;

Tinne duuchcha muuxendaashsha assitaaxxi dada duuchcha ajajaake Duuchchi Woddike Goottixxe gaaben.

33 «Duuchchi Woddiki Gootti Asoorike moyanjixxee haaso'eexxi konneechchinni butti'a hexxeexxen:

«Senaakire konne qachcha'n haranga e'yabaan;

Gabe midde darbatabaan: wonte abixxeeki loliinki manninna qachchinba'a shiqabaan;

buttina tullubaan.

34 Isi dagemange ora higaan

konne qachchiba'anna e'yabaan»

hiyya'neen Duuchchi Woddik Gootti.

35 «Ani umo ankeenna erganjo anke Daawwitixxe

konne qachcha gollanno; isoo anjirannon!» hiyye.

36 Eettene hashsha'n Duuchchi Woddike Goottiki erganji Asoorik manni hedheeke dhibbanna saddeeta tommenna onde kuma loliinka manna shiye: gorsa manni diiphii'ni ke'aa wodda duuchchiingi renshi leelle. 37 Ookkonneechchi uduma Asoorik moyanji Seenaakireemi udumaa enqedhe me'e Nenewe ofo'le.

38 Mitte barra Niserook hiyyemaake ifike galmi giddo isi magenoonfachchote'ni hedhee'naa lame isixxi oose Adiraameelekinna Saaratsaari wolaantichchik isoo shilteexxi Araarat hiyyemaake bogibaa baajje me'ite; isixxa bakkanna isixxe oosenaa'n mitti Asiradooni hiyyemaak moye.